Read Car_Nicobarese 1 RĀCHA 6 Bible Online

1 RĀCHA 6 - Car_Nicobarese bible

1 RĀCHA 6

¹Ngaich ngö inlahen ik tö fënòng hëvhör anāi samyeūheu unôichrit yik kūön Israĕl nö kunyī-inyre nö ṙā-ang panam Aikup, im finën samyeūheu Sòlòmön nö hayöng nö i kui Israĕl, im chingëṅt Siv, ngam innët nòng chingëṅt Siv, im innët nòng chingëṅt anga-aṅ nö rultöre nö mānlö ngam patī ngam Mā Tēv.

²Ngaich ngam patI ngam Mā Tēv ngam mahānlö Sòlòmön, nö tafūöl anāi sukmôngö ṙôktāk lūöi anāi sumkôngö inrē rô-òl kui e.

³Ngaich ök nyat kūö ngam patī ngam töhet chūök, nö nët anāi sumkôngö rôta sā ṙôk tāk ngam patī: söm sumkôngö ök ṙôktāk e nö i kūö ngam patī:

⁴Ngaich vī inkūp anga-aṅ lökhöt kuföt ngaich vītö insök kūö.

⁵I kaha ngam patī tī anga-aṅ nö vī chap ël e nö vinngö, i kaha ngam patī nö vinngö, hĕng höre im töhet chūök im töhet kūö töhet inrē: vinngö tī anga-aṅ inrē: nö vī urôhò:

⁶Öp lamataṙeū chap taneui sumkôngö ṙôktāk, tafūöl sumkôngö ṙôk tāk öp laṙat, ngaich ök linūöiyö nö sat sumkôngö ṙôk tāk: pòn lā-uk anga-aṅ nö vinngö tī nö hamën kaha ngam patī, pòn hōtu nup milöönyi nö öt larā-atī tö kaha ngam patī.

⁷Ngaich ngam patī, hē e nö ṙòngmö mānlöng, mānlöng angū-ö tö ihong tö vī-i nö lēn nö ngaich nö el chūök inūlö ihong: ngaich öt rēhĕn mūngöre öt rēhĕn hanīöng ötrēhĕn nup chehetī vët nö hāngö ṙô nö el ngam patī, i saha e nö ṙòngmö mānlöngö.

⁸Ök inkūp ök lā ṙat i kaha urôhò lahāmö ngam patī angū-ö: ngaich löklö ök tayôhò cha-a tö-chavīlöng nö yòhlö nö i nup lāṙat urôhò, ngaich löknyö ip lā ṙāt nö chuh ip linūöyö.

⁹Mānlö ök patī ngaich anga-aṅ, ngaich keuheūtngen e: hanyatngö ngam patī ngaich anga-aṅ nö i kaha e tö chōn, savaich sītör inrē.

¹⁰Vīlö chap ël öp patī anga-aṅ nö keuheūtngöre chūöktī kö taneui sumkôngö rô-òl chūök: ngaich sökhak anū-ö nö i kui ngam patī tö nuk sītör savaich.

¹¹Yih ngaich nö in Sòlòmön ngam ṙô ngam Mā Tēv, nö ngö ṙô,

¹²I inlahen ngih patī ngih mahānlö meh, yē meh min lök i nup chöngö chu, ngaich kô-en i nup aṅ in chu inkaha fālen, öm haköp në chöngö chu nö ṙòkhöre öm lök in u; ngaich chū-ö min in meh haköpngö ngam ṙô re, ngam ṙô chu ik yöng meh Tāvit.

¹³Ngaich chū-ö min iyöng in yip kūön israĕl, ngaich öt ṙāngen yip tarik re min Israĕl.

¹⁴Mānlö ngam patī ngaich ang Sòlòmön, ngaich keuheūtngen e.

¹⁵Vīlö kaha ngam patī anga-aṅ nö lā ël tö savaich sītör; löktö ël ngam patī söl i nuk kaha innyatngö ël e, anga-aṅ nö hanyatngö u nö lā ël Tö chōn: ngaich anga-aṅ inrē nö hanyatngö ël ngam patī tö savaich för.

¹⁶Ngaich anga-aṅ nö nët anāi sumkôngö vahīlö nö lārit öp patī nö chōn tö sītör savaich löktökūö el patī söl i nuk kaha e: lā ël tī anga-aṅ inrē nö vī-i u, nö chūök töhet, nö chūök ngam tölngö töhet,

¹⁷Ngaich ngam patī, angū-ö, ngam töhet chūök i kūö ngam chūök töhet, nö fën anāi sumkôngö rôta.

¹⁸Sītör nuk umuh ik patī nö lā ël ka-īpö nö kumul sā tölarāngköṅny kūö pūl; ṙòkhöre nö sītör; öt hĕng ihong tömeūkö nö umuh.

¹⁹Halēn ök chūök töhet anga-aṅ nö elmilūkö ök patī lā ël nö chūök ṙinātö ngam kasòng ngam kinlēḵngô ngam Mā Tēv.

²⁰Lā el ök chūök töhet ök töluvë-ak nët anāi sumkôngö ṙôkti, nët anāi sukmôngö rôlòng; ngaich anga-aṅ nö hapātö töng humlum nyöre. Afahtö ël ngam tahāklö anga-aṅ tö sītör.

²¹Ngaich Sòlòmön nö hapātö el ngam patī tötöng humlum nyöre ngaich anga-aṅ inrē nö harötngö nuk sayōk humlum nö lākūö ök töhet chūök; ngaich hapātö ël e anga-aṅ tö humlum;

²²Keuheūtngöre ël ngam patī tö tī ò nö hapātö humlum, hanöng saha kinheūnten ngam patī: ngam tahāklö inrē ik töhet chūök nö hapātu ël tö humlum.

²³Nëtö vahīti anga-aṅ nö el ök töhet chūök tö kërup tö chōn Ôliv, tösöm sumkôngö rôlòng.

²⁴Taneui sumkôngö ök töhĕng sanëòk ök tahëng sanëôk ök kërup: löktökūö rôta ngam sanëôk söl im manā-angkūö ngam tahëng nö söm sumkôngö.

²⁵Ngaich ök tahëng kërup nö söm sumkôngö: nëtre nuk kërup nö hēngö kinlaha hĕngre inlaha inrē.

²⁶Söm sumkôngö rôlòng ök hĕng kërup, ngaich ngatī inrē ök tahëng kërup.

²⁷Ṙātu ngaich nuk kërup nö el ök lā ël ök patī: nyāktöhëich ngaich nuk sanëôk nuk kërup lökten nuk sanëôk u nö sōngtöre rōi nö i kaha patī, ngaich ök sanëôk ök tahëng kërup nö sōngtöre rōi im tahëng lākaha patī; ngaich nuk sanëôk u inrē nö sönghen höö rōi nö ellōn ngam patī.

²⁸Ngaich anga-aṅ nö hapātö humlum nö in nuk kërup.

²⁹Vinngötī anga-aṅ nö ka-īphöt mirun kaha ök patī tö insā kërup insā kachūr, insā pūl tölarukköṅny kūö inrē, lā ël lā uk inrē.

³⁰Hapātu ël inrē, ngam patī tö humlum, lā ël lā uk inrē.

³¹Ip lökhöt im töhet chūök vī inkūp anga-aṅ nö chōntö ôliv: ngaich ök tinṙīöngö nuk machööḵlö ök inkūp nö töhĕng i tötaneui tit kaha ngam patī.

³²Nëtö vahī anga-aṅ tö inkūp töchōn tö ôliv; ngaich ka-iphöt mirun u anga-aṅ tö insā kërup insā kachūr, insā pūl tölaruk-köṅny kūö, ngaich hapātö humlum nö in u; pirāny nuk humlum nö i nuk kërup, i nuk kachūr inrē.

³³Vī machööḵlö ök inkūp inrē anga-aṅ töchōn ôliv nö i lökhöt ël ök töhet chūök nö ik töhĕng i töfën tit kaha ök patī;

³⁴Nët nuk inkūp tö chōn tö för; nët mufehe i töhĕng inkūp töhanlömhang, nuk tönët mufehe inrē im tahëng inkūp töhanlömhang.

³⁵Ngaich anga-aṅ nö kaiphöt mirun nö in u tö kërup, kachūr, tölaruk köṅny kūö pūl inrē: hapātö humlum anga-aṅ nö in u nö i nup töka-iphötvö mirun.

³⁶Vīlö töluvë-ak ellōn anga-aṅ tö nuk tölūöi mitöökö töfāsö ihong, hĕng mitöökö chōn sītör.

³⁷Im finën samyeūheu ngam chūökröön tö machööḵlö ngam patī ngam Mā Tēv nö ṙātu, im chingëṅt Siv.

³⁸Im kinhōk sīön samyeūheu inrē im chingëṅt Pul, ngam hinëvhöre chingëṅt ngam patī nö keuheūten nö i nup alaha e, nö sā nup insā e nö ṙòkhöre. Vīlö e anga-aṅ nö sat samyeūheu rô-òten.