Read Car_Nicobarese 1 RĀCHA 7 Bible Online

1 RĀCHA 7 - Car_Nicobarese bible

1 RĀCHA 7

¹Mānlö patī re ngaich ang Sòlòmön nö lūöi sīön samyeūheu rô-òten, keuheūten ngaich anga-aṅ tök patī re.

²Vīlö ök patī anga-aṅ nö chōntö aṅ Lëpanön; hēngòg sumkôngö rôta, taneui anāi sumkôngö ṙôkti, lūöi anāi sumkôngö rô-òlkui i kui nuk töfën mitöökö sītör machööḵlö, i kui nuk machööḵlö nuk mikēunö sītör.

³Ngaich angū-ö nö afahtu kui nö lātulöng tö nuk töfën anāi taneui sītör mikeūnö, nuk mi i kui nuk machööḵlö,

⁴Mikeūnö nuk umuh lūöi mitöökö, ngaich ëāṅvö nuk umuk nö havööhen höö kūö nö lūöi mitöökö.

⁵Ṙòkhöre nuk inkūp tö nuk machööḵlö inrē nö töfën mirëṙö: ngaich nuk ëāṅvö nö havööhen höö kūö nö lūöi mitöökö.

⁶Ngaich anga-aṅ nö vī machööḵlö ök innyat kūö; taneui anāi sumkôngö rôta, lūöi anāi sumkôngö ṙôktāk; i kūö u inrē ök hĕng nyat kūö; i kūö u inrē nuk machööḵlö; tökufëi inrē mikeūnö.

⁷Vī nyat kūö ök kantēre inrē anga-aṅ ök chūök ò nö akah fālen: ngaich tāngö angū-ö tö sītör löktökūö el patī.

⁸Ök patī elyöngö ò, ël ök nyat kui ök tahëng töluvë-ak, nö tö ngatī vinī-i. Vī patī ök kūön Fërō kikānö anga-aṅ, ök kahë Sòlòmön nö pīhö ò sā ngih nyat kūö.

⁹Ṙòkhöre anū-ö në nö ihong töpōiṙāi, töfāsö ihong kö asā kinfëyö u, töṙātö tö ṙanat, lā ël lā-uk inrē, löktökūö rööntö machoḵlö söl im tanap tö kui, ngatī inrē nö lā ëlkahôyö öp tökiröng töluvë-ak.

¹⁰Töpōiṙāi nuk ihong rööntö machööḵlö, tökiröng nö ihong, ihong tösöm sumkôngö, ihong inrē töhëvhöre sumkôngö.

¹¹Lātulöng inrē nuk töpōi ṙāi ihong, töfāsö ihong, tösā kinlaha ṙôköre, chōn sītör inrē.

¹²Lūöi mitöökö nuk töfāsö ihong vinngö nö i kaha ök tökiröng töluvë-ak, hĕng mitöökö inrē nuk sītör mikeūnö; sā öp lā ël töluvë-ak el patī ngam Mā Tēv, töp nyat kūö ngam patī inrē.

¹³Ngaich ök rācha Sòlòmon nö tīnngö kamë-erkūö Hairām nö ṙā-ang Tūrös.

¹⁴Kikōnyö ök kūön ök tafīösi kikānö aṅ i miyöngö Naftalī, aṅ Tūrös ök kikōnyö yöng ò, töhuveū-en nö i vinī-i mās; tö tööḵngen ök tö mikah, tö mikah elmat, milichngen elmat inrē, nö i vinī-i mās. Yih ngaich anga-aṅ nö ik rācha Sòlòmön ngaich vī nuk vahīṙen re.

¹⁵Pò ò nö halēnngö inlaha nup tönët machööḵlö mās, tö hëvhör sīön sumkôngö rôlö nö hĕng: hĕng mitöökö inrē ök tönët sīön sumkôngö ṙôkö kaha; tömëngö ël ök, sā töfën nòng kuntī kinfëyö, ngatī ök inrē innëtö machööḵlö.

¹⁶Nëtö vahī anga-aṅ tö kui nup machööḵlö tö töhaṙöichö mās nö tövītu nö kui nuk machööḵlö; ök töhĕng kui machööḵlö taneui sumkôngö rô-òl taneui sumkôngö rô-òl inrē ök tahëngkui machööḵlö.

¹⁷In e nuk tösā mat kinval mirun, ngaich ṙakngö nuk tösā töchuvīṙö ël vinī-i pūl, nö yanöötö nuk kui machööḵlö, nuk i kui nuk machööḵlö; sat i töhĕng kui machööḵlö, ngaich sat inrē nö im tahëng kui machööḵlö.

¹⁸Keuheūtö tī ngaich anga-aṅ nö vī nuk machööḵlö; ngaich nët mitöökö nuk umuh nö vinngö nö im töhĕng nuk mirun tösā mat inhāṅl, nö vītu nö i nuk kui machööḵlö nuk mi-ī kui nuk machööḵlö: ngatī inrē anga-aṅ nö ik tahëng kui machööklö.

¹⁹Ngaich nuk kui machööḵlö nuk mi-i kui nuk machööḵlö ik nyat kūö nö mirun tö lilī, fën sumkôngö.

²⁰Lātulöng nup inrē kui machööḵlö i kui nup tönët machööḵlö röhta nö im aich öp mi-ip tösā mat inhāṅl mirun: nëtòng nuk ṙòng anār, nö vinngö nö haṙākö im tahëng kui machööḵlö.

²¹Ngaich anga-aṅ nö asöklö nuk machööḵlö nö ik nyat kūö ök patī ngam Mā Tēv: asöklö ök lāhāmö anga-aṅ machööḵlö ngaich kaheuk minënyö ò nö Yākin: asöklö ök lātavē inrē anga-aṅ machööḵlö, ngaich kaheuk minënyö ò nö Pō-as.

²²I kui nuk machööḵlö nuk mirun lilī: ngaich möl nö keuheūten vinīlö nuk machööḵlö.

²³Ngaich anga-aṅ nö vī ök töhaṙöichö mās nö sā mai nö söm sumkôngö nö ṙeū-eung kui ngam mai söl im tahëng, nö vinngö, taneui sumkôngö rôlòng angū-ö inrē: ngaich hĕng ök töhateūti kinūchö tölūöi anāi sumkôngö nö havinngö kaha e.

²⁴Lātaṙeū töp kui mai vinngö nup tökumul mirun nö havinngö kaha e, nö söm sumkôngö, havīlöng ngam mai nö vinngö nët mitöökö nup tökumul mirun, tövī-i hē e nö ṙòngmö ayëṙa.

²⁵Söktöhëich angū-ö nö i nuk tönët sīön nòng kōiny nuā, lūöi nòng inrē kū-ötö lā kapā lūöi nòng inrē kū-ötö lā sūng, lūöi nòng kū-ötö lā lòkngö, lūöi nòng inrē kū-ötö lā chuhöt: ngaich i uk u ngam mai nö lātulöng, ṙòkhöre nö lātuhēt rītö.

²⁶Ngaich angū-ö nö sā ṙôktāk eltī kinfëyö; ngaich ök kui e nö vī-i nö sā kui kōp sā lilī pūl: nët köṅny kinlaha aṅ angū-ö tö mak.

²⁷Ngaich anga-aṅ nö vī nup mās inröönrit söm; fën sumkôngö rôta nö hĕng inröönrit, fën sumkôngö ṙôktāk, lūöi sumkôngö rôlö anū-ö inrē.

²⁸Ngö vinī-i nuk inröönrit: tanālu taseū anū-ö; tanālu taseū inrē nö i-hôi nuk inrāngö.

²⁹Ngaich i nuk tanālö taseū u ök mi-ihôi nuk inrāngö nuk lāyön kōiny nuā, kërup inrē; ngaich el nup inrāngö hĕng öp ranöönö röön lātulöng: ngaich lātaṙeū tö nup lāyön kōiny nuā inrē nuk töchuvīṙö ël vinī-i pūl nö kilölhaka.

³⁰Ngaich ṙòkhöre nuk inröön nö fënö töchavīṙa kalröön tö mās inrē chinvī nuk kalröön inröl: ngaich fën nuk, inkööḵlö e lātaṙeū: lātaṙeū töp chūök sanöich nuk tömiyëṙiyö mās nö inkööḵlö, holtö nup töchuvīṙö ël vinī-pūl i kaha u nö kö hĕng.

³¹Ngaich ök elvāng ò nö lā ël ök kui machööḵlö lātulöng inrē nö hĕng sumkôngö: chūvī ök elvāng ò nö sā vinī-i ranöönö, hĕng sumkôngö ròngti: ngaich lātulöng inrē töp elvāng ò nup töka-īpö mirun, ngaich nuk taseū u nö fën mirë, öt milön,

³²Nuk töfën kalröön inröl elkatòh nuk taseū; ngaich ök kunṙōl ël kalröön inröl nö ik inröön röön hĕng sumkôngö ròngti rô-òl ök kalröön inröl.

³³Ngaich ök la-en nuk kalröön inröl nö sā la-en kalröön inröl nuk kunṙōl ël u, tö nuk yöng kūö nuk tamöm tö nup tanöm u inrē töhaṙöichö nuk nö mās chūök kūö tanöm ellōn ök kalröön inröl.

³⁴Fën nuk inkööḵlö i nuk töfën sinkeukngö i töhĕng inröön röön: ngaich nuk inkööḵlö u nöng ngam inröön röön.

³⁵I tömilön ròngti sumkôngö rôlòng: i kui ök inröön röön nuk kël tö nuk taseū inrē nöng tösā u.

³⁶In nuk tömitāk in nuk kël, in nuk tanānyö taseū inrē, anga-aṅ nö ka-īphöt insā kërup, lāyön kachūr inrē, nö hĕngre rôvat tö höö, holre nö vinngö tö nuk tö chuvīṙö vinī-i ël pūl.

³⁷Ngatī inlahen tī anga-aṅ nö vī nup tösöm inröön röön: ṙòkhöre anū-ö hēngö chūök inṙöichö, hēngö kinlaha, hēngö inlaha inrē.

³⁸Sömö vahī anga-aṅ tö mās chūök sanöich: ngih töhĕng chūök sanöich fën anāi kinlaha aṅ tö mak: ngih töhĕng chūök sanöich fën sumkôngö: kö hĕng aṅ kui nup tösöm inröön tö chūök sanöich.

³⁹Ngaich anga-aṅ nö asöklö nuk inröön röön, taneui lāhāmö ök patī, taneui inrē lātavē ök patī: ngaich lāhāmö ök patī tī anga-aṅ tök mai lā chuhöt, kū-ötö lòhngö.

⁴⁰Vī nuk chūök sanöich ngaich ang Hairām, sanël tumlat, pēsön inrē, keuheūtngö tīre ngaich Hairām tö nuk la-enre nö ṙòkhöre nuk vahīṙen ò nö im patī ngam Mā Tēv nö kūönkūö ök rācha Sòlòmön:

⁴¹Tö nuk tönët machööḵlö, tönët inrē töchilū chūök mak i nuk kui machööḵlö ök mi-i kui nuk machööḵlö: nuk tö nët inrē mirum tösā mat kinval nö i kaha nuk tö nët töchilū chūök mak i nuk kui machööḵlö nuk mi-i kui nuk machööḵlö:

⁴²Tö nuk töfënòng ṙòng anār nö i nuk tönët mirun tö sā mat inhāṅl: nët mitöökö nuk ṙòng anār i töhĕng mirun tösā mat inhāṅl, nö i kaha nuk tönët töchilū chūök mak nuk kui machööḵlö nuk mi-ikui nuk machööḵlö;

⁴³Tö nuk tösöm inröön röön, tö nuk tösöm chūök sanöich kui nuk inröön röön;

⁴⁴Tök töhĕng mai, tö nuk tönët sīön nòng kōiny nuā elkatòh ök mai;

⁴⁵Tö nuk tanīöyö, sanël tumlat pēsön inrē: ṙòkhöre anū-ö në chūökṙen, vahī Hairām nö kūönkūö ök rācha Sòlòmön nö im patī ngam Mā Tēv, nö mās tö tö-ayānga.

⁴⁶Ip töṙā-akūö panam Yôtön ngam rācha nö haṙöichö u, ip tilin tumlat i hôi Sökòt tö Seretan.

⁴⁷Ṙāngenre Sòlòmön nö kalah lumngan nuk chūökṙen, pò u nö yahlö ṙôken; öt kôti lumngan nuk mās.

⁴⁸Ṙòkhöre nuk chūökṙen nö vī-i tö Sòlòmön nö ngaich nö el patī ngam Mā Tēv: ök humlum tahāklö, tök mīs nö humlum, ök chūök nuk töhet rôti;

⁴⁹Nuk chūökröön tö manyak, taneui lāhāmö, taneui latavē, i kūö ök chūök töhet, nöng humlum nyöre; tö nuk pūl, tö nuk ëāṅvö, tö nuk tanôp, nöng humlum;

⁵⁰Tö nuk kōp innyangngö kūö ëāṅvö, pēsön, sanël,chūök kunral, höng humlum nyöre; tö nuk tinkīök inkūp, hĕnghöre i nuk inkūp lā ël ök patī, ik chūök tölngö töhet, i nuk inkūp ngam patī inrē, ngam patī ngam Tēv inrē, nöng humlum.

⁵¹Keuheūten nö ngaich nö ṙòkhöre nuk la-en vahīṙen ök rācha Sòlòmön nö im patī ngam Mā Tēv. Ngaich ang Sòlòmön nö kētö nuk chehen nuk kahëtö ök yöng ò Tāvit, nuk rupīö, humlum, chūökṙen inrē ngaich chaphöt u nö el chūök chehen ngam patī ngam Mā Tēv.