Read Car_Nicobarese 1 RĀCHA 8 Bible Online

1 RĀCHA 8 - Car_Nicobarese bible

1 RĀCHA 8

¹Ngaich ang Sòlòmön nö hamūl yik mā i Israĕl, ṙòkhöre inrē yik mākūö miyöngö tö yik kūön rācha lamökngö rit yik muvöhngö yik kūön Israĕl, nö ik rācha Sòlòmön nö i Yērusalem, nö kēlö kasòng kinlēḵ-ngô ngam Mā Tēv nö ṙā-ang el panam Tāvit, ök i Sīyôn.

²Hamūlöre ngaich yik tarik Israĕl nö ṙòkhöre nö ik rācha Sòlòmön ip tökiröng sakāmö, im chingëṅt Etanim, ngam sinātö chingëṅt.

³Yit ngaich nö ṙòkhöre yik mākūö Israĕl, ngaich yik kūönṙô nö keunlö ök kasòng.

⁴Keunlö ök kasòng ngam Mā Tēv cha-a ngaich, tök rūkui manūlö, ṙòkhöre inrē nuk töhet chūökṙen nuk me-ël ök rūkui; keunlöng anū-ö në tö yip kūönṙô, Lēvī inrē.

⁵Ngaich ök rācha Sòlòmön tö yik ṙôngö Israĕl inrē nö ṙòkhöre, yik mahamūlöre nö in ò, in ò cha-a nö i kūö ök kasòng, kētö sīṅp kōiny nuā inrē, nuk töt vanënyen öt rēhĕn nö kanṙeūken tö ṙôkenre.

⁶Kēḵtö ök kasòng ngam kinlēḵngô ngam Mā Tēv yik kūönṙô nö i chūök e, ël ök chūök töhet im patī, nö ik tölngö töhet chūök, el katòh rōi kël nuk kërup.

⁷Pò nuk sanëòk nuk kërup nö nyākhaka nö i kui chūök ök kasòng, ngaich nuk kërup nö ruptökui ök kasòng tö nuk kaneun e inrē.

⁸Ngaich marôta nuk kaneun lökten u nö meūkö rōi nö im töhet chūök nö i kūö ök chūök töhet; hö-ö pöri anū-ö nö meūkö nö lā el kahôiyö: umuh nūpa, ing töngamuh.

⁹Öt āṅhavö ök kasòng höng nuk tö nët tāk ihong nuk chahaplö Môsös nö i Hōrep, hē ngam Mā Tēv nö vī kinlēḵngô nö in yik kūön Israĕl, hē cha nö yih nö ṙā-ang ap panam Aikup.

¹⁰Ngaich ngö inlahen angū-ö hē yik kūönṙô nö kunyī-inyre nö ṙāngö el ök töhet chūök, ngaich ök taṙul nö hatöölö ngam patī ngam Mā Tēv.

¹¹Lökten yik kūönṙô nö ötkô nö sökhak nö meuk tö kūö ngam taṙul: pò ngam kanôlò ngam Mā Tēv nö hatöölö ngam patī ngam Mā Tēv.

¹²Ṙô-òv ngaich Sòlòmön, Vīlö ngam tavūöi An ngam Mā Tēv nö el minë halīöngö; ngö ṙô pöri tö ò min nö iyöng ël tökufëi sinngūlö.

¹³Mānlö patī meh chin ngaich nö elyöngö, chūök meh örheūheu iyöng.

¹⁴Havöölö kūöre ngaich ök rācha, ngaich hakôlò yik ṙôngö Israĕl: ngaich ṙòkhöre yik ṙôngö Israĕl nö söklöre.

¹⁵Ngö ṙô ngaich anga-aṅ, Tökôlò An yēḵ ngam Mā Tēv, ngam Tēv Israĕl, ngam töṙô-òv nö elvāngre nö ik yöng chu Tāvit, ngaich löktö eltīre nö hateungtö e, nö ngö ṙô.

¹⁶Hēten tö ök sakāmö chu kēnyen vē tarik chu Israĕl nö ṙā-ang Aikup, öt atöllu chū-ö tö elpanam in vē miyöngö Israĕl nö ṙòkhöre nö chūök minānlö patī, hòṅ ngam minënyö chu nö in e, atöllen Tāvit pöri chū-ö nö i kui vē tarik chu Israĕl.

¹⁷Lōn ök yöng chu an angū-ö Tāvit nö mānlö patī i minënyö ngam Mā Tēv, ngam Tēv Israĕl.

¹⁸Ngö ṙô pöri ngam Mā Tēv tök yöng chu Tāvit, Lōn meh ök angū-ö mānlö patī i minënyö chu, huveū-en man tö e nö ellōn meh:

¹⁹Uh pöri më-eṅ mānlö öp patī; öp kūön meh pöri min kikōnyö lamöknyö i ṙat meh, anga-aṅ min mamānlö öp patī nö i minënyö Chu.

²⁰Ngaich An ngam Mā Tēv nö haköpngö ngamṙô re nö ṙô-òv; pò chu ngaich chōholre i chūök ök yöng re Tāvit ngaich ūichlöre el kantēra Israĕl, sā kinlēḵngô tö ngam Mā Tēv, ngaich mānlöngö ngam patī nö i minënyö ngam Mā Tēv, ngam Tēv Israĕl.

²¹Ngaich chin in e tī tö chūök ngam kasòng, tö-āṅhaṅv tö ngam kinlēḵngô ngam Mā Tēv kinlēḵngô ò nö in yik muvöhngö hī hē ò nö kēnyen cha nö ṙā-ang ngam panam Aikūp.

²²Sökhak ang Sòlòmön nö i kūö ök tahāklö ngam Mā Tēv nö i kūö yik ṙôngö Israĕl nö ṙòkhöre, ngaich kū-ötö el halīöngö tī nö hanyāklö kël re:

²³Nö ngö ṙô, Mā Tēv, Tēv Israĕl, öt Tēvu tösā meh, lātulöng töm halīöngö hēk lātaṙeū töng tumlat; öp mahaköp kinlēḵngô miṙēlōn inrē nö i vē tarik re, vē lamök i kūö meh nö holtö ellōn re:

²⁴Ngam mahaköp ngam kinlēḵngôre, nö ik tarik re ök yöng chu Tāvit: hôṅ, elvāng re ṙô man ṙô-òv, ngaich hateungngö e öm aṅtī tö kël re, nö sā e töngamuh.

²⁵Yĕh lökten. Ō Mā Tēv, Tēv Israĕl, haköpngö e man im tarik re ngam yöng chu Tāvit, ngam ṙô meh kilēḵngôre in ò öm ngö ṙô, Öt latôkiṙen min tarik in meh nö i kūö chu öp amūchhak nö el kantēra Israĕl; yē vē kūön meh nö haṙēmngenre nö el talöököre nö i kūö chu nö sā meh më-eṅ lök i kūö chu.

²⁶Yĕh lökten, Ō Tēv Israĕl, ve-ekūö meh chin, hökngen ngam ṙô meh nö hateūngi, ngam ṙô meh ik tarik meh ök yöng chu Tāvit.

²⁷Ane pöri kô-en ang min ngam Tēv nö hōḵ nö iyöng el tumlat? Yĕh meuk, ngam halīöngö tö ngam lātulöng takô halīöngö inrē nö öt kô-òre nö chūök meh; höichngen ngih patī tö mānlöng tö chu!

²⁸Sön pöri yēḵ më-eṅ hō-o ngih vinë-eṅkūö meh tö ngòh tarik meh, ngih ṙô ò inrē vinë-elkui, Ō Mā Tēv, Tēv chu, öm hang ngih ṙô vinë-eṅkūö meh, ngam ṙô-ngòh, tarik meh nö i kūö meh nö vë-ekūö meh töngamuh:

²⁹Hòṅ minë mat meh nö milakhak nö kū-ötö ngih patī tö hatööm sakāmö inrē, kū-ötö ngam chūök löknyô meh ngö ṙô, Umuh ap min minënyö chu: öm hang vinë-eṅkūöre tö ngòh tarik meh yĕn kū-ötö ngih chūök nö vë-ekūötēv.

³⁰Ngaich hangihtöre më-eṅ, tö ṙô ngòh tarik meh nö vë-elkui, tö ṙô vē tarik meh Israĕl inrē, yē cha nö vë-ekūötēv min nö kū-ötö ngih chūök: hôṅ, el halīöngö man yĕh hang ngam chūök meh iyöng; ngaich aṙē-ĕl yē meh hang.

³¹Yĕn hĕng tak tarik töchōichen nö i hol re, ngaich elkūyu tö töchūöku kinlēḵngô öp lökten ò nö chūöku ṙô, ngaich yih anga-aṅ ngaich, chūöku ṙô nö i kuö ngih tahāklö meh el ngih patī:

³²Ngaich më-eṅ yēḵ el halīöngö hang, kētöre ngaich, akah fālen vē tarik meh, öt hakôlò öp tötlöök, ngaich kētö öp talöökö ò nö el kui ò; hachiplö ngam tölöök, ngaich kē-ĕkūö ò asā lanöökö ò.

³³Yē vē tarik meh Israĕl nö ötkô nö i kūö lā-al re, kūö cha nö köölö fālen nö in meh; yē cha nö havöökūöre nö hēk nö in meh, ngaich halööknyô re tö minënyö meh, ngaich vë-ekūötēv vë-elkui inrē nö in meh nö el ngih patī:

³⁴Hang më-eṅ yēḵ ngaich el halīöngö, aṙē-ĕl tökööl vē tarik meh Israĕl inrē, ngaich kēten cha hēk im panam ngam kahëtö meh i yik muvöhngö cha.

³⁵Yē ngam halīöngö nö öpikūö ngaich öt kumṙahavö, kūö cha nö köölö fālen nö in meh; ngaich yē cha nö kū-ötö ngih chūök nö vë-ekūötēv, halööknyôre inrē tö minënyö meh, havööngökūöre inrē tö nup tökööl re, yē meh öm hakihten cha:

³⁶Hang më-eṅ yēḵ ngaich elhalīöngö, ngaich aṙēlö tökööl vē tarik meh, vē tarik meh inrē Israĕl, yē meh haköpten cha tö talöökö tölöök lahök cha; ngaich tīntö kumṙah i kui panam cha, ngam kahëtö meh in vē tarik meh nö amin cha.

³⁷Yē öp inyāichö nö ing panam, yē öp lanëlngö nö umuh, yē öp nyanangngö ṙōi chōn nö umuh hēk invah chōn, mufākö hēk kataëm; yē cha nö kayīngö tö lā-alre nö i panam cha nö el nup elpanamcha; öp töng sitih invah tölëlngökūö, öp töng sitih invah umuh min;

³⁸Öp töng sitih vinë-eṅkūötēv vinë-elkui inrē tö töng tarīka, hēk ṙô vē tarik Israĕl nö ṙòkhöre, yip tökö akahalōn min tarik tö tölëlngökūö invah ellōn re, ngaich hachônglö kël re kū-ötö el ngaich patī:

³⁹Hang më-eṅ yēḵ ngaich elhalīöngö ngam elyöngö meh, aṙē-ĕl inrē, ngaich kētöre, kö kē-ĕkūö tarik inrē asā nup talöökö ò, ap mikahlōn meh ellōn ò; (tön höng më-eṅ māna tö-akahalōn tö nup ellōn kūön tarik nö ṙòkhöre:)

⁴⁰Hòṅ cha nö pa-ekūö tö meh i rô-òten cha nö ngöh nö ing panam ngam kahëtö meh i yik muvöhngö cha.

⁴¹Hēk inrē i inlahen yip aṅ tahëng, yip töt aṅ i yip tarik meh Israĕl yē ò min nö yih nö ṙā-ang i tömarôvat panam tökūö ngam minënyö meh:

⁴²(Pò cha min nö hang ngam tökiröng minënyö meh, ngam tökalēḵ kël meh inrē tö ngam töhateutnyu kël meh;) yē ò min nö yih nö vë-ekūötēv nö kū-ötö ngih patī;

⁴³El halīöngö më-eṅ yēḵ hang el ngam chūök meh, ngaich kētöre tö nup havëkö ngam aṅ tahëng tarik nö in meh: hòn ṙòkhöre vē tarik aṅ ing panam nö akahakūö tö minënyö meh, nö pa-ekūö tö meh, nö sā vē tarik meh Israĕl, hòṅ cha nö akahakūö tö ngih patī mahānlö chu nö tö kaheūkö nö i minënyö meh.

⁴⁴Yē vē tarik nö kiröönngöre nö kiyung nö la-al yip lā-alre, ip töng kū-ö talöökö cha min nö tīni tö meh, ngaich vë-ekūö ngam Mā Tēv cha-a nö kū-ötö ngih elpanam, ngam katöllö meh kū-ötö ngam patī inrē ngam mahānlö chu i minënyö meh:

⁴⁵Hang ṙô cha më-eṅ yēḵ ngaich el halīöngö nö vë-ekūötēv, nö vë-elkui inrē, ngaich, haköp öp töchip in cha.

⁴⁶Ngaich yē cha nö köölö fālen nö in meh (pòn öt tarikkuvö töt köölö fālen,) ngaich më-eṅ līn in cha; ngaich cha-a nö kēngen cha nö i panam yip lā-alre nö töhakövö, nö marôvat hēk röhta;

⁴⁷Ngaich yē cha pöri min nö fē-ĕlre nö ip panam chūök cha nö kē-ĕyö nö hakövö ngaich havöötö kūöre nö hēk, ngaich vë-elkui nö in meh nö ip panam cha yip kamëngen cha nö hakövö, nö ngö ṙô, Köölö fālen in ngaich, lō-ong kūö inrē, öt löökö inlahen in ngaich;

⁴⁸Yē cha nö havantöre nö in meh nö holtö ellōn re holtö nômö re inrē nö i panam yip lā-al cha, yip kamëḵngen cha nö hakövö, ngaich nö kū-ötö ngih panamre nö vë-ekūö meh, ngam kahëtö meh i yik muvöhngö cha, ngam elpanam katöllö meh, tö ngam patī inrē ngam mahānlö chu i minënyö meh:

⁴⁹Hang ṙô cha më-eṅ yēḵ ngaich nö vë-elkui im chūök meh el halīöngö, ngaich haköp öp töchip in cha;

⁵⁰Ngaich aṙēlö vē tarik re më-eṅ vē tököölö fālen nö in meh, ṙòkhöre nup tanôichngen cha inrē nup sinṙakngen cha nö in meh; ngaich më-eṅ yēḵ kētö inṙētö cha i kūö yip kamëḵngen cha nö hakövö, hòṅ cha nö aṙē-ĕlōn tö cha.

⁵¹Tön tarik meh yin, amin meh inrē, më kahënyö meh nö ṙā-ang Aikūp, ṙā-ang ellōn kūö ök inṙöich vët tameūyö:

⁵²Hòṅ meh milakhak mat im vinë-elkui tö vē tarik meh, ngam vinë-elkui tö vē tarik meh Israĕl, öm hang ṙô cha ip töng hē cha nö peuinyhökūö meh.

⁵³Tön më-eṅ man mahaköhngen cha ngaich nö ṙā-ang in vē tarik ngih panam nö ṙòkhöre nö amin meh, sā ṙô meh nö lökten eltī Môsös ök tarik meh hē meh kēnyö yik muvöhngö ih nö ṙā-ang Aikup, Ō Mā Tēv.

⁵⁴Ngaich ngöh angū-ö, hē kinheūten Sòlòmön tö në ṙô re nö vë-ekūötēv nö vë-elkui inrē nö im Mā Tēv, chōholre ngaich anga-aṅ nö ṙā-ang i kūö ngam tahāklö ngam Mā Tēv, ṙā-ang i sinimhak inrē nö hanyākhak kël nö kū-ötö el halīöngö.

⁵⁵Söklöre anga-aṅ ngaich, ngaich hakôlò yik ṙôngö tarik Israĕl nö pōitô, nö ngö ṙô,

⁵⁶Tökôlò an ngam Mā Tēv ngam kamëtö haneūheu vē tarik re Israĕl sā nuk ṙô ò nö kilēḵngôre: öt hĕng töt teung ṙô i nuk tölöök ṙô ò nö kilēḵngôre, nuk ṙô ò nö kilēḵngôre nö löktö eltī ök tarik ò Môsös.

⁵⁷In hī An yēḵ ngam Mā Tēv ngam Tēv hī, sā ò misī nö i yik muvöhngö hī: uh an yēḵ nö ṙāngen hī, un rēhĕn nö ṙā-ang tīre tö hī;

⁵⁸Hòṅ ò nö harôntö ellōn hī nö in re öi lök el nup talöökö ò nö ṙòkhöre, haköp nup inchöngten inrē, tö nup chöngö ò, aṅ in ò inrē inkaha fālen, nuk tinöölô yik muvöhngö hī.

⁵⁹Hökngen në ṙô chu yēḵ, në ṙô chu vë-elkui i kūö ngam Mā Tēv, nö röhta nö im Mā Tēv sakāmö hatööm inrē, hòṅ ò nö haköp nup töchip in ngòh tarik ò, in vē tarik ò inrē Israĕl, sā nup lōn cha min nö öt hĕng hang sumkam;

⁶⁰Hòṅ vē tarik aṅkūö ngih panam nö ṙòkhöre nö akahakūö töm Mā Tēv, nöng anga-aṅ Tēv; öt ōtngöre vö tahëng.

⁶¹Lökten an yēḵ ngam ellōn meh nö teung nö im Mā Tēv ngam Tēv hī, öm lök i në chöngö ò, haköp në inchöngten inrē aṅ in ò, nö sā ing töngamuh.

⁶²Kētö tökētu ngaich nö i kūö ngam Mā Tēv, ök rācha, ṙòkhöre inrē Israĕl nö hol ò.

⁶³Kētö tökētu inrē Sòlòmön nö inlām nö tökētu nuk kahëtö ò nö i ngam Mā Tēv, nët anāi nët köṅny kōiny nuā hēngòng nët anāi köṅny sīṅp. Kēten ngam patī ngam Mā Tēv ök rācha ṙòkhöre inrē yik tarik Israĕl.

⁶⁴Im sakāmö angū-ö ök rācha nö ahetlö ök lā ṙat töluvë-ak ök mī-ikūö ngam patī ngam Mā Tēv; pòn in e anga-aṅ nö kētö töföngö tökētu, atra inrē töpahīöya tösangöö inrē tökētu nö inlām; pò ök mās tahāklö ök i kūö ngam Mā Tēv nö kūöṅnö nö chūök nup töföngö tökētu, tö nup tösangöö tökētu nö inlām töpahīöya inrē atra tökētu.

⁶⁵Hē e ngaich Sòlòmön nö ha-aṅhal ik tökiröng nāhaṅl, hol ò inrē yik Israĕl nö ṙòkhöre, nö maṙôngö, löktökūö lökhöt i Hamat söl ik kun töhëm mak Aikup, i kūö ngam Mā Tēv ngam Tēv hī, sat sumkam, sat sumkam inrē, nö fënsīön sakāmö.

⁶⁶Im hinëvhöre sakāmö anga-aṅ nö tīnngörit yik tarik, ngaich cha-a nö hakôlò öp rācha, ngaich chuh el inrūkuire nö ṙāmölōn ṙāmö ellōn inrē tökūö nup tölöök nö ṙòkhöre nuk hameuktö ngam Mā Tēv nö in Tāvit ök tarik ò, in yik tarik ò inrē Israĕl nö ṙòkhöre.