Read Car_Nicobarese 1 RĀCHA 9 Bible Online

1 RĀCHA 9 - Car_Nicobarese bible

1 RĀCHA 9

¹Ngaich ngö inlahen, hē Sòlòmön nö keuheūtngö minānlö ök patī ngam Mā Tēv, tök patī ök rācha inrē, ṙòkhöre inrē nuk lōn Sòlòmön nö tövī-i,

²Ngaich meūkö ngam Mā Tēv tö Sòlòmön ik innët heuh, sā mineūkö Ò nö i Kīpīön tö ò.

³Ngö ṙô ngaich ngam Mā Tēv tö ò, Hang ök ṙô meh chin vë-ekūötēv ök ṙô meh inrē vinë-elkui, ök ṙahônyö Meh i kūö chu: ngaich chin ahetlö ngih patī, ngih mahānlö meh, nö chūök ngih minënyö chu nö örheūheu; in e nun min në mat chu töng ellōn chu inrē nö ötṙākenre.

⁴Ngaich më-eṅ pöri yē meh min lök i kūö chu, sā lahök ök yöng meh Tāvit, öm keuheūttö ellōn re, i töchip inrē, öm la-evṙen sā nuk inchöngten meh tö chu, öm haköp në chöngö chu inrē tö në inkaha fālen aṅ in chu;

⁵Ngaich chū-ö min haköpngö ngam kantēra ngam pūlngö meh i kui Israĕl nö tö-örheūheu; sā ṙô chu ngaich kilēḵngôre ik yöng meh Tāvit, öich ngö ṙô, Öt latôkiṙen min tarik in meh nö el kantēra Israĕl.

⁶Yē yīö pöri min havööngökūöre i tinöömörit, yī-ö hēk inrē yip kūön yīö, öi öt haköp në inchöngten re tö chu në chöngö chu inrē në ṙahātö chu i kūö yīö, ngaich lök la-en nup tahëng tēv, salāmö u inrē:

⁷Ngaich chū-ö min rökngen Israĕl nö öt ing panam ngam kahëtö chu in cha; tö ngih patī inrē, ngih ahetlö chu nö i minënyö chu, kavāli min angū-ö nö ṙā-ang i mat chu; ngaich Israĕl min nö inchō-oṙô tinkāköṙô inrē nö in yip taṙòkhöre tarik:

⁸Pòrô ön ngih patī nö marôlòng kui, sönngenre min yip töng chamö-öng e nö pingangkūö, ngaich uyëken e min; ngö ṙô min cha-a inrē. Kūöyòh ang ngam Mā Tēv nö ngatī tī töng panam, tö ngih patī inrē?

⁹Ngaich ngö ṙô min cha-a nö sap ṙô. Kūö cha nö ṙāngö ngam Mā Tēv ngam Tēv cha, ngam kamënyen cha tö yik muvöhngö cha nö ṙā-ang öp panam Aikup, ngaich kētö tīre nö i tahëng tēv, ngaich salāmö u, lök la-en u inrē: lökten an ngam Mā Tēv nö kēten në tötlöök nö i kui cha.

¹⁰Ngaich ngö inlahen angū-ö i kinheūten tönët anāi samyeūheu hē Sòlòmön nö keuheūten nö mānlö nuk tönët patī, töm patī ngam Mā Tēv töm patī ngam rācha inrē.

¹¹(Hairām ök, ök rācha aṅ Tūrös mameukten Sòlòmön tö nuk chōn sītör, chōn för inrē, holre tö humlum, sā ṙôken lōn ò,) Ngaich ök rācha Sòlòmön nö kē-ĕkūö Hairām tö nuk tönët anāi elpanam ip panam Kelelī.

¹²Yih ngaich ang Hairām nö ṙā-ang Tūrös nö ngëchkö nuk elpanam nuk kahëtö Sòlòmön nö in ò; ngaich anga-aṅ nö öt ṙāmölōn nö in u.

¹³Ngö ṙô ngaich anga-aṅ, Asuh ön në elpanam, më-eṅ hol chu, në kahë tö meh in chu? Ngaich kaheūkö u anga-aṅ nö panam aṅ Kāpul, söl ing töngamuh.

¹⁴Ngaich ang Hairām nö hēngòng nët anāi tālen sahöömti tö humlum nö ik rācha.

¹⁵Angū-ö ön ngih kinṙeūkö nuk töhamūllöng rupīö tök rācha Sòlòmön; nö kūö minānlö ngam patī ngam Mā Tēv, tök patī ò, tö Millō, tök kinlonglö Yērusalem, tö Hasör, tö Mekītō, tö Kēsör inrē.

¹⁶Kiröönngöre ngaich Fërō ök rācha aṅ Aikup, ngaich kē-ĕ Kēsör, föngtö kūö e inrē, ngaich fëlngö yik aṅ Kanā-an yik mī-iyöng im elpanam, ngaich kēten e nö minchöḵö ök kikānö kūön ò, ök pīhö Sòlòmön.

¹⁷Vīlen Kēsör ngaich ang Sòlòmön, Pĕthòròn inrē ök lātaṙeū tö e,

¹⁸Tö Pē-alat Tamār inrē el tönyaṅlnyi, im panam,

¹⁹Ṙòkhöre inrē nuk elpanam chūök inchūökngö chehen mī-in Sòlòmön, tö nuk elpanam chūök inröl, tö nuk elpanam chūök tarik ò aṅ uk kōra, nuk lōn Sòlòmön inrē mahānlö ò chūök ò nö kumchikngenre nö i Yērusalem, i Lepanön, i nup panam inrē im pūlngö ò.

²⁰Yik tarik pöri nö ṙòkhöre yik töṙālöngö aṅ Amôr, aṅ Hitait, aṅ Peris, aṅ Hivait, aṅ Yepus, yik töt aṅ-in yik kūön Israĕl;

²¹Ngaich yik kūön cha im panam tö ōtren unôichrit cha, yik töt kanô-òṅ yik kūön Israĕl nö keuheūtngöre tī nö ahatngen cha, hamūllöngö cha-a tö Sòlòmön nö töhakövö, söl ing töngamuh.

²²Hö-ö pöri ang Sòlòmön nö vīten yik kūön Israĕl nö töhakövö: kumyung pöri cha-a nö tarik, tanöölöṙô ò, kūön rācha ò inrē, yöngkūö kumyung yōm nuk inröl ò inrē tarik inrē aṅ uk kōra ò.

²³Cha-a yin vē yöngkūö yik yöngre yik mi-ikui nuk la-en Sòlòmön, taneūyòng taneui anāi, yik mahayöng nö i kui yik tarik tövahi-ivṙen nö i la-en.

²⁴Ṙāngö ngam elpanam Tāvit pöri ök kikānö kūön Fërō ngaich yih nö el ök patīre mahānlö Sòlòmön: ngaich möl anga-aṅ nö vīlen Millō.

²⁵Ngaich Sòlòmön nö lūöi heuh i töhĕng samyeūheu nö kētö töföngö tökētu nö im Mā Tēv, tökētu inrē nö inlām, föng lōpān inrē nö el ök mīs ök i kūö ngam Mā Tēv. Angū-ö an kinheūten ngam patī tö tī ò.

²⁶Vīlö nuk chōng ngaich ök rācha Sòlòmön nö i Esīònkēpör, ök mī-i Elòt, i kuyāyö ök mai Itöm, ip panam Itöm.

²⁷Tīntö tarik re ngaich Hairām nö el nuk chōng, tarik aṅ chōng tö akahakūö tö mai, nö hol yik tarik Sòlòmön.

²⁸Yih cha-a ngaich nö i Ôfir ngaich ṙā-ang in e nö kē-ĕrö humlum, fënòng nët anāi tālen, ngaich kēten u nö in ök rācha Sòlòmön.