Read Car_Nicobarese 2 RĀCHA 1 Bible Online

2 RĀCHA 1 - Car_Nicobarese bible

2 RĀCHA 1

¹Ngaich Mô-ap nö ahôngö chöngö Israĕl unôichrit kinpaha Ahap.

²Ngaich suktöre Ahasariā nö löktö i ranangkūö inkup el ök latūlöng urôhò ò i Samariā ngaich vahavö anga-aṅ: tīnngö ma-ahānga ngaich anga-aṅ, nö ngö ṙô tö cha, Kuṙòh, hatöntöre ip Pē-ālsīpöp öp tēv aṅ Ēkròn yē chu min lööken tö ngih invah.

³Ngö ṙô pöri ök kūönṙô ngam Mā Tēv tö Ĕlaicha ök aṅ Tis, Chōholre man, kuṙòh höngkūö yip kūönṙô öp rācha aṅ Samariā, ngö ṙô pömchö tö cha, kūö törö-ö hòng Tēv i Israĕl, lökten yīö kiröönngöre hatöntöre ip Pē-alsīpöp öp tēv aṅ Ēkròn?

⁴Lökten An ngam Mā Tēv nö ngöṙô, Hö-ö man min yôkti ṙā-ang el ngam chaman ngam chūök meh yôklö, kô-òngvah pöri öm kapah. Kiröönngöre ngaich Ĕlaicha.

⁵Havantöre ngaich yik kūönṙô nö in ò, ngaich ngö ṙô anga-aṅ tö cha, Kūöyòh öi havan?

⁶Ngö ṙô ngaich cha-a tö ò, hĕng tak ök tarik yamih nö höngkūö ih, nö ngö ṙô tö ih, Kuṙòh, havan yin hēk ip rācha ap tamīnngen yīö ngö ṙô tö ò, Ngö ṙô An ngam Mā Tēv, Kūö törö-ö hòng Tēv i Israĕl lökten yīö kiröönngöre hatöntöre in Pē-alsīpöp öp tēv aṅ Ēkròn? Lökten man min öt yôkti ṙā-ang el ngam chaman ngam chūök meh yôklö, kô-òngvah pöri min öm kapah.

⁷Ngaich ngö ṙô anga-aṅ tö cha, Tö sitih inlaha ök taheui tarik yamih nö höngkūö yīö, nö vë-eny nang yīö tö në ṙô?

⁸Ngaich sapṙô ò cha-a, nö ngö, Tösanôyu ök nö tarik tö-inmööpu ṙat ök tö uk. Ngaich ngö ṙô anga-aṅ, Ĕlaicha ap öp aṅ Tis.

⁹Ngaich ök rācha nö tīnngö mahavëtö töhĕng tak yöngkūö tö taneui anāi kumyung nö in ò nö holtö yik tö taneui anāi. Ngaich chuh in ò ang-aṅ nö kiröönngöre: yĕh meuk, ūichhakṙen anga-aṅ nö i kui ök rung. Ngaich vë-ekūö ò anga-aṅ, nö ngö ṙô, Ō tarik ngam Tēv, ngö ṙô ap rācha tö meh, Yôntī man.

¹⁰Ngaich Ĕlaicha nö sapṙô ök yöngkūö tötaneui anāi, kumyung, Nö ngö ṙô, Yē chu öich tarik ngam Tēv, hökngen öp tameūyö yēḵ nö ṙā-ang el halīöngö nö Yônti, nö haṙāpngen meh tö më tötaneui anāi in meh inrē. Yih ngaich ök tameūyö nö ṙā-ang el halīöngö, ngaich haṙāpngen ò tö yik tötaneūi anāi in ò.

¹¹Hēk anga-aṅ nö tīntö tahëng yöngkūö tötaneui anāi kumyung nö in ò nö holtö yik tötaneui anāi in ò. Ngaich ngö ṙô anga-aṅ tö ò, Ō tarik ngam Tēv, ngö ṙô ap rācha, Ka-eūyen man yôntī.

¹²Ngaich sapṙô cha Ĕlaicha nö ngö ṙô, Yē chu öich tarik ngam Tēv, hökngen öp tameūyö yēḵ nö yih nö ṙā-ang el halīöngö nö haṙāpngen meh tö më tötaneui anāi in meh. Ngaich ök tameūyö ngam Tēv nö yih nö ṙā-ang el halīöngö, ngaich haṙāpngen ò tö yip tötaneui anāi in ò.

¹³Hēk anga-aṅ nö tīnngö ök linūöi tak yöngkūö tötaneui anāi kumyung nö holtö yik tötaneūi anāi in ò. Ngaich ök linūöi tak yöngkūö tötaneui anāi kumyung nö kiröönngöre, yih ngaich anga-aṅ nö i kūö Ĕlaicha nö simngöre, ngaich vë-ekūö ò nö ngö ṙô, Ō tarik ngam Tēv, vë-ekūö meh chin, hökngen ngih nômö Chu tö nômö vē tarik meh tötaneūi anāi, nö tölöök yēḵ nö i kūö meh.

¹⁴Yĕh meuk, ngaich ök tameūyö nö yih nö ṙā-ang el halīöngö, ngaich haṙāpngen nak tö nët tak yöngkūö tötaneui anāi kumyung tö yik tötaneui anāi in cha: hökngen ngih nômö chu pöri yēḵ nö i kūö meh nö tölöök.

¹⁵Ngaich ök kūönṙô ngam Mā Tēv nö ngö ṙô tö Ĕlaicha, Kuṙòh in ò man: Um pa-ekūö tö ò. Chōholre ngaich anga-aṅ, ngaich kiröönngöre nö hol ò nö ik rācha.

¹⁶Ngö ṙô ngaich anga-aṅ tö ò, Ngö ṙô An ngam Mā Tēv: Kūömeh tīnngö kūönṙô mahatöntöre in Pē-alsīpöp öp tēv aṅ Ēkròn kūö törö-ö hòng Tēv i Israĕl chūök intönö ngam ṙô ò? Lökten man min öt yôkti ṙā-ang el ngam chaman ngam chūök meh yôklö.

¹⁷Kapah ngaich anga-aṅ nö sā ṙô ngam Mā Tēv nö in Ĕlaicha. Rultenre ngaich Yēhōram nö hayöng nö i chūök ò, im innët sameūheu Yēhōsafat rācha aṅ Yūtā; pò ò nö ötkūönu tö kikōnyö.

¹⁸Nup inrēngöre tī Ahasariā inlahen ò, röh nup nö kūichi nö i mat Līpöre Kinṙötngö yik Rācha aṅ Israĕl?