Read Car_Nicobarese 2 RĀCHA 10 Bible Online

2 RĀCHA 10 - Car_Nicobarese bible

2 RĀCHA 10

¹Sat anāi yik kikōnyö kūön Ahap i Samrīa, kūich līpöre ngaich Yēhū, Söömhötī ngaich nö i Samariā, nö in yik mahayöng i Yĕsrīl, in yik mā, in cha inrē yik maharuklen yik kikōnyö kūön Ahap, nö ngö ṙô,

²Höng teung hë pöngchö ngih līpöre nö in yīö, meūköre yī-ö tö-īnu tö yip kikōnyö kūön ök yöng yīö, in yīö nup inrē umuh inröl kōra inrē, tö kinlōngu elpanam, lanaklö kumyung inrē;

³Meuk öp tölngö tö-akaha yī-ö aṅ in yip kikōnyö kūön yöng yīö, ha-ūichlen ò el kantēra ök yöng re yī-ö.

⁴Ngaich cha-a nö pōyen pinhë-eṅkūö, ngaich ngö ṙô, Yĕh meuk, Ötkô nak rācha tönët tak nö sökhak nö i kūö ò: sitih kanô-òṅ öi ayī-ö min sökhak i kūö ò?

⁵Ngaich anga-aṅ ök yöngkūö yik aṅ ngam patī, anga-aṅ inrē ök yöngkūö ök elpanam, tö yik mā inrē, tö cha inrē yik maharuklö yik nyīö, nö ngö ṙô nö söömhötī nö in Yēhū, Tarik meh in īhö, ngaich la-evṙen min tö nup töng chöngö meh in ih; hö-ö in hō vīlö tarik nö rācha; nup maheuṅk meh tölöök anū-ö yih tī meh.

⁶Ngaich kūich līpöre anga-aṅ nö in cha im innët heuh, nö ngö ṙô, Yē yīö lā in chu, yē yīö min inrē hang ṙô chu, kēngö kui yip tarik yin yip kūön ök yöng yīö, ngaich yihtökūö in chu i Yēsrīl ip huṙöich tö ngih ṙētak. Sat anāi yik tarik kikōnyö kūön ök rācha, yik mī-in yik mā tarik ik elpanam, yik maharuklen cha.

⁷Ngaich ngö inlahen angū-ö hē ngam līpöre nö yih nö in cha, ngaich cha-a nö kē yik kūön ök rācha kikōnyö, fëlngen cha ngaich, yik tösat anāi tarik, chaplö nuk kui cha ngaich nö el kuvôkö, ngaich söömtö u nö in ò i Yesrīl.

⁸Ngaich yih nö umuh ök vamë-eny nang, ngö ṙô ngaich nö vë-eny nang ò, Ngaich yip nö kētö nup kui yip kikōnyö kūön ök rācha. Ngö ṙô ngaich anga-aṅ, Ṙātö u nö nët kiteūm i lökhöt kūö inkūp hanöng saha ap peuheū.

⁹Ngaich ngö inlahen angū-ö ik peuheū, tö ò nö kunyī-inyre, sökhaka ngaich, ngaich ngö ṙô tö yik tarik, Löök yin ngaich: yĕh meuk ahôngen ök yöngre chin ngaich fëlngen ò: achiāp pökeh famëlngö vē?

¹⁰Akahalōn yin töngamuh tö ngam ṙô ngam Tēv nö öt hōḵ nö öt fuk ël ngih tumlat, ök ṙô ngam Mā Tēv nö in Ahap; pò ngam Mā Tēv nö ngaich tī tök ṙô ök tarik ò Ēlāicha.

¹¹Lökten Yēhū nö keuheūtngöre vah tī tö yik tö-ōtren aṅ patī Ahap i Yesrīl ṙòkngöre vah yik mā tarik ò, yik milālö hol ò inrē, tö yik kūönṙô ò, hanöng saha tī ò nö öt hĕng tit tak ṙahāti tö tö-ōtren aṅ in ò.

¹²Choholre ngaich anga-aṅ ngaich kiröönngöre, ngaich chuh Samariā. Ngaich hē ò nö el öp patī yip yōm sīṅp, chūök kinmöpngö sanôi sīṅp el talöökö,

¹³Ngaich Yēhū nö meuk kūö yik mak-alaha Ahasiā ök rācha aṅ Yūta, Ngaich ngö ṙô, Achīö öi yī-ö? Ngaich ngö ṙô cha-a nö sapṙô, Mak-alaha Ahāsiā in: ngaich kiröönngöre öi salām yip kūön ap rācha tö yip kūön ap ranī.

¹⁴Ngö ṙô ngaich anga-aṅ, Kē-ĕ cha nö aṅ, ngaich fëlngen cha nö ip chūök mak ap patī kammöp sanôi, fën anāi nët tak tarik; öt rēhĕn anga-aṅ nö ṙahātu tö tö-aṅ in cha.

¹⁵Ngaich hē ò nö ngaich nö sökngöre nö in Yēhōnatap ök kikōnyö kūö Rēkap ök hamöngkūö ò; salāman ngaich anga-aṅ, ngaich ngö ṙô tö ò, Chip ap ellōn meh, nö sā ngih ellōn chu nö ip ellōn meh? Ngaich ngöṙô Yēhōnatap, Chip an. Yē e chĕi, kētö eltī re anga-aṅ nö in ò; hayôklen ò ngaich anga-aṅ nö el inröl nö in ò.

¹⁶Ngö ṙô ngaich anga-aṅ, hol chu man tā-a, öm meuk kumlēḵ lōn chu im Mā Tēv. Ha-ūichlen ò cha-a ngaich nö ël ök inröl ò.

¹⁷Ngaich hē ò nö sölta nö i Samariā, fëlngö yik tö-ōtre ngaich anga-aṅ aṅ in Ahap i Samariā, hanöng saha hanatngö cha tö tī ò, sā ngam ṙô ngam Mā Tēv, ngam ṙô ò nö in Ēlaicha.

¹⁸Hamūl yik tarik ngaich ang Yēhū nö ṙòkhöre, ngaich ngö ṙô tö cha, Kūöṅnen la-en ök Ahap nö in Pē-al; pōyen la-en pöri min Yēhū nö in ò.

¹⁹Lökten havëten yip pròfĕt Pē-al nö in chu, ṙòkhöre yip samlāman, ṙòkhöre yip kūönṙô ò inrē; un hĕng tak törö-ö: tön hòṅ kētö tökiröng chin tökētu in Pē-al; öp töng rö-övö, öt aṅ min anga-aṅ. Inpu-utī pöri angū-ö nö tī Yēhū, nö pòn hōtu yik samlāmö Pē-al nö fëli tö ò.

²⁰Ngaich ngö ṙô Yēhū, Ahetlö manūlö yin in Pē-al. Ahangkö e cha-a ngaich.

²¹Keuheūt Israĕl ang Yēhū nö söömngö e: ngaich yih nö ṙòkhöre yik samlāmö Pē-al, lökten nö öt hĕng hang tak tarik töṙā-ayö nö öt yih. Yih cha-a ngaich nö el ök patī Pē-al; ngaich ök patī Pē-al nö löpngö ël tö cha söl manā-angkūö e.

²²Ngaich ngö ṙô anga-aṅ tö ò ök yöngṙen ök chūök manūlö, Kēnyö nup inyut samlām nö in yip samlāmö Pē-al nö ṙòkhöre. Ngaich anga-aṅ nö kēnyö nuk inyut samlām.

²³Kiröönngöre ngaich Yēhū, tö Yēhōnatap inrē ök kikōnyö kūön Rēkap, nö chuh el patī Pē-al; ngaich anga-aṅ nö ngö ṙô tö yik samlāmö Pē-al, Kilūhu cha, ngëcha inrē hòn öt hĕng tak umuh inrē aṅ in yip tarik ngam Mā Tēv hòn höng yip töng samlāmö Pē-al.

²⁴Ngaich kuhēthötre cha-a, nö kētö tökētu föng tökētu inrē. Ngaich halēnngen tarik Yēhū hëvhör anāi nö el kahôyö, nö ngö ṙô, Yĕn Hĕng tak min aṅ in yip tarik töt kô-òngvah yip kahëtö chu eltī yīö, öp mahalöngngen ò min nö kiröönngöre, ṙënngen öp nômö ò min öp nômö ò.

²⁵Ngaich ngö inlahen angū-ö, ilööṙen hē ò unôichrit finöngö töföngö tökētu, ngaich ngö ṙô Yēhū tö yik amahatī tö yik yöngṙen inrē, Kuhēthötre yin, fëlngen cha ngaich; un hĕng tak kumnyī-inyre. Ngaich acha-a nö aṅtī tö fël nö fëlngen cha; kavalnyen cha ngaich yik amahatī tö yik yöngṙen, ngaich chuh ik elpanam nup patī Pē-al.

²⁶Ngaich chā-a nö kēnyö nuk insā Pē-al, ngaich tiṙölngö ök patī Pē-al, ngaich föngngö u.

²⁷Likölngö ök insā Pē-al cha-a, tiṙölngö ök patī Pē-al cha-a inrē ngaich vīten e nö patī chūök sôḵ, söl ing töngamuh.

²⁸Ngatī inlahen tī Yēhū nö piyāingen Pē-al nö ṙā-ang in Israĕl.

²⁹Hö-ö pöri Yēhū nö ṙāngö nuk tökööl Yēropoām ök kikōnyö kūön Nēpòt ök vamīten Israĕl nö köölö fālen, öt ṙāngö re Yēhū nö tömrit u, nuk humlum kun nuā i Pētĕl, nuk mi-i Tën inrē.

³⁰Ngaich ngö ṙô ngam Mā Tēv tö Yēhū, Pò meh löökö tī öm la-evṙen tö ngam töchip nö i mat chu, ngaich keuheūtö tī tö ngam patī Ahap nö sā nup ellōn chu, ūichhak yip min kūön meh kikōnyö ip finën köl chap nö el kanterā Israĕl.

³¹Öt chumkūöṙen pöri Yēhū nö keuheūttö ellōn re nö lök i chöngö ngam Mā Tēv, ngam Tēv Israĕl: öt kē-ĕngre anga-aṅ nö ṙā-ang i nuk tökööl Yērōpoām, nuk aṅtī ò nö vīten Israĕl nö köölö fālen.

³²I nuk sakāmö anū-ö ngam Mā Tēv nö rultenre nö rökngö rô-òten Israĕl: ngaich Hāsā-ĕl nö kiyūngö cha nö i nuk kūöngö Israĕl nö ṙòkhöre;

³³Löktökūö Yôtön kū-ötö chuhöt, keuheūtngöre ök panam Kilīöt, ök amin yik aṅ Kāt amin Rūpön, amin Manasē inrē, löktökūö Arō-ĕr, i Kilīöt Pāsan inrē:

³⁴Ngaich nuk inlahen Yēhū, ṙòkhöre nuk la-en ò, nuk kumlēḵ ò inrē, röh nuk nö kūichiyö nö i mat nup Līpöre Kinṙötngö yik Rācha aṅ Israĕl?

³⁵Haṙòh ngaich Yēhū nö in yik yöng re: lāpngen ò cha-a ngaich nö i Samariā. Hayöng ngaich ök kikōnyö kūön ò ang Yēhō-āhas nö ṙënngen ò.

³⁶Nët anāi hëvhöre samyeūheu ang Yēhū nö hayöng nö i Samarīā nö i kui Israĕl.