Read Car_Nicobarese 2 RĀCHA 11 Bible Online

2 RĀCHA 11 - Car_Nicobarese bible

2 RĀCHA 11

¹Ngaich hē Ataliā ök kikānö yöng Ahāsiā nö meuk ök kūön re kikōnyö nö kapah, chōholre ngaich anga-aṅ ngaich keuheūtngöre vah tī nö fëlngö yik kūön rācha.

²Ngaich pöri Yēhōsīpa, ök kikānö kūön ök rācha Yōram, ök kikōnyö kūön Ahāsiā, nö kē-ĕ Yôas ök kikōnyö kūön Ahāsiā ngaich ulāingen ò nö ṙā-ang in yik kikōnyö kūön rācha yik töfëliyö, anga-aṅ tök maharūkan inrē, ngaich chaphöt cha nö el ök urôhò chūök mahaṙòh; ngaich cha-a nö hayunngen ò tö Ataliā, lökten ò nö öt fëliyö.

³Tafūöl samyeūheu anga-aṅ nö in ò nö hayūniyö nö el patī ngam Mā Tēv: ngaich hayöng ngam panam ang Ataliā

⁴Im sinat samyeūheu ang Yēhōi-ata nö tīnngö kamë-eṅre yik yöngṙen töhēngòng, yik amahatī ramökngö likeun ngaich kēten cha nö in ò nö i patī ngam Mā Tēv: ngaich anga-aṅ nö kilēḵngôre nö in cha, ngaich chūökṙô nö in cha nö el patī ngam Mā Tēv, hameukhömat cha inrē tök kikōnyö kūön rācha.

⁵Tölṙô cha ngaich anga-aṅ, nö ngö ṙô, Ngöh inlahen yin min: yip linūöyö in yīö, yip yamih nö im töhet sakāmö ngaich achā-a min mahayōm amahtö ngam patī rācha;

⁶(Ngaich ap linūöyö min nö i kūö ap inkūp Sūr; ngaich ap linūöyö nö ip inkūp lā-uk yip amahati), ngatī inlahen yī-ö min aṅtö ngam patī, rācha, öi rāmangngö kūö e.

⁷Ngaich yī-ö tönët kiteūm, yī-ö ṙòkhöre chamuh im tönët sakāmö, öi aṅtö ngam patī ngam Mā Tēv min havīlö ngam rācha.

⁸Ngaich vintakūö yī-ö min havīlö ngam rācha, kö aṅhāṅv eltī tö nup nyahatīre; anga-aṅ min ap tumlöphöt re nö i hôi yīö, hökngen ò nö fëli. In ap rācha yī-ö yē ò nö kunyī-inyre yē ò inrē nö kuhēthötre.

⁹Ngaich ik yöngṙen töhēngòng nö ngatī sā hachöng Yēhōiata ök kūönṙô: kö kē yik tarik cha-a ngaich, yik yamih nö ik töhet sakāmö nö hol cha yik kumnyī-inyre ik töhet sakāmö, ngaich yihtöre nö in Yēhōiata ök kūönṙô.

¹⁰Ngaich ök kūönṙô nö kētö nuk vöi lanaklö inrē nuk chehen Tāvit, nuk më-ël ngam patī ngam Mā Tēv, nö in yik yöngṙen töṙônguvö.

¹¹Sökhak ngaich yik amahati, kö aṅhāṅv elti tö chehetīre, löktökūö im lahāmö kaha ngam patī, söl im latavē kaha ngam patī, töökhaka nö ik mīs ngam patī, mahavīlen ök rācha.

¹²Ngaich anga-aṅ nö kēnyö ök kikōnyö kūön rācha, ngaich sumpīövlö ök sapīöv nö i kui ò, ngaich kē-ĕkūö ò tö ngam līpöre ngam chöngö; ngaich cha-a nö vīlen ò nö rācha, hacham kui ò inrē; fatāk eltī re ngaich cha-a, nö ngö ṙô, Hayööken ngam rācha an yēḵ ngam Tēv!

¹³Ngaich hē Ataliā nö hang ṙenṙô amahatī tö yik tarik inrē, yihtöre ngaich anga-aṅ nö in yik tarik nö el patī ngam Mā Tēv:

¹⁴Ngëicha ngaich anga-aṅ, ngaich meuk ök rācha nö sökhaka nö ik machööḵlö nö sā inlahen töha-en, ngaich yik yöngṙen tö nuk römpet nö ranghö ök rācha; ngaich ṙòkhöre yik tarik ngam panam nö ṙāmölōn, föönyö kūö nuk römpet. Tikaichngö hilā re ngaich Ataliā, ngaich ngö ṙô nö hūḵa, Inhôngen! Inhôngen!

¹⁵Ngaich ang Yēhōiata ök kūönṙô nö tölṙô yik yöngṙen tö ṙônguvö yik mī-i kui yik kumyung, nö ngö ṙô tö cha, Hatöökten ò ihôi yīö; ngaich anga-aṅ ap tamömrit ò nö fëlan nö aṅtī tö fël: pò ök kūönṙô nö ngö ṙô, Uh an nö fëli nö el patī ngam Mā Tēv.

¹⁶Lökten cha nö kētö talöökö ò; ngaich kiröönngöre anga-aṅ nö lök ik talöökö lökhöt kōra nö el ök patī rācha; in e ngaich anga-aṅ nö fëliyö.

¹⁷Ngaich Yēhōiata nö vītö kinlēḵngô ihôi ngam Mā Tēv tö ngam rācha tö yik tarik inrē, nö hōten cha nö tarik ngam Mā Tēv; ihôi ngam rācha inrē tö yik tarik.

¹⁸Ṙòkhöre ngaich yik tarik aṅ ngam panam nö chuh ik patī Pē-al, tiṙölngö e ngaich; tö nuk tahāklö tö nuk insā ò nö pinyënyi, fëli ök kūönṙô Pē-al nö i kūö nuk tahāklö ang Mattan. Ngaich öp kūönṙô nö vīlö yöngṙen nö i kui ök patī ngam Tēv.

¹⁹Kē yik yöngṙen töṙôngu anga-aṅ, ngaich, tö yik aṅ Kērit tö yik amahatī ṙòkhöre inrē yik tarik ngam panam; kētö ök rācha ngaich cha-a nö ṙā-ang im patī ngam Mā Tēv, ngaich lökhöt ik talöökö ngam inkūp yik amahtö patī rācha ūichlöre ngaich anga-aṅ nö el kantēre nö rācha.

²⁰Ṙòkhöre ngaich yik tarik ngam panam nö ṙāmölōn, chēv ngaich ngam elpanam: fëlngen Ataliā cha-a ngaich nö el patī rācha nö aṅtī tö fël.

²¹Sat samyeūheu ṙēti ang Yēhōas hē ò nö rultenre nö hayöng.