Read Car_Nicobarese 2 RĀCHA 12 Bible Online

2 RĀCHA 12 - Car_Nicobarese bible

2 RĀCHA 12

¹Ik sinat samyeūheu Yēhū ang Yēhōas nö rultenre nö hayöng; ngaich fën anāi samyeūheu anga-aṅ nö hayöng nö i Yērusalem: Sīpiā minënyö ök yöng ò kikānö aṅ Pīrsīpā.

²Ngaich ang Yēhōas nö la-evṙen tö töchip nö i kūö ngam Mā Tēv i rô-òtö nuk sakāmö ò, i nuk inköptö ò tö Yēhōiata ök kūönṙô.

³Hö-ö pöri nuk lātulöng chūökö nö kē-ĕyö: höng iṙūöhen yik tarik nö kētö tökētu föng lōpan inrē el nuk chūök latulöng.

⁴Ngaich ngö ṙô ang Yēhōas tök kūönṙô, Ṙòkhöre nup rupīö minë tö-ahetlöngö chehen minë tökēhĕtvö nö el patī ngam Mā Tēv, nup rupīö, rupīö yip tarik nö tökaheūkö i töhĕng tak, ṙòkhöre inrē nup rupīö kanahanglōn tarik nö yih nö kumten u nö el patī ngam Mā Tēv.

⁵Hökngen yip kūönṙô nö kē-ĕ u cha-a, kö kē-ĕ u nö ṙeū-eung i hol re: ngaich achā-a min nö vītit nup tömëngö im patī, ip töng chūök u min nö kôti.

⁶Ngö inlahen pöri angū-ö, ik samyeūheu tö nët anāi lūöi ök rācha Yēhōas yik kūönṙô nö öt vītit nuk tömëngö ik patī.

⁷Ngaich ök rācha Yēhōas nö havëtö ök kūönṙô ang Yēhōiata, tö yik tahëng kūönṙô inrē, ngaich ngö ṙô tö cha, Kūöyòh öyih öt vītit nup tömëngö im patī? Lökten yin ngaich ui hēk kē rupīö in yip holre, kētö u pöri nö i vinītit nup tömëngö im patī.

⁸Ngaich hō yik kūönṙô tö cha nö öt hēk nö kē rupīö nö in yik tarik, hö-ö rēhĕn nö vītit nuk tömëngö ik patī.

⁹Kē ök kasòng rupīö pöri ök kūönṙô Yēhōiata, ngaich hamëngnyö ök inkūp e, ṙātö e ngaich nö ik mīs, nö lahāmö hī yĕi kuhēthötre el ngam patī ngam Mā Tēv: ngaich yik kūönṙô yōmkūö inkūp nö chaphöt aṅ e tö nuk rupīö nuk tökēnyu nö ṙā-ang el ök patī ngam Mā Tēv.

¹⁰Ngaich ngö inlahen angū-ö, hē cha nö meuk nuk rupīö nö pōyen nö el ök kasòng rupīö, ngaich ök yōm kinūichö ik rācha tök mākūö kūönṙô nö yihtöre, ngaich cha-a nö chap nuk rupīö nö el inyul ngaich vë-eny u nuk tökôti nö el patī ngam Mā Tēv.

¹¹Ngaich cha-a nö kētö nuk rupīö nuk tö kalaha lumngan nö ngaich nö eltī cha yik töla-evṙen, yik yōm ngam patī ngam Mā Tēv: ngaich cha-a nö kētö u nö in yik töhuveū vamī chōn in yik mamānö inrē, yik töla-evṙen nö im patī ngam Mā Tēv;

¹²In yik töhuveū inrē nö katöp ihong famas ihong inrē, ṙāi invaha savaich inrē tö nup töfasö ihong vinītit nup tömëngö im patī ngam Mā Tēv, ṙāi nup tö ngaich inrē töṙānyu la-en i vinītit ngam patī.

¹³Hö-övö pöri nö vī-i nö im patī ngam Mā Tēv nup kōp rupīö, innyangngö kūö ëāṅvö, pēsön, römpĕt, hö-övö inrē humlum chūökṙen, hēk hö-övö inrē chūökṙen rupīö, nö tövī-i nö in nup rupīö tökēhĕtvö nö el ök patī ngam Mā Tēv:

¹⁴Pò cha nö kēngen u nö in cha yik töla-evṙen, ngaich aṅtī cha anū-ö nö vītit ngam patī ngam Mā Tēv.

¹⁵Hēk inrē cha-a nö öt kaheuk ṙôken tī re nö in yik tarik, yik tökētu eltī tö nuk rupīö nö kē-ĕkūö cha yik töla-evṙen; pò cha nö öt michūṙen.

¹⁶Nup rupīö tökētu kūö fālen, nup rupīö inrē tökētu kūö tökööl, öt kēhĕtvö anū-ö nö el patī ngam Mā Tēv: lumnööṙö yik kūönṙô nuk anū-ö.

¹⁷Ngaich Hāsāĕl ök rācha aṅ Sīriā nö kiröönngöre nö kiyung nö lā-al Kāt ngaich kē-ĕ e: havöölökūöre ngaich Hāsāĕl nö chuh Yērusalem.

¹⁸Ngaich ang Yēhōas ök rācha aṅ Yūtā nö kē nup tö-ahetlöng chehen nuk tökētu tö Yēhōsafāt, ök yöng ò kikōnyö, tö Ahāsiā, ök yöng ò kikōnyö, rācha aṅ Yūtā, tö nuk tö-ahetlöng chehen ò inrē, ṙòkhöre inrē nuk humlum tökôti nö el chūök rūpīö ngam patī ngam Mā Tēv, nö nuk el patī ök rācha, ngaich söömngen u nö in Hāsāĕl ök rācha aṅ Sīriā; kiröönngöre ngaich anga-aṅ nö ṙā-ang Yērusalem.

¹⁹Nuk inlahen Yēhōas, tö nuk la-en ò inrē nö ṙòkhöre, röh nuk nö kūichiyö nö i mat Līpöre Kinṙötngö yik Rācha aṅ Yūtā?

²⁰Chōholre ngaich yik tarik ò, hamūl ellōn re ngaich nö ahôngen ò, fëlngen Yēhōas ngaich nö ik patī Mīllō, el talöökö tö kū-ötö Sīllā.

²¹Pò Yōsakar ök kikōnyö kūön Sīmëat tö Yēhōsapat inrē ök kikōnyö kūön Sōmër, nak tarik ò, nö fëlngen ò, ngaich kapah anga-aṅ. Ngaich cha-a nö lāpngen ò nö in yik yöng ò nö elpanam Tāvit: ngaich ök kūön ò kikōnyö Amasīā nö hayöng nö ṙënngen ò.