Read Car_Nicobarese 2 RĀCHA 13 Bible Online

2 RĀCHA 13 - Car_Nicobarese bible

2 RĀCHA 13

¹Ik tönet anāi lūöi samyeūheu Yēhōas ök kikōnyö kūön Ahāsiā, rācha aṅ Yūtā, rultenre ngaich ang Yēhōahas ök kikōnyö kūön Yēhū nö hayöng nö i kui Israĕl nö i Samariā, ngaich sat sīön samyeūheu nö hayöng.

²Ngaich anga-aṅ nö la-evṙen tö nuk tötlöök nö i kūö ngam Mā Tēv, ngaich nö tömken nuk tökööl Yērōpoām ök kikōnyö kūö Nepòt, nuk tī ò nö vīten Israĕl nö köölö fālen; öt ṙāngöre anga-aṅ nö in u.

³Hūlökūö ngaich ök lanīnö ngam Mā Tēv nö in Israĕl, ngaich anga-aṅ nö kēten cha nö eltī Hasa-ĕl ök rācha aṅ Sīriā, eltī Penhatat inrē ök kikōnyö kūön Hāsā-ĕl, nöng iṙūöhen.

⁴Ngaich Yēhōāhas nö vë-ekūö ngam Mā Tēv, ngaich ngam Mā Tēv nö hang ṙô ò: pò ò nö meuk inkihten yik Israĕl, nuk tī ök rācha aṅ Sīriā inrē nö hakihten cha.

⁵(Ngaich ngam Mā Tēv nö kē-ĕkūö Israĕl tö mahayööken, lökten cha ngaich nö kiröönngöre nö ṙā-ang eltī yik aṅ Sīriā: iyöng el inrūkui re ngaich cha-a yik kūön Israĕl nö sā re nö lā urĕh.

⁶Hö-ö pöri cha-a nö ṙāngenre tö nuk tökööl aṅ patī Yērōpoām, nuk tī ò nö vīten Israĕl nö köölö fālen höng lök in u pöri: ōtren nö umuh inrē Asērā i Samariā inrē.)

⁷Pò ò nö öt ṙākö kūö Yēhōāhas tö aṅ i yik tarik höng taneui anāi aṅ uk kōra tarik söm nòng nuk inrē, söm köṅny kumröön tarik; pò ök rācha aṅ Siriā nö keuheūtngöre tī nö piyāingö u, kiṙöpngö u inrē nöng sā pitung.

⁸Nuk inlahen Yēhōāhas tö nuk la-en ò inrē nö ṙòkhöre, töp kumlēḵ ò inrē, röh nuk nö kūichiyö nö i mak Līpöre Kinṙötngö yik Rācha aṅ Israĕl?

⁹Haṙòh ngaich Yēhōāhas nö in yik yöng re; lāpngen ò cha-a ngaich nö i Samariā: ngaich ök kūön ò kikōnyö Yôas nö ṙënngen ò nö hayöng.

¹⁰Ik tölūöi anāi sat samyeūheu ang rācha aṅ Yūtā nö rultenre ang Yēhōas ök kikōnyö kūön Yēhōāhas nö hayöng nö i kui Israĕl nö i Samariā, ngaich tafūöl sīön samyeūheu nö hayöng.

¹¹Ngaich anga-aṅ nöng la-en tö tötlöök nö i kūö ngam Mā Tēv; öt kē-ĕngre anga-aṅ nö i nup tökööl Yērōpoām ök kikōnyö kūön Nēpòt, nuk tī ò nö vīten Israĕl nö köölö fālen: höng lök in e pöri anga-aṅ.

¹²Nuk inlahen Yēhōas, tö nuk la-en ò inrē nö ṙòkhöre tök kumlēḵ ò inrē nö kiyung nö lā-al Amasiā rācha aṅ Yūtā, röh nuk nö kūichiyö nö i mat Līpöre Kinṙötngö yik Rācha aṅ Israĕl?

¹³Haṙòh ngaich Yēhōas nö in yik yöng re; ūichlöre ngaich Yērōpoām nö el kantēra ò: lāpī ngaich Yēhōas nö i Samariā nö in yik rācha aṅ Israĕl.

¹⁴Vahavö ngaich ang Ēlaisa tök invah lökngen ò nö kapah: yihtöre ngaich ök rācha aṅ Israĕl ang Yēhōas nö in ò, ngaich peuinyhö kūö ò, nö ngö ṙô, Yöng chu, Yöng chu! Inröl aṅ Israĕl aṅ uk kōra tarik inrē!

¹⁵Ngö ṙô ngaich Ēlaisa tö ò, Kē linreny man nup chòk inrē: kē linreny ngaich anga-aṅ tö nup chòk inrē.

¹⁶Ngö ṙô ngaich anga-aṅ tök rācha aṅ Israĕl, Kētö tīre man im linreny, kētö tīre ngaich anga-aṅ nö in ò. Ṙātö tīre ngaich Ēlaisa nö i kël ök rācha.

¹⁷Ngö ṙô ngaich anga-aṅ, Löpnyö kūö ngam inkūp kuföt kū-ötö lā chuhöt: löpnyö kūö e ngaich anga-aṅ. Ngaich ngö ṙô Ēlaisa Lirenyngö tīre: lirenyngö tīre ngaich anga-aṅ. Ngö ṙô ngaich anga-aṅ, Chòk ngam Mā Tēv an inyööken, in yip aṅ Sīriā: Pò meh min i Efek fëlngö yip aṅ Sīriā, hanöng saha meh keuheūtngen cha,

¹⁸Ngaich ngö ṙô anga-aṅ, Kē nup chòk: kē-ĕ u ngaich anga-aṅ tök rācha aṅ Israĕl, Foh el tumlat man: ngaich lūöi heuh tī anga-aṅ nö foh, ṙā-ang tīre ngaich.

¹⁹Ngaich ök tarik ngam Tēv nö tainy nö in ò, nö ngö ṙô, Hòṅ taneui heuh tī man öre taheui foh hēk tafūöl heuh; ngaich möl öm mihiôṅ tö Sīriā hanöng saha meh keuheūttö e: sitih ṙöng öm töngamuh fëlö Sīriā höng lūöi heuh tī.

²⁰Kapah ngaich ang Ēlāisa, lāpngen ò cha-a ngaich. Ngaich yik kumyung aṅ Mô-āp nö kayīngtöre nö im panam ik yanīhih ngam samyeūheu.

²¹Ngaich ngö inlahen angū-ö, ik hē cha nö lāpngö ök tarik hĕng tak, ngaich yĕh meuk, meuk yik kumyung cha-a; ngaich cha-a nöng kavaltö ök tarik nö el ök anūlö Ēlaisa; ngaich hē ngam tarik nö sūöhtöre alaha nö i nuk tangëḵ Ēlaisa, aṅlö ngaich anga-aṅ, ngaich sökhakaṙen.

²²Ngaich ang Hāsāĕl ök rācha aṅ Sīriā nö hakihten Israĕl i rô-òtö nuk sakāmö Yēhōāhas.

²³Aṙē-ĕlōn pöri ngam Mā Tēv nö in cha, milēḵken cha inrē, kūö ök kinlēḵngô ò nö in Aprahām, Isak, Yāköp inrē, ngaich nö öt hòṅ halëlngen cha, öl inrē anga-aṅ nö hòṅ kavalngen cha nö ṙā-ang i kūö ò.

²⁴Kapah ngaich Hāsāĕl ök rācha aṅ Sīriā, ngaich Penhatat ök kikōnyö kūön ò nö ṙënngen ò nö hayöng.

²⁵Ngaich ök kikōnyö kūön Yēhōas ang Yēhōāhas nö hēk nö kē eltī Penhatat ök kikōnyö kūön Hāsāĕl tö nuk elpanam nuk kahë ò nö eltī Yēhōāhas ök kikōnyö yöng ò nö i kinyūngö. Lūöi heuh ang Yēhōas nö öt kô-òtī tö ò ngaich havan nuk elpanam Israĕl.