Read Car_Nicobarese 2 RĀCHA 14 Bible Online

2 RĀCHA 14 - Car_Nicobarese bible

2 RĀCHA 14

¹In innët samyeūheu Yēhōas ök kikōnyö kūön Yôāhas rācha ök Israĕl, ang Amasiā ök kikōnyö kūön Yēhōāhas rācha aṅ Yūtā nö rultenre nö hayöng.

²Nët anāi samyeūheu ṙētī anga-aṅ hē ranulten ò nö hayöng, ngaich nët anāi machūötöre samyeūheu anga-aṅ nö hayöng nö i Yērusalem; Yēhōattin minënyi ök yöng ò kikānö aṅ Yērusalem:

³La-evṙen anga-aṅ tö tölöök nö i kūö ngam Mā Tēv, sön pöri nö öt sā ök yöng re Tāvit; la-evṙen anga-aṅ tö nuk tö sā la-en Yēhōas ök yöng ò kikōnyö.

⁴Hö-ö pöri nuk latulöng chūökö nö kē-ĕyö: iṙūöhen yik tarik nö kētö tökētu föng tötahūsa inrē nö el nuk latulöng chūökö.

⁵Ngaich ngö inlahen angū-ö, ilööṙen hē ngam pūlngö nö ngaich nö köp nö eltī ò, fëlngö yik tarik re ngaich anga-aṅ yik famëlngö ök rācha yöng ò kikōnyö:

⁶Hö-ö pöri yik nyīö kūön yik famël nö kumpahaivah sā ngam tökūichi i mat līpöre ngam chöngö Môsös, sā chöngö ngam Mā Tēv, nö ngö ṙô, Öt kumpahaivah yin vē yöng tökūö fālen yip kūön öt rēhĕn yip kūön nö kumpahaivah tökūö fālen yip yöng; tö kapah pöri min tarik tökūö fālen re.

⁷Fëlö Ētöm ngaich anga-aṅ nö el Achāṙö öp Sāl söm köṅny, ngaich i kinyūngö nö kē-ĕ Sĕla, ngaich kaheuk minë-eny e nö Yôktīl, söl ing töngamuh.

⁸Ngaich ang Amasiā nö tīnngö vamë-eny nang Yēhōas, ök kikōnyö kūön Yēhū, rācha aṅ Israĕl nö ngö Ṙô, Tā-a tai kö hatīönkö kūö höö.

⁹Söömtö ṙô ngaich Yēhōas ök rācha aṅ Israĕl nö in Amasiā rācha aṅ Yūtā, nö ngö ṙô, Öp pikōḵ i Lepanön söömtö ṙô nö ip sītör chōn öp i Lapanön, nö ngö ṙô, Kētöp kūön re man kikānö nö pīhö ap kūön chu kikōnyö: ngaich hĕng nòng ök chamöö-öng umuh hanchōn töṙeūla ök mī-i Lepanön, ngaich röön tö kui pikōḵ.

¹⁰Kô-en man mihôiṅ tö Etöm, ngaich ap ellōn meh nö tāilö tī tö meh: uh man eū-eure, höngngöh man el patī re; kūöyòh ṙöng öm harunnyö chanökö re, öp fanukngö min, öm më-eṅ anòngngen meh Yūtā inrē?

¹¹Hö-ö pöri Amasiā nö hòṅ hang. Lökten an Yēhōas ök rācha aṅ Israĕl nö chōholre; ngaich anga-aṅ tö Amasiā inrē ök rācha aṅ Yūtā nö kö hatīöngkö kūö höö nö i Pĕtsimes ök panam i Yūtā.

¹²Ngaich ötkô Yūtā nö i kūö Israĕl; kö falngöre yik tarik nö chuh el inrūkui re.

¹³Ngaich Yēhōas ök rācha aṅ Israĕl nö kē-ĕ Amasiā ök rācha aṅ Yūtā, ök kikōnyö kūö Yēhōas ök kikōnyö kūön Ahasiā nö i Petsīmes, ngaich yih nö i Yērusalem, Ngaich tiṙölngö ök kinlōngö Yērusalem löktö kūö ök inkūp, fënòng sumkôngö.

¹⁴Keuheūtlöre tī ngaich anga-aṅ nö kē nuk humlum rupīö inrē keuheūtlöre nuk chūökṙen tökôti nö el ök patī ngam Mā Tēv, el nuk chūök chehen ök rācha inrē ngaich kē-e u nö chuh Samarīa, ngaich i yöngngöre nö el patī cha.

¹⁵Ngaich nuk la-en Yēhōas nuk tī ò, inrē töt kumlēḵ ò inrē nö kiyūngö Amasiā ök rācha aṅ Yūtā, röh nuk nö kūichiyö nö i mat Līpöre Kinṙötngö yik Rācha aṅ Israĕl?

¹⁶Haṙòh ngaich ang Yēhōas nö in yik yöng re, ngaich lāpi nö i Samariā nö in yik rācha aṅ Israĕl; ngaich ṙënngen ò nö hayöng ang Yēropoām kūön ò kikōnyö.

¹⁷Ngaich Amasiā ök kikōnyö kūön Yēhōas rācha aṅ Yūtā nö taneui sīön samyeūheu nö aṅ unôichrit kinpaha Yēhōas ök kikōnyö kūön Yēhōāhas rācha aṅ Israĕl.

¹⁸Nuk la-en Amasiā, röh nuk nö kūichi nö i mat Līpöre Kinṙötngö yik Rācha aṅ Yūtā?

¹⁹Ngaich cha-a nö ahōngen ò nö i Yērusalem pāngö ngaich anga-aṅ nö i Lakis: tīnngö lamū-ulrit ò pöri cha-a nö i Lakis, fëlngen ò ngaich nö in e.

²⁰Kēten ò ngaich cha-a nö i uk kōra; lāpi ngaich anga-aṅ nö Yērusalem nö in yik yöng re elpanam Tāvit.

²¹Ngaich ṙòkhöre yik tarik aṅ Yūtā nö kē-ĕ Ussīā tö ṙòngmö tafūöl sīön samyeūheu ṙēti, ngaich vīlen ò nö rācha nö i chūök ök yöng re kikōnyö ang Amasīa.

²²Vīlen Ēlāt anga-aṅ, nö havantö e nö i Yūtā, unôichrit e ngaich ök rācha nö haṙòh nö in yik yöng re.

²³Im tinneui sīön samyeūheu Amasiā ök kikōnyö kūön Yôas rācha aṅ Yūta ang Yērōpoām ök kikōnyö kūön Yehōas rācha aṅ Israĕl nö rultenre nö hayöng nö i Samariā, ngaich fën anāi kahōk tum samyeūheu nö hayöng.

²⁴Ngaich anga-aṅ nö la-evṙen tö nuk tötlöök nö i kūö ngam Mā Tēv: öt ṙākenre anga-aṅ nö i nuk tökööl Yērōpoām ök kikōnyö kūön Nēpòt, nuk tī ò nö vīten Israĕl nö köölö fālen.

²⁵Havantö kūöngö Israĕl anga-aṅ löktö kūöngö lökhöt i Hamat söl ip mai Arapā, sā ṙô ngam Mā Tēv, ngam Tēv Israĕl, ngam ṙô ò nö löktö eltī ök tarik ò Yôna kikōnyö kūön Amītāi, ök pròfĕt ök aṅ Kāt Heför.

²⁶Ngaich ngam Mā Tēv nö meuk kanihngen aṅ Israĕl nö kiröngen, pòn rö-övö tölöpikūö öt rēhĕn töṙā-ayö nöng kanahngenre, öt rēhĕn hamòlṙen nö i Israĕl.

²⁷Öt ṙô-òvö ngam Mā Tēv tö re nö hòṅ sichngö minë-eny Israĕl nö elkatòh ngam halīöngö: hayööken cha pöri anga-aṅ nö löktö eltī Yērōpoam ök kikōnyö kūön Yēhōas.

²⁸Nuk la-en Yērōpoām, ṙòkhöre nuk tī ò inrē, tök kumlēḵ ò, inlahen ò nö kiyung, tö tī ò inrē nö havānö Tāmaskös, Hamat inrē nup mikahlōn Yūtā, nö mikahlōn Israĕl, röh nuk nö kūichiyö nö i mat Līpöre Kinṙötngö yik Rācha aṅ Israĕl?

²⁹Haṙòh ngaich ang Yēropoām nö in yik yöng re, yik rācha aṅ Israĕl; ngaich ök kūön ò kikōnyö Sakariā nö hayöng nö ṙënngen ò.