Read Car_Nicobarese 2 RĀCHA 15 Bible Online

2 RĀCHA 15 - Car_Nicobarese bible

2 RĀCHA 15

¹Im tönët anāi sat samyeūheu Yērōpoām rācha aṅ Israĕl ang Asariā (Usiyā) ök kikōnyö kūön Amasiā rācha aṅ Yūtā nö rultenre nö hayöng.

²Tafūöl sīön samyeūheu ṙēti anga-aṅ hē ò nö rultenre nö hayöng; ngaich taneui anāi nët samyeūheu anga-aṅ nö hayöng nö i Yērusalem: Yēkōlāya minënyi ök yöng ò kikānö aṅ Yērusalem.

³Ngaich la-evṙen anga-aṅ tö nup tölöök nö i kūö ngam Mā Tēv, sā nuk la-en ök yöng ò kikōnyö Amasiā,

⁴Hö-ö pöri nuk latulöng chūökö nö kē-ĕyö höng iṙūöhen yik tarik nö kētö tökētu föng tötahūsa inrē nö el nuk latulöng chūökö.

⁵Ngaich ngam Mā Tēv nö chökṙen ök rācha, lökten ò ngaich nö vah tö yeūnyö söl ik kinpaha ò, ngaich iyöng el töhakösiṙen patī. Ngaich ang Yôtam ök kikōnyö kūön ök rācha nö anga-aṅ mahayōm yip aṅ patī ò, akah fālen yip tarik inrē aṅ ngam panam.

⁶Nuk la-en Asariā Usiyā, ṙòkhöre nuk tī ò inrē, röh nuk nö kūichi nö i mat Līpöre Kinṙötngö yik Rācha aṅ Yūta?

⁷Haṙòh ngaich Asariā (Usiyā) nö in yik yöng re; ngaich lāpngen ò cha-a nö in yik yöng ò nö elpanam Tāvit; ngaich Yôtam ök kikōnyö kūön ò nö hayöng nö ṙënngen ò. Rācha Israĕl Sakkaria

⁸Ik tölūöi anāi hëvhöre samyeūheu Asariā (Usiyā) rācha aṅ Yūtā ang Sakariā ök kikōnyö kūön Yērōpoām nö hayöng nö i kui Israĕl nö i Samariā nö tafūöl chumngëṅtö.

⁹Ngaich anga-aṅ nö la-evṙen tö tötlöök nö i kūö ngam Mā Tēv, nö sā inlahen yik yöng re: Öt ṙāngenre anga-aṅ nö i nuk tökööl Yērōpoām ök kikōnyö kūön Nēpòt, nuk tī ò nö vīten Israĕl nö köölö fālen.

¹⁰Ngaich Saluh ök kikōnyö kūön Yapes nö ahôngen ò nö lā-al ò, ngaich fëlan nö i kūö yik tarik, ngaich kumpahan, ṙënngen ò ngaich nö hayöng.

¹¹Ṙòkhöre nuk la-en Sakariā, yĕh meuk, kūichi nuk nö i mat Līpöre Kinṙötngö yik Rācha aṅ Israĕl.

¹²Ṙô ngam Mā Tēv An angū-ö ngam ṙô ò nö in Yēhū, nö ngö ṙô, Ūichhak yip min kikōnyö kūön meh ip finën köl chap nö el kantēra Israĕl. Ngaich teungten angū-ö nö ngatī.

¹³Ngaich Sālum ök kikōnyö kūön Yapes nö rultenre nö hayöng ik tölūöi anāi machūötöre samyeūheu Usayā rācha aṅ Yūtā; ngaich ang-aṅ nö hayöng sā rô-òten töhĕng chumngëṅtö nö i Samariā.

¹⁴Ngaich Manahem ök kikōnyö kūön Kātī nö kiröönngöre nö ṙā-ang Tirsā, ngaich yih nö i Samariā, ngaich fëlö Salum ök kikōnyö kūön Yapes nö i Samariā, ngaich kumpahan, hayöng ngaich nö ṙënngen ò.

¹⁵Nuk la-en Salum, ök inhôngen tī ò inrē, yĕh meuk, kūichiyö nuk nö i mat Līpöre Kinrötngö yik Rācha aṅ Israĕl.

¹⁶Kiyūngö Tifash ngaich tö nuk kūöngö e, löktö kūö Tīrsā, pò cha nö öt löpnyö kūö ò, lökten ò nö kiyūngö e; ngaich ṙòkhöre yik kikānö aṅ e yik puyōsö nö fungnyu aich.

¹⁷Im tölūöi anāi machūötöre samyeūheu Asariā (Usiyā) rācha aṅ Yūtā ang Menahem ök kikōnyö kūön Kātī nö rultenre nö hayöng nö i kui Israĕl, ngaich söm samyeūheu nö hayöng nö i Samariā,

¹⁸La-evṙen anga-aṅ tö tötlöök nö i kūö ngam Mā Tēv: öt ṙā-ang re i rô-òtö nuk sakāmö ò nö i nuk tökööl Yērōpoām ök kikōnyö kūön Nēpòt, nuk tī ò nö vīten Israĕl nö köölö fālen.

¹⁹Ngaich yih nö umuh nö lā-al ngam panam ang Pul rācha aṅ Asariā; ngaich ang Menahem nö sömòng kinlaha tī tö rupīö nö kē-ĕkūö Pul pòn hōten ök kël ò nö in ò nö hangëkö ngam pūlngö nö eltī.

²⁰Ngaich ang Menahem nö hateung ṙôken kahë re tö rupīö nö in Israĕl, nö in yik tökalēḵ mā kanôlò taneui anāi siköl rupīö kahë anga-aṅ i töhĕng tak, nö tökētu nö ik rācha aṅ Asīriā. Lökten ök rācha aṅ Asīriā nö havöökūöre, öt ngöh nö umuh nö im panam.

²¹Ṙòkhöre nup la-en Menahem tö nuk tī ò inrē, röh nuk nö kūichi nö i mat Līpöre Kinṙötngö yik Rācha aṅ Israĕl?

²²Haṙòh ngaich Menahem nö in yik yöng re; hayöng ngaich Pekāya ök kūön ò kikōnyö nö ṙëngen ò.

²³Im tinneui anāi samyeūheu Asariā (Usiyā) rācha aṅ Yūtā ang Pekāhaya kikōnyö kūön Menahem nö rultenre nö hayöng nö i kui Israĕl nö i Samarīa, ngaich nët samyeūheu nö hayöng.

²⁴Ngaich anga-aṅ nö la-evṙen tö tötlöök nö i kūö ngam Mā Tēv: öt ṙāngöre nö i nup tökööl Yērōpoām ök kikōnyö kūön Nēpòt, nuk tī ò nö vīten Israĕl nö köölö fālen.

²⁵Pekah ök kikōnyö kūön Remalīah, mākūö kumyung ò, nö lā-al ò nö ahôngen ò, fëlan ngaich nö i Samariā nö el patī rācha, anòng-ngö vah ò Arkup, Ariëh inrē; anòngngö vah ò inrē yik tötaneūi anāi tarik aṅ Kilīöt: kumpahan ngaich anga-aṅ, ngaich hayöng nö ṙënngen ò,

²⁶Nuk la-en Pekāhaya, nuktī ò inrē, yĕh meuk, ṙòkhöre nuk nö kūichi nö i mat Līpöre Kinṙötngö yik Rācha aṅ Israel.

²⁷Ik tö taneui anāi nët samyeūheu Asariā (Usiyā) rācha aṅ Yūtā ang Pekah kikōnyö kūön Remaliah nö rultenre nö hayöng nö i kui Israĕl nö i Samariā, ngaich nët anāi samyeūheu anga-aṅ nö hayöng.

²⁸La-evṙen anga-aṅ tö tötlöök nö i kūö ngam mā Tēv: öt ṙāngöre anga-aṅ nö i nuk tökööl Yērōpoām ök kikōnyö kūön Nēpòt i nuk tī ò nö vīten Israĕl nö köölö fālen.

²⁹Hē nuk sakāmö Pekah rācha aṅ Israĕl nö yih ang Tiklātpīlēsör rācha aṅ Asīriā, ngaich kē-ĕ Iyōn, Āpĕlpetmakaaka, Yanūah, Ketes, Hāsör, Kilīöt, kelelī inrē, ṙòkhöre nup panam Naftalī, kēngen cha ngaich anga-aṅ nö i Asīriā nö töhakövö.

³⁰Ngaich Hōsī ök kikōnyö kūön Ēlla nö lā-al Pekah ök kikōnyö kūön Remaliah nö ahôngen ò, fëlan ngaich, ngaich kumpahan, hayöng anga-aṅ ngaich nö ṙën-ngen ò, ik tönët anāi samyeūheu Yôtam ök kikōnyö kūön Lisayā.

³¹Nuk lā-en Pekah, nuk tī ò inrē, yēh meuk, kūichi nuk nö i mat Līpöre Kinṙötngö yik Rācha aṅ Israĕl.

³²Im innët samyeūheu Pekah ök kikōnyö kūön Remaliah rācha aṅ Israĕl ang Yôtam kikōnyö kūön Usayā rācha aṅ Yūtā nö rultenre nö hayöng.

³³Nët anāi taneui samyeūheu ṙēti anga-aṅ hē ò nö rultenre nö hayöng; tafūöl sīön samyeūheu anga-aṅ nö hayöng i Yērusalem: Yērusā minënyi ök yöng ò kikānö kūön Sētòk.

³⁴La-evṙen anga-aṅ tö tölöök nö i kūö ngam Mā Tēv: sā nuk la-en ök yöng re anga-aṅ Usiyā tökeuheūten.

³⁵Hö-ö pöri nuk latulöng chūökö nö kē-ĕyö, iṙūöhen yik tarik nö kētö tökētu föng tötahūsā inrē nö el nuk latulöng chūökö. Vīlö ök lātulöng inkūp ngam patī ngam Mā Tēv anga-aṅ.

³⁶Ṙòkhöre nuk la-en Yôtam, tö nuk tī ò inrē röh nuk nö kūichi i mat Līpöre Kinṙötngö yik Rācha aṅ Yūtā?

³⁷I nuk sakāmö anū-ö ngam Mā Tēv nö rultenre nö tīntö lā-al Yūtā tö Resin rācha aṅ Sīriā, tö Pekah inrē ök kikōnyö kūön Ramaliah.

³⁸Haṙòh ngaich Yôtam nö in yik yöng re, ngaich lāpī nö in yik yöng re, elpanam ök yöng re Tāvit: ngaich Ahas kikōnyö kūön ò nö ṙënngen ò nö hayöng.