Read Car_Nicobarese 2 RĀCHA 16 Bible Online

2 RĀCHA 16 - Car_Nicobarese bible

2 RĀCHA 16

¹Im sinat sīon samyeūheu Pekah ök kikōnyö kūön Remaliah ang Ahas ök kikōnyö kūön Yôtam rācha aṅ Yūtā nö rultenre nö hayöng.

²Nët anāi samyeūheu ṙētī ang Ahas hē ranulten ò nö hayöng; ngaich tafūöl sīön samyeūheu anga-aṅ nö hayöng nö i Yērusalem. Löökö la-en anga-aṅ nö i kūö ngam Mā Tēv ngam Tēv ò, sā ök yöng ò Tāvit.

³Lök el talöökö yik rācha aṅ Israĕl pöri anga-aṅ, hôṅ, ngaich vīten ök kikōnyö kūön re nö tūönkūö tameūyö, asā nuk sin-òkkūö aṅ in yik tahëng mihëṅṙö yik tökavali tö ngam Mā Tēv nö ṙā-ang i kūö yik kūön Israĕl.

⁴Kētö tökētu inrē anga-aṅ föng tötahūsa inrē nö el nuk lātulöng chūökö, i kui nuk rung inrē, el katòh tö-ayālö rōi chōn inrē.

⁵Ngaich Rēsin rācha aṅ Sīriā Pēkah inrē kikōnyö kūön Ramaliah rācha aṅ Israĕl nö yih nö i Yērusalem nö kiyung: havīlen Ahas cha-a ngaich, ötkô pöri tö ò.

⁶Hē e Rēsin rācha aṅ Sīrīa nö havanten Elāt nö i Sīriā, ahōngö yik Yahūti nö ṙā-ang Elāt: ngaich yik aṅ Sīriā nö yih nö i Elāt, ngaich iyöng nö in e söl ing töngamuh.

⁷Lökten Ahas nö tīn-ngö vame-eny nang Tiklatpilisör rācha aṅ Asīria, nö ngö ṙô, Tarik meh chin kūön meh inrē: tā-a yih man, hayööken chu ṙā-ang eltī ap rācha aṅ Sīriā, ṙā-ang elti ap rācha inrē aṅ Israel, nap chamôhòlre nö lā-al chu.

⁸Ngaich ang Ahas nö kē nuk rupīö humlum inrē nuk tökôtī tö el patī ngam Mā Tēv, el chūök rupīö i patī ngam rācha inrē, ngaich söömngen u nö raneushö ök rācha aṅ Asīriā.

⁹Hang ṙô ò ngaich ök rācha aṅ Asīriā; kiröönngöre ngaich nö lā-al Tamaskös, kē-ĕ e ngaich, ngaich kēngö yik tarik nö i Kir nö töhakövö, ngaich fëlngen Rēsin.

¹⁰Chuh Tamaskös ök rācha Ahas nö höngkūö Tiklātpilisör rācha aṅ Asīriā, ngaich meuk ök tahāklö mī-i Tamaskös: ngaich ök rācha Ahas nö söömngö insā-a vinī-i ök tahāklö nö in Urīchā ök kūönṙô, ök insā-a inrē, nö tösa vinī-i e.

¹¹Ngaich Urīchā ök kūönṙô nö vīlö ök tahāklö: nö sā nuk insā sahöömtö ök rācha Ahas nö ṙā-ang Tamaskös, ngatī tī Urīchā ök kūönṙô nö vī-i e urēhĕkūö yanīhih Ahas nö ṙā-ang Tamaskös.

¹²Hē ngam rācha nö yih nö ṙā-ang Tamaskös, meuk ök tahāklö ngaich ök rācha: haröhtöre ngaich ök rācha nö ik tahāklö, ngaich ël e nö kētö tökētu.

¹³Föng nuk tökētu anga-aṅ nuk töföngö nuk nya-aṅkūö inrē tökētu, vōktö tö-ôkö tökētu inrē anga-aṅ, ngaich kicheny mahām ök tahāklö.

¹⁴Ngaich ök mās tahāklö, ök lamākūö ngam Mā Tēv, kēnyö e anga-aṅ nö ṙā-ang i kūö ök patī, nö ṙā-ang ihôi ök tahāklö ò tö ngam patī ngam Mā Tēv, ṙātö e ngaich nö lā kapā ök tahāklö ò.

¹⁵Ngaich ök rācha Ahas, nö tölṙô Urīchā ök kūönṙô, nö ngö ṙô, El ngam tökiröng tahāklö föng nup töföngö tökētu tö lā peuheū, nup nya-aṅ inrē tökētu tö lā harap, nup töföngö tökētu tī ngam rācha inrē, nup nya-aṅ inrē tökētu tö ò, hol nup töföngö tökētu tö yip tarik aṅ ngam panam, tö nup nyā-aṅ tökētu tö cha, nup tö-ôkö inrē tökētu tö cha, ṙòkhöre inrē nup maham tö föngö tökētu nö kichënyö nö el e, ṙòkhöre inrē nup mahām tökētu: ngam mās pöri tahāklö chūök chu angū-ö hatöntöre.

¹⁶Ngatī tī ngaich Urīchā ök kūönṙô, sā nuk chöngö ök rācha Ahas.

¹⁷Ngaich ök rācha Ahas nö ṙatngö taseū ök inröön röön, ngaich kēngö ök chūök sanöich nö ṙā-ang in u; ngaich kēngö ök mās insā mai nö ṙā-ang ik mās kōiny nuā ök me-el katòh e, ngaich ṙātö e nö el töfaṙëcha ihong.

¹⁸Ngaich haṙĕhtukui tö el töhet sakāmö nuk vahīlö cha nö el ngam patī, lā uk ök lökhöt rācha chuvētu kūö anū-ö nö ik patī ngam Mā Tēv, tökūö ök rācha aṅ Asīriā.

¹⁹Nuk la-en Ahas nuk tī ò, röh nuk nö kūichi nö i mat Līpöre Kinṙötngö yik Rācha aṅ Yūta?

²⁰Haṙòh ngaich Ahas nö in yik yöng re, ngaich lāpi nö in yik yöng re nö elpanam Tāvit: ngaich Hesikiā ök kikōnyö kūön ò nö hayöng nö ṙënngen ò.