Read Car_Nicobarese 2 RĀCHA 18 Bible Online

2 RĀCHA 18 - Car_Nicobarese bible

2 RĀCHA 18

¹Ngaich ngö inlahen angū-ö im linūöi samyeūheu Hōsī ök kikōnyö kūön Ēlam rācha Israĕl, ang Hësikiā ök kikōnyö kūön Ahas rācha aṅ Yūtā nö rultenre nö hayöng.

²Nët anāi taneui samyeūheu ṙēti anga-aṅ hē ò nö rultenre nö hayöng; hayöng ngaich anga-aṅ nö i Yērusalem nët anāi machūötöre samyeūheu; Apī minënyi ök yöng ò kikānö kūön Sakariā.

³Lööken la-en anga-aṅ nö i kūö ngam Mā Tēv, sā nuk tī Tāvit ök yöng ò.

⁴Kēngö nuk chūökö anga-aṅ tömarô-òl chūök, tiṙölngö nuk machööḵlö inrē, kūölngö ök Asērā inrē: likölngö ök mās pēch anga-aṅ nö pinyënyi ök vahī Môsös; pòn i nuk sakāmö anū-ö yik kūön Israĕl nö föng tötahūsa nö i kūö ò; Nahustan minënyi anga-aṅ tö ṙô cha.

⁵Hayönglenre anga-aṅ nö im Mā Tēv, ngam Tēv Israĕl; lökten nö öt hĕng tak nö in yik rācha aṅ Yūtā nö mū-urēhĕkūö ò.

⁶Haköpngöre anga-aṅ nö im Mā Tēv, öt ṙā-angre nö tömrit ò, haköp në chöngö ò pöri minë tinöölô Môsös tö ngam Mā Tēv.

⁷Ngaich in ò ngam Mā Tēv; höng kôlòhöre anga-aṅ ip töng kū-ö ò: Ahôngen ök rācha anga-aṅ, aṅ Asīriā, ngaich öt lök la-en ò.

⁸Kiyung yik aṅ Filistain anga-aṅ sölngö nö i Kasā i nup kūöngö in e inrē, löktökūö ök chūök chamônga yik amahati tarik söl im tökalonglöng elpanam.

⁹Ngaich ngö inlahen angū-ö im finën samyeūheu ök rācha Hësikiā, nö ngam sinat samyeūheu Hōsī ök kikōnyö kūön Ēlah rācha aṅ Israĕl, ang Salmanisör rācha aṅ Asīriā nö yih nö lā-al Samariā, ngaich havīlen e.

¹⁰Kē-ĕ e ngaich cha-a i kinheūten tölūöi samyeūheu: im tinfūöl samyeūheu. Hësikiā, nö ngam minchūötöre samyeūheu Hōsī rācha aṅ Israĕl, nö kô-òng vah Samariā nö kē-ĕ.

¹¹Kēngö yik aṅ Israĕl ngaich ök rācha aṅ Asīriā nö i Asīriā, ṙātu cha-a ngaich nö i Halāh, Hapōr inrē, i kui ap tahël Kōsen, el nup elpanam Mītīs:

¹²Pò cha nö öt hang ṙô ngam Mā Tēv ngam Tēv cha, filalngö ngam kinlēḵngô ò pöri, ṙòkhöre nuk tinöölô cha tö Môsös ök tarik ngam Mā Tēv, sōḵ cha-a nö hang ṙô ò, öt rēhĕn nö la-evṙen tö e.

¹³Im finën sīön samyeūheu ök rācha Hësikiā ang Sennakerip rācha aṅ Asīriā nö yih nö lā-al nuk tökalonglöng elpanam Yūtā, ngaich kē-ĕ u.

¹⁴Ngaich Hësīkiā rācha aṅ Yūtā nö söömtö ṙô nö ik rācha aṅ Asīriā nö i Lakis, nö ngö ṙô, Köölö fālen chin ngaich, havöökūöre man ṙā-ang in chu: nup hakeunlö meh in chu keūnö u chū-ö min. Ngaich ök rācha aṅ Asīriā nö hōten Hësīkiā ök rācha aṅ Yūtā nö lūöyòng kinlaha tī inrē tö humlum.

¹⁵Ngaich Hësikiā nö kē-ĕkūö ò tö nup rupīö nö ṙòkhöre tökôtī nö el patī ngam Mā Tēv, tö nuk el chūök rupīö el patī ök rācha inrē.

¹⁶Hē e ang Hësikiā nö kaichlö humlum nö ṙā-ang i nuk inkūp ök töhet chūök ngam Mā Tēv, ṙā-ang i nuk machööḵlö inrē tö haṙūngi uk tö humlum tö Hësikiā rācha aṅ Yūtā, ngaich kētö e nö ik rācha aṅ Asīriā.

¹⁷Ngaich ök rācha aṅ Asīriā nö tīntö Tārtön, Rāpsaris, Rapsākeh inrē nö ṙā-ang Lakis nö ik rācha Hësikiā nö holtö tökiröngen ṙôngö kumyung nö ṙā-ang Lakis nö i Yērusalem. Kiröönngöre cha-a, ngaich yih nö i Yērusalem. Ngaich hē cha nö yih, ngaich sökhak ngaich nö ik talöökö mak nö hëmnyi ip latulöng tömūlngö mak, öp tö kiröng talöökö samöich hilā nö lök el panô-òṅ cha.

¹⁸Ngaich hē cha nö havëkö ök rācha, ngaich kunyī-inyre ök umuh nö in cha ang Ēliākim ök kikōnyö kūön Hilkiā, ök mī-i kui yik aṅ ngam patī Sepnah inrē ök kamūich Yô-ah inrē ök kikōnyö kūön Asaf kamūichngö ṙô.

¹⁹Ngö ṙô ök Rapsākeh tö cha, Vë-eny nang Hësikiā töngamuh, ngö ṙô ap tökiröng rācha, ap rācha aṅ Asīriā, Asuh öng ngih inyönglen ngam chūök meh hayönglenre?

²⁰Lanënö ap umuh, kumlēḵ inrē i kinyūngö, ṙô meh, ṙòkhöre pöri anū-ö nö ṙô chanök alaha, Yĕh inchīöm töngamuh hayönglenre, töp lökten meh lā-al chu ahôngö chöngö.

²¹Yĕh meuk, hayönglenre man töngamuh ip kinchīṙö töng lapöp tafūyu öm im Aikup; öp chūök ngòh tarik nö harônlöre, ngaich lòklöre eltī min anga-aṅ tö e, ngaich kô-òny tī tö e: ngatī ap Fërō yip mahayönglenre nö in ò.

²²Yē meh pöri ngö ṙô tö chu, Hayönglenre in im Mā Tēv ngam Tēv ih: röh ang nö anga-aṅ ngam töchūökuö tö nup latulöng, ngam tötahākluvö inrē tö nup tökē-ĕyö tö Hësikiā, ngaich ngö ṙô tö Yūtā tö Yērusalem inrē, I Yērusalem yin min salām i kūö ngih tahāklö?

²³Vë-ekūö meh chin, lökten töngamuh öm kētö kinlēḵngô ip yöngṙen chu öp rācha aṅ Asīriā, ngaich kē-ĕkūö meh chū-ö min tö kōra nët köṅny, yē meh më-eṅ kô öm meukṙen re tö mī-i-uk u.

²⁴Sitih kanô-òṅ öm pökeh öm havööngökūö töhĕng tak yöngṙen kumyung yip tökūöṅnen tarik ngam yöngṙen chu, ngaich hayönglenre tökūö inröl kūö tarik inrē aṅ uk kōra, öm i Aikup?

²⁵Röh öich chū-ö ngaich yih öt hōluṙen tö ngam Mā Tēv, lā-al ngih chūökö piyāingö e inrē? Ngö ṙô An yih ngam Mā Tēv tö chu, Kuṙòh lā-al ngam panam, piyāingö e inrē.

²⁶Ngaich ngö ṙô ang Ēliākim ök kikōnyö kūön Hilkiā, Sepnah, Yô-ah inrē tö Rapsākeh, Vë-ekūö meh chin, öm vë-ekūö vē tarik meh i ëlô aṅ Sīriā; tön akaha el nang in tö e: um vë-ekūö ih i ëlô Yahūti, öm el nang vē tarik i kui ngam kinlōngö.

²⁷Ngö ṙô pöri ök Rapsākeh tö cha, Röh öichu tötīntu töp yöngṙen chu öich ip yöngṙen meh in meh inrē, öich ṙôtö në ṙô? Röh apa nö tīnten chu i më tarik më amūichhak nö i kui ngam kinlōngö nö nyā sôḵ re òk hakönre inrē nö hol kūö meh?

²⁸Söklöre ngaich ang Rapsākēh, ngaich pōitô nö hūḵa nö i ëlô Yahūti, ngö ṙô ngaich nö ṙô-òvö, Hang yin tö ṙô öp tökiröng rācha, ap rācha aṅ Asīriā.

²⁹Ngö ṙô ap rācha, Un hökiṙen Hësikiā nö hachīlö yīö; tön ötkô ap min nö ṙānyen yīö nö ṙā-ang eltī chu:

³⁰Un rēhĕn Hësikiā nö vīten yīö hayönglenre im Mā Tēv, nö ngö ṙô, Öthō An ngam Mā Tēv nö öt ṙānyen hī, öthō ngih elpanam inrē min nö kētu nö eltī ap rācha aṅ Asīriā.

³¹Un hāngö ṙô Hësikiā tön ngö ṙô ap rācha aṅ Asīriā, Halöököre yin in chu, kunyī-inyre in chu inrē; kö nyā-aṅvkūö inrē tö nup vāin yīö, kö nyā-aṅvkūö inrē tö ṙòng nup anychīr yīö, kö òk mak inrē el nup chūök mak yīö;

³²Hanöng saha yanīhih chu kēngen yīö ip panam tösā ngam panam yīö, panam sāiny vāin inrē, panam rôti panô-òṅ vāin inrē, panam tavī-i ôliv töpachāka inrē, hòṅ yīö aṅ, öt kapah inrē: un hāngö ṙô inrē Hësikiā yē ò nö līpö yīö, nö ngö ṙô, Ṙānyen hī an min ngam Mā Tēv.

³³Hĕng tak hòng tēv pumnāmö tarik töhĕng heuk nö ṙānyö panam re nö ṙā-ang eltī ap rācha aṅ Asīriā?

³⁴Isuh yik tēv aṅ Hamat, aṅ Arpat inrē? Isuh yik tēv aṅ Sefarvēm, aṅ Hena, aṅ Avva? Ṙānyu ap Samariā tö cha nö ṙā-ang eltī chu?

³⁵Asuh nup anū-ö nö i nup tēv në panam, nö ṙāmānyö panam re nö ṙā-ang eltī chu, töp tökten ngam Mā Tēv min nö ṙānyen Yērusalem nö ṙā-ang eltī chu?

³⁶Höng öt ṙô-òv pöri yik tarik, öt hĕng höny milôhò nö sapṙô ò: pòn chöngö ök rācha, nö ngö ṙô, Un sāpöṙô apa.

³⁷Yihtöre ngaich ang Ēliākim ök kikōnyö kūön Hilkiā ök yōm yik aṅ patī, Sepnah inrē ök kamūich, Yô-ah inrē ök kikōnyö kūön Asaf mumkahngö ṙô, nö in Hësikiā nöng takācha inyut, ngaich vë-eny nang ò tö nuk ṙô Rapsākeh.