Read Car_Nicobarese 2 RĀCHA 19 Bible Online

2 RĀCHA 19 - Car_Nicobarese bible

2 RĀCHA 19

¹Ngaich ngö inlahen angū-ö, hē ök rācha Hësikiā nö hāngö e, tikaichngö inyut re ngaich anga-aṅ, ngaich kahumlöre tö sāk kuhēthötre ngaich nö el patī ngam Mā Tēv.

²Tīnngen Ēliākim ngaich anga-aṅ, ök yōm ök patī ò, Sepnāh inrē ök kamūich, tö yik minṙöinylen kūönṙô inrē, nö kahūmöre tö sāk, nö in Isayā ök pròfĕt ök kikōnyö kūön Amôs.

³Ngaich ngö ṙô cha-a tö ò, Ngö ṙô ap Hësikiā, Sakāmö kanihngen ön ngih, vinëkö, sinrōngkūö inrē: pò yip nyīö nö yih nö kayônyu, ngaich öt kumlē-ĕvö öp kamyônyen cha.

⁴Hang minë ṙô Rapsākeh an lohten ngam Mā Tēv ngam Tēv meh, öp tötīntu tö ngam yöng re rācha aṅ Asīriā nö miṙēngö ngam tö-aṅ Tēv, ngaich inrē min nö vëkö nup ṙô nup töhāngö nö ngaich tö ngam Mā Tēv ngam Tēv meh: lökten man hachohlöṙôre vë-ekūötēv vë-elkui yip chööḵṙen tö-ōtren.

⁵Lökten yik tarik ök rācha Hēsikiā nö yihtöre nö in Isayā.

⁶Ngö ṙô ngaich ang Isāyā tö cha, Ngö ṙô yin tö ap yöng re, Ngö ṙô An ngam Mā Tēv, Uh yin pa-ekūö tö nuk ṙô ahang yīö, nuk ṙô yik tarik ap rācha aṅ Asīriā nö ötlēkôre tö chu.

⁷Yĕh meuk, chaphöt öp ma-alaha chin in ò min, ngaich anga-aṅ min nö hang kintūöyö ṙô, ngaich havantöre min nö panam re; vīten ò chū-ö min inrē nö fukkūö fël nö i panam re.

⁸Havöökūöre ngaich Rapsākeh, ngaich kôtökūö tök rācha aṅ Asīriā nö kiyung, nö lā-al Lipnah: pò ò nö hāngan nö ngaich nö ṙāngö Lakis.

⁹Ngaich hē ò nö hāngö Tirhaka rācha aṅ i Itiōpiā, Yĕh meuk, yih ap nö lā-al meh nö kiyung: tīnngö ma-ahānga ngaich anga-aṅ nö hēk nö in Hësikiā, nö ngö ṙô,

¹⁰Ngö ṙô yin vë-ekūö Hësikiah rācha nö hachīlö meh ngam chūök meh hayönglenre, nö ngö ṙô, Öt kētu ap min Yērusalem nö eltī ap rācha aṅ Asīriā.

¹¹Yĕh meuk, ngaich man hang tī yip rācha aṅ Asīriā tö nup panam nö ṙòkhöre, nö piyāingen u nö hatngö tī: ṙānyu öm min më-eṅ?

¹²Ṙānyen u nup tēv yip pumnāmö tarik, nup töpiyāyi tö yik yöng chu, Kōsen, Haran, Risef, yik kūön aṅ Ēten inrē yik mi-i Telaosar?

¹³Isuh ap rācha aṅ Hamat, rācha aṅ Arpat, rācha aṅ elpanam Sefarvēm, aṅ Hena, aṅ Avva inrē?

¹⁴Ngaich ang Hësikiā nö teūngen tök tökūchö līpöre nö eltī yik ma-ahānga, ngaich vë-ekūö e: chuh el patī ngam Mā Tēv ngaich ang Hësikiā, ngaich haṙīöngnyö e nö i kūö ngam Mā Tēv.

¹⁵Ngaich i kūö ngam Mā Tēv ang Hësikiā nö ngö ṙô, nö vë-ekūötēv, Ō Mā Tēv, Tēv aṅ Israĕl, amūchhaka i uk yik kërup, më-eṅ man Tēv, höng më-eṅ, i kui në taṙòkhöre pūlngö ing tumlat: më-eṅ man vamī halīöngö tumlat inrē.

¹⁶Ō Mā Tēv, asītö el nang re man yēḵ, hangihtöre inrē; Ō Mā Tēv, milaklö mat re ngëicha inrē; hang në ṙô Sanekerip, në sahöömtö ò nö minṙēngö ngam tö-aṅ Tēv.

¹⁷Mā Tēv, kô-en yip rācha aṅ Asīriā nö ahatngö yik pumnāmö tarik tö nuk panam cha inrē,

¹⁸Ngaich kavalhöt nuk tēv cha nö i kūö tameūyö: pò u nö öt tēv, la-en kuntī tarik pöri, chōn ihong inrē; lökten cha nö piyāingö u.

¹⁹Ō Mā Tēv, Tēv ih hayööken ih man yĕh lökten, Vë-ekūö meh in, ṙā-ang eltī ò, hòṅ në taṙòkhöre pūlngö ngih panam nö akahalōn tö meh më-eṅ Tēv öm Mā Tēv, öm höng më-eṅ.

²⁰Ngaich Isāyā ök kikōnyö kūön Amôs nö ngö ṙô nö söömhötī nö in Hësikiā, Ngö ṙô an ngam Mā Tēv, ngam Tēv Israĕl, Pò meh ngaich vë-ekūö chu lā-al Sanekerip öp rācha aṅ Asīriā ngaich chin hang ṙô meh.

²¹Ngih ön ṙô ngam Mā Tēv tö inlahen ò: Mihôiṅ lōn ap tötchô-òv rēlö tö meh ap aṅ Sīyôn nö hayīölngen meh inrē nö mināch; Kichiny kūöre ap kikānö kūön Yēsūsalem nö in meh.

²²Achiāp miṙēngö meh tötlēka el nang inrē? In chīö öm inrē hapōilö ṙô re öm môklökūöre lātulöng. Höng lāḵlö ngam Töhet man aṅ Israĕl.

²³Miṙēngö ngam Mā Tēv man ngaich öm lökten in yip ma-ahānga öm ngö ṙô, Pōyen hol chin min tö inröl, Öich peūlöre i kui nup rôngö, ip manā-ang kūö Lepanön; ngaich chū-ö min kūöltö nup tömarôlòng umuh sītör, nup tölngö inrē för chōn umuh; Ngaich chū-ö kuhēthötre ip manā-ang kūö elyöngö, öp chūölchōn nup töṙôngu aṅ panô-òṅ.

²⁴Ngaich chin ul, òk tötohtöre mak inrē, aṅ tī tö kintāl elröön re Chin min hanyôlö nup tahël Aikup.

²⁵Hö-ö meh hang tī chu misī tö e marô-angen? Ngaich vīlö e i tö misī? Ngaich Chin töngmuh hateungtö kūö e, Hòṅ meh piṙāptökui nup tökinlōngu elpanam nö fônghak nö payāyi.

²⁶Lökten yip aṅkūö u nö kūö- nen kumlēḵ, pa-ekūö cha-a ngaich, kalūöchöre elkui inrē; ngaich cha-a nöng sā nup ki- yôp el kahôyö, sā kun chōn inrē tö-ayālö rōi, sā kiyôp i kui patī, sā sāiny töngāṅvngö rōi urēhĕkūö sanīöpö e.

²⁷Akahalōn pöri chū-ö tö anūchö meh, tö kinröönö meh inrē, tö yanī- hih meh, tö tanānyö meh inrē in chu.

²⁸Ngaich inrē ngam inkeūṙö minā-aṅ meh nö yih nö el nang chu. Lökten chin min kavòktökūö ngam vòkre nö elmeh meh, ngam inkāl elvāng inrē nö i minuh meh, ngaich chū-ö min chuvēkūö meh öm havan lök el ngam taköökö ngam löktö meh yih.

²⁹Angū-ö an min minkahngö nö in meh: nyā nup töng kanahngenre yin min nö sīöp i ngih samyeūheu ngaich im innëtö samyeūheu nyā nup samīöp nö ṙā-ang in u; ngaich im linūöyö samyeūheu yī-ö teūich, uvòh, teūich vāin inrē, ngaich nyā nup ṙòng u.

³⁰Ngaich yip chööḵ yip töt kô-òngvah aṅ patī Yūtā min nö hēk nö ṙĕhtöre kū-ötö lataṙeū, ngaich ṙônguvö nö latulöng.

³¹Pòn löknyö Yērusalem min yip chööḵ nö kunyī-inyre löknyö kui rôngö Sīyôn inrē cha-a min yip töt kô-òngvah: hateung tö e an min ngam kumlēḵlōn aṅ im Mā Tēv.

³²Lökten An ngam Mā Tēv nö ngö ṙô tö ngam rācha aṅ Asīriā, Hö-ö an min nö kuhēthötre nö i ngih elpanam, öt rēhĕn nö yih min nö i kūö e nö kumtö lanaklöre, öt rēhĕn min nö afônglö tumlat nö i kaha kinlōngö e.

³³Lök im talöökö re an nö yih, ngaich lök in e min nö havanrit re, ngaich öt yih min anga-aṅ nö i ngih elpanam, ngö ṙô ngam Mā Tēv.

³⁴Pò chu min laklö ngih elpanam öich hayööken e, tökūö chu, kūö ök tarik chu inrē Tāvit.

³⁵Ngaich ngö inlahen angū-ö hatööm angū-ö, tök kūönṙô ngam Mā Tēv nö kiröönngöre ngaich ik elyöngö yik aṅ Asīriā nö taneui köṅny hēngòng hëvör anāi yik töfëli: ngaich hē tarik nö ka-euilökūö nö chōholre tö peuheū, yĕh meuk, ṙòkhöre cha-a ngaich nöng kupah.

³⁶Kiröönngöre ngaich ök rācha aṅ Asīriā ang Senakerip, ngaich havantöre, ngaich iyöng Ninēvē.

³⁷Ngaich ngö inlahen angū-ö hē ò nö salām tēv nö el patī ök tēv re Nīsròk, ngaich ang Atrāmmelek, Sareser inrē nö sapngen ò nö aṅtī tö sanët: meutngö cha-a ngaich nö ip panam Ararat. Hayöng ngaich nö ṙënngen ò ök kikōnyö kūön ò Ēsarhattön.