Read Car_Nicobarese 2 RĀCHA 2 Bible Online

2 RĀCHA 2 - Car_Nicobarese bible

2 RĀCHA 2

¹Ngaich ngö inlahen angū-ö hē ngam Mā Tēv nö kēlen Ĕlaicha nö el halīöngö nö löklö ël lamfeui kuföt, ngaich Ĕlaicha nö kiröönngöre nö holten Ĕlaisa nö ṙā-ang Kilkāl.

²Ngö ṙô ngaich Ĕlaicha tö Ĕlaisha, Vë-ekūö meh chin, höngngöh man ihih; tön tīnngen chu An ngam Mā Tēv tölngö Pētĕl. Ngö ṙô ngaich Ĕlaisha, Sā ngam Mā Tēv nö tö-aṅ, sā ngam nômö meh inrē nö tö-aṅ, hö-ö chin hòṅ ṙāngen meh. Lökten cha nö kiröönngöre nö chuh Pētĕl.

³Ngaich yik kikōnyö kūön yik pròfĕt yik mī-i Pētĕl nö yihtöre nö in Ĕlaisa, nö ngö ṙô tö ò. Akahalōn öm kan tö ngam Mā Tēv min nö kēngö ngam yöng meh nö ṙā-ang i kuö meh töngamuh? Ngö ṙô ngaich anga-aṅ, Hòṅ, Akahalōn chin tö e, uh yin ṙô-òv.

⁴Ngaich Ĕlaicha nö ngö ṙô tö ò, Ĕlaisa, Vë-ekūö meh chin, höngngöh man ihih; tön tīnngen chu An ngam Mā Tēv öich chuh Yērikō. Ngaich ngö ṙô anga-aṅ, Sā ngam Mā Tēv nö tö-aṅ, sā ngam nômö meh inrē nö tö-aṅ, hö-ö chin hòṅ ṙāngen meh. Lökten cha nö yih nö i Yērikō.

⁵Ngaich yik kikönyö kūön yik pròfĕt yik mī-i Yērikō nö haröhtöre nö in Ĕlaisa, nö ngö ṙô tö ò, Akahalōn öm kan tö ngam Mā Tēv min nö kēngö ngam yöng meh nö ṙā-ang i kuö meh töngamuh? Ngaich sapṙô cha anga-aṅ nö ngö ṙô, Hôṅ, Akahalōn chin tö e; uh yin ṙô-òv.

⁶Ngaich ngö ṙô Ĕlaicha tö ò, Vë-ekūö meh chin, höng ngöh man ihih; tön tīnngen chu An ngam Mā Tēv öich chuh Yôtön. Ngaich ngö ṙô anga-aṅ, sā ngam nômö meh inrē nö tö-aṅ, hö-ö chin hòṅ ṙāngen meh. Nëtre taka cha-a ngaich nö kiröönngöre.

⁷Kiröönngöre inrē yik tötaneui anāi tarik kikōnyö kūön yik pròfĕt, söktöhëch ngaich nö marôvat nö kamten cha: ngaich nët tak cha-a nö sökhak nö i Yôtön.

⁸Ngaich Ĕlaicha nö kē ök kinṙumre, lömö e ngaich, ngaich foh ël ök mak harēvö ngaich angū-ö lāhih lāmū-a inrē nö nyôngö lökten cha nö havāngngöre nö lök el tönyô tumlat.

⁹Ngaich ngö inlahen angū-ö, hē cha nö ngaich nö havāngngöre, tö Ĕlaicha nö ngö ṙô tö Ĕlaisa, Havëkö ap tī chu man in meh, urēhĕkūö kinëngö chu ṙā-ang in meh. Ngaich ngö ṙô ang Ĕlaisa, Vë-ekūö meh chin, hökngen öp ma-alaha re man yēḵ nö nët nö in chu.

¹⁰Ngaich ngö ṙô anga-aṅ, Yaha kanihngen havëka man: ngaich pöri yĕh, yē meh meūkö chu kē-ĕyö ṙā-ang in meh, ngatī min angū-ö yēḵ nö in meh; yĕn rö-ö pöri, ngaich öt ngatī angū-ö min.

¹¹Ngaich ngö inlahen angū-ö, hē cha nöng iṙūöhöröön nö kiröönngöre, nöng vë-ekūöre, ngaich meūkö ök inröl tameūyö, kōra inrē tameūyö nuk mahaköhngen cha tö höö, yônlö ngaich Ĕlaicha nö el halīöngö nö löklö ël ök lamfeui kuföt.

¹²Meūkö e ang Ĕlaisa, ngaich pōitô anga-aṅ nö ngö, Yöng chu, Yöng chu, minë inröl aṅ Israĕl tö më tarik i uk kōra! Öt meūkö ò ngaich anga-aṅ: Kētötīre ngaich anga-aṅ nö i nuk inyut re, tikāichngö u ngaich nö nëttit.

¹³Kē ök kinṙum Ĕlaicha anga-aṅ inrē ök tösukngöre nö ṙā-ang in ò ngaich kiröönngöre nö havan, sökhak ngaich nö i taseū kui Yôtön.

¹⁴Kē ök kinṙum Ĕlaicha ngaich anga-aṅ ök tösukngöre nö ṙā-ang in ò, ngaich foh ël nuk mak, nö ngö ṙô, Isuh ap Mā Tēv, öp Tēv Ĕlaicha? Ngaich hē ò inrē nö keuheūtö tī nö foh ël nuk mak harēvöre ngaich anū-ö ihī-a umū-a inrē: havāngngöre ngaich ang Ĕlaisa.

¹⁵Ngaich hē yik kikōnyö kūön yik pròfĕt yik mī-i Yērikō nö meūkan nö kamten ò, ngö ṙô cha-a, Ngaich ap ma-alaha Ĕlaicha nö teungtöre nö in Ĕlaisa. Ngaich yihtöre cha-a nö höngkūö ò, sōntöre cha-a ngaich nö el tumlat nö i kūö ò.

¹⁶Ngö ṙô ngaich cha-a tö ò, Yĕh meuk; taneui anāi yip tökalēḵ tarik in vē kūön meh; vë-ekūö meh in, hökngen cha yĕh nö kiröönngöre nö chöh öp yöng meh: tön lohten öp ma-alaha aṅ im Mā Tēv nö kēlen ò, ngaich kavalngen ò nö i kui öp yô-òv rôngö, hēk inrē el öp yô-òv achāṙö. Ngaich ngö ṙô anga-aṅ tö cha, Uh yin tīnhānga.

¹⁷Ngaich hē cha nö mileūchen nö in ò sirōngkūö ngaich anga-aṅ, ngaich ngö ṙô, Tīnhanga ngaich. Lökten cha ngaich nö tīnngö tarik taneui anāi; lūöi sumkam cha-a ngaich nö chöh, öt kôtökūö pöri tö ò.

¹⁸Havan cha-a ngaich nö in ò, hē ò nö ṙòngmö höngngöh nö i Yērikō; ngö ṙô ngaich anga-aṅ tö cha, Röh öich tö ūhuv ṙô tö yīö kiröönngöre?

¹⁹Ngaich yik tarik aṅ ngam elpanam nö ngö ṙô tö Elaisa, Yĕh meuk, vë-ekūö meh in, löökö chūök ṙanā-aṅ ön ngih elpanam sā mat ngam mā chu nö meūkö e: hö-ö pöri ngam mak nö kòlô, ngam tumlat inrē nöng laròkköti aṅkūö.

²⁰Ngaich ngö ṙô anga-aṅ, Kētö hanòk mak in chu hĕng tufömngöre, chaplö sāl ël e inrē. Kētö e cha-a ngaich nö in ò.

²¹Kiröönngöre ngaich anga-aṅ nö ik löknyö mak nö hëmnyi, ngaich suktö sāl nö ël e, nö ngö ṙô, Ngö ṙô An ngam Mā Tēv, Ngaich chin lööken tī tö në mak; töngamuhhāngen min nö öt kinpahavö hēk inrē öt larôka ṙòng chōn.

²²Lööken ngaich nup mak söl ing töngamuh, sā ök ṙô Ĕlaisa nö ṙô-òv.

²³Ṙā-ang umuh ngaich anga-aṅ nö chuh Pētĕl: ngaich hē ò nö peūlöre nö löklö el talöökö, yihtöre ngaich yik kun nyīö nö in ò nö ṙā-ang im el panam, ngaich hayëḵngen ò, nö ngö ṙô tö ò, Yônlöre man më-eṅ töngānyö kui; Yônlöre man më-eṅ töngānyö kui!

²⁴Tēk uk re ngaich anga-aṅ ngaich meūkö cha, rūtngövah cha ngaich anga-aṅ nö i minë-eny ngam Mā Tēv. Chalôkötī ngaich nuk tö nët nòng kan për nö ṙā-ang el inchōn, chiṙës yik nyīö ngaich töfën anāi nët tum taka.

²⁵Ṙā-ang umuh ngaich anga-aṅ nö chuh ip Rôngö Kārmel, ṙā-ang umuh ngaich anga-aṅ nö havantöre nö i Samariā.