Read Car_Nicobarese 2 RĀCHA 20 Bible Online

2 RĀCHA 20 - Car_Nicobarese bible

2 RĀCHA 20

¹I nuk sakāmö anū-ö ang Hësikiā nö vahavö nö hòṅ kapah. Ngaich yihtöre nö in ò ök pròfĕt Isayā kikōnyö kūön Amôs, ngaich ngö ṙô tö ò, Ngö ṙô an ngam Mā Tēv, Halēnngö ngam patī re man; tön kapah man min, öt aṅ inrē.

²Ngaich anga-aṅ nö havööngö kūöre nö i kaha patī, ngaich vë-ekūö ngam Mā Tēv, nö ngö ṙô,

³Ō Mā Tēv, vë-ekūö meh chin, köpölōn tö chu ngaich lök i kūö meh holtö kanô-en töteung ellōn inrē, ngaich keuheūten tö nup tölöök nö ikūö meh. Kihīök kūö ngaich Hësikiā nö peuiny.

⁴Ngaich ngö inlahen angū-ö, urēhĕkūö kunnyīnyö Isayā nö ellōn ngam elpanam, ngam ṙô ngam Mā Tēv nö yih nö in ò, nö ngö ṙô,

⁵Havanritre man, ngö ṙô tö Hësikiā ap rācha vē tarik chu, Ngö ṙô An ngam Mā Tēv, ngam Tēv Tāvit ök yöng meh, Ngaich chin hang ṙô meh vë-ekūö chu, meuk nuk mak mat meh chin: Yĕh meuk, lööken man tö tī chu: ip linūöi sumkam man min chuh el patī ngam Mā Tēv.

⁶Ngaich chin min ṙūöten sakāmö meh nö taneui sīön samyeūheu; ṙānyen meh chin min inrē tö ngih elpanam ṙā-ang eltī ap rācha aṅ Asīriā; pò chu min laklö ngih elpanam nö pòkūö chu, pòkūö ök tarik chu inrē Tāvit.

⁷Ngaich ngö ṙô ang Isayā, Kēḵ ap tömën man ṙòng anychīr. Kēḵ cha-a, ngaich hapātö e ngaich nö i kūö ök seh, lööken ngaich anga-aṅ.

⁸Ngö ṙô ngaich Hësikiā tö Isayā, Asuh ap min minkahngö tī ngam Mā Tēv nö lööken tī tö chu, tö chu min inrē chuh el patī ngam Mā Tēv ip linūöi sumkam?

⁹Ngaich Isayā nö ngö ṙô, Ngih ön min minkahngö nö in meh aṅ im Mā Tēv, tö ngam Mā Tēv min nö la-evṙen tö ngam ṙô ò; kū-ötö lā kūö ang min ngam nyat nö söm vanāng heūlritre ṙöng nö söm vanāng?

¹⁰Ngaich sap ṙô ò Hësikiā, Lööṙen an ngam nyat nö söm vanāng nö rūöngö; hö-ö, hökngen ngam nyat pöri nö söm vanāng nö heūlritre.

¹¹Ngaich ök pròfĕt Isayā nö vë-ekūö ngam Mā Tēv; ngaich havanrit ngam nyat anga-aṅ nö söm vanāng, ngam lökngö e nö kū-ötö lataṙeūḵ nö ik vanāngö Ahas.

¹²Hē e Merōtakpālatön, ök kikōnyö kūön Pālatön, rācha aṅ Pēpilön, nö söömtö nuk tökūichö līpöre, raneushö Hësikiā inrē; pò ò nö hāngö Hësikiā nö vahavö.

¹³Hang ṙô cha ngaich Hësikiā, ngaich hameukhömat cha tö nuk patī chūök nuk töpōi ṙāi chehen ò, rupīö, humlum, tötahūsa, töpōi ṙāi tavī-i, ök patī inrē chūök nuk lanaklö ò, ṙòkhöre inrē nup töng aṅ nuk chūök rupīö: öt töt hamuktuvö tö Hësikiā, nö in cha nuk aṅ öp patī ò aṅ ngam pūlngö ò inrē nö ṙòkhöre.

¹⁴Ngaich yih ök pròfĕt Isayā nö ik rācha Hësikiā, ngaich ngö ṙô tö ò, Asuh ap ṙô vē tarik? Ṙamā-ang yih ach inrē nö yih nö in meh? Ngö ṙô ngaich ang Hësikiā, Yih yin nö ṙā-ang ap tömarôvat panam, ṙā-ang Pĕpilön.

¹⁵Ngö ṙô ngaich anga-aṅ, Asuh ap maheuṅk cha nö el patī meh? Ṙòkhöre nup aṅ ap patī chu nö meūkö tö cha, ṙô Hësikiā nö sapṙô: öt hĕng hang i nuk chehen chu töt hameuktu nö in cha tö chu.

¹⁶Ngö ṙô ngaich Isayā tö Hësikiā, Hangihtöre tö ṙô ngam Mā Tēv.

¹⁷Yĕh meuk, yih nup sakāmö, hē nup el ngam patī meh, anū-ö inrē nup hamūllö yik yöng meh nö el chūök chehen söl ing töngamuh, nö kē-ĕyö min nö i Pĕpilön: öt hĕng tit min töṙātu, tö ṙô ngam Mā Tēv.

¹⁸Yip kikōnyö kūön meh min lamöknyö in meh, yip tökayônyu nö löknyö in meh, kē-ĕyö min cha-a tö cha; ngaich cha-a mīnö nö kumkantöre nö el ap patī rācha i Pĕpīlön.

¹⁹Ngö ṙô ngaich Hësikiā tö Isayā, Tölöök an ngam ṙô ngam Mā Tēv ngam ṙô meh. Ngö ṙô anga-aṅ inrē, Röh öng nö ngatī, yĕn lanāmu min kanô-en inrē i në sakāmö chu?

²⁰Në la-en Hësikiā, nuk kumlēḵ ò inrē, tī ò inrē nö vīlö inchūökngö mak, talöökö mak inrē, nö hataichhöt ngam mak nö el ngam elpanam, röh nuk nö kūichi nö i mat nuk Līpöre Kinṙötngö yik Rācha aṅ Yūtā?

²¹Haṙòh ngaich Hësikiā nö in yik muvöhngöre: hayöng ngaich Manasē nö ṙënngen ò, ök kūön ò kikōnyö.