Read Car_Nicobarese 2 RĀCHA 21 Bible Online

2 RĀCHA 21 - Car_Nicobarese bible

2 RĀCHA 21

¹Nëtsīön samyeūheu ṙēti Manasē hē ranulten ò nö hayöng; taneui anāi taneūi samyeūheu anga-aṅ nö hayöng nö i Yērusalem: Hafsipā minënyi ök yöng ò kikānö.

²Ngaich anga-aṅ nö ötlöökö la-en nö i kūö ngam Mā Tēv, nö sā nup sin-òkkūö aṅ in yip tahëng mihëṅṙö, yik tö-ahōṙi tö ngam Mā Tēv nö i kūö yik kūön Israĕl.

³Pò ò nö hēk nö vīlö nup lātulöng chūökö nup piyāingö ök yöng ò Hësikiā; asöklö nuk tahāklö Pē-al inrē anga-aṅ, ngaich inrē nö hĕng höl nö vī Asērā nö sā tī Ahap ök rācha aṅ Israĕl, ngaich inrē nö salām nup el halīöngö töpōyen, lök la-en u inrē.

⁴Vīlö tahāklö anga-aṅ inrē nö el patī ngam Mā Tēv, ngam chūök ṙô ngam Mā Tēv nö ngö, Ṙātö öp minë-enyre chin min i Yērusalem.

⁵Vīlö tahāklö nup tömaṙôngö anga-aṅ el halīöngö nö el nup tönët elmilūkö ngam patī ngam Mā Tēv.

⁶Vīten ök kūön re anga-aṅ kikōnyö inrē nö tūön kūö tameūyö, ngaich harūnöre inrē nö milūönö, hachū inrē ngaich vīlö tömilūönö mameuk ma-alaha, hanôl yik vamīngen inrē: pōyen nuk la-en ò tötlöök nö i kūö ngam Mā Tēv, nö harunnyö lanīnö ò.

⁷Asöklö öp insā Asērā anga-aṅ nö el ök patī ök chūök ṙô ngam Mā Tēv nö in Tāvit in ök kūön ò inrē Sòlòmön nö ngö ṙô, El ngih patī, i Yērusalem inrē ngam katöllö chu nö ṙā-ang i miyöngö Israĕl nö ṙòkhöre, in e tī chin min ṙātö ngam minë-enyre nö örheūheu:

⁸Öt rēhĕn chin min vītö röön Israĕl nö lō-ongkūö nö hēk nö ṙāngö ngam panam, ngam kahëtö chu in yik yöng cha; yē cha öre nö hōḵ nö haköpkö nup tösā nup taṙòkhöre tinöölô cha tö chu, sā nup chöngö inrē nö ṙòkhöre tinöölô cha tök tarik chu Môsös.

⁹Hö-ö pöri cha-a nö hang: ngaich Manasē nö haṙöingen cha nö la-evṙen tö ngam tötlöök nö samötlöng tö yip pumnāmö tarik, yik töpiyāyi tö ngam Mā Tēv nö i kūö yik kūön Israĕl.

¹⁰Ngaich ngö ṙô ngam Mā Tēv nö ṙô-òv nö lökten in yik tarik re pròfĕt,

¹¹Kūö Manasē öp rācha aṅ Yūtā nö la-evṙen tö në sin-òkkūö, ngaich inrē nö samötlöng öt lanöökö la-en tö yip aṅ Amôr, yik mu-urĕh tö ò, ngaich vīten Yūtā inrē nö köölö fālen nö i nup insā tēv ò.

¹²Lökten An ngam Mā Tēv nö ngö ṙô, ngam Tēv Israĕl, Yĕh meuk, kētö töngatī chin tötlöök i kui Yērusalem Yūtā inrē, ngaich öp töng hamang min nö kāthöt el nang nö āṅngöre lā-a.

¹³Ngaich chū-ö min lökngö kui Yērusalem tī tö ngam töteut aṅ Samariā, ngam kinlahkūö panam aṅ patī Ahap: ngaich chū-ö min sichngen Yērusalem sā tī tarik nö sich el töchilū pingāṅl, sichlö e ngaich afāttökūö e.

¹⁴Ngaich chū-ö min kavalngö yip chööḵṙen aṅ ngih amin chu, ngaich kēten cha nö eltī yip lā-al cha;

¹⁵Pò cha nö ngaich nö la-evṙen tö tötlöök nö i kūö chu, ngaich inrē nö harunnyö lanīnö chu, löktökūö ök sakāmö yik yöng cha nö kunyī-inyre nö ṙā-ang Aikup, söl i ngih sakāmö.

¹⁶Kitaknyö mahām töt fāluṙen ang Manasē inrē nö pōi höiny, hanöng saha tī ò nö tööḵlö tī tö Yērusalem löktökūö im manā-angkūö e söl im tahëng: nö holre tö nup tökööl ò nup tī ò nö vīten Yūtā nö köölö fālen, nö la-evṙen nö ngaich tö ngam tötlöök nö i kūö ngam Mā Tēv.

¹⁷Nup la-en Manasē, ṙòkhöre nup tī ò inrē, tök tökööl ò nö köölö fālen, röh nuk nö kūichiyö nö i mat Līpöre Kinṙötngö yik rācha aṅ Yūtā?

¹⁸Haṙòh ngaich ang Manasē nö in yik yöng re lāpi ngaich nö el ök panô-òṅ ip patī ò takô, el panô-òṅ Usā; hayöng ngaich ök kikōnyö kūön ò Amön nö ṙënngen ò.

¹⁹Nët anāi nët samyeūheu ṙēti ang Amön hē ranulten ò nö hayöng: nët samyeūheu anga-aṅ nö hayöng nö i Yērusalem. Māsūlemet minënyi ök yöng ò kikānö kūön Harus aṅ Yòtpah.

²⁰La-evṙen anga-aṅ tö tötlöök nö i kūö ngam Mā Tēv, nö sā ök yöng re Manasē.

²¹Lök el nup taṙòkhöre talöökö ök yöng re anga-aṅ lök la-en insātēv i lahök ök yöng ò, salāmö u inrē:

²²Ṙāngö ngam Mā Tēv anga-aṅ ngam Tēv yik yöng ò, ngaich rö-ö nö lök el talöökö ngam Mā Tēv.

²³Ngaich yik tarik Amön nö hol ellōn re nö ahôngen ò, ngaich kumpah ök rācha nö el ök patī.

²⁴Ngaich pöri yik tarik aṅ ngam panam nö fëlngen cha nö ṙòkhöre yik hamòllōnre nö lāḵlö ök rācha Amön; vīlen Yôsiā ngaich yik tarik aṅ ngam panam ök kūön ò kikōnyö nö ṙënngen ò nö rācha.

²⁵Nuk la-en Amön kahëken ò, röh nuk nö kūichiyö nö i mat Līpöre Kinṙötngö yik Rācha aṅ Yūtā?

²⁶Lāpi ngaich anga-aṅ nö ik kui kupah ò el panô-òṅ Usā: hayöng ngaich Yôsiā ök kikōnyö kūön ò nö ṙënngen ò.