Read Car_Nicobarese 2 RĀCHA 22 Bible Online

2 RĀCHA 22 - Car_Nicobarese bible

2 RĀCHA 22

¹Hëvhör samyeūheu ṙēti ang Yôsiā hē ranulten ò nö hayöng ngaich anga-aṅ nö lūöi anāi kahuk samyeūheu nö hayöng nö i Yērusalem: Yetitā minënyi ök yöng ò kikānö kūön Atayā aṅ Pòkat.

²Ngaich anga-aṅ nö la-evṙen tö tölöök nö i kūö ngam Mā Tēv, lök el nuk talöökö Tāvit inrē ök yöng ò, öt kānkö lāhāmö inrē hēk lātavē.

³Ngaich ngö inlahen angū-ö im hinëvhör sīön samyeūheu Yôsiā nö rācha, ngaich ngam rācha nö tīnngen Safan ök kikōnyö kūön Asaliā, ök kikōnyö kūön Mēsulam, ök kamūich, nö el patī ngam Mā Tēv, nö ngö ṙô,

⁴Kuṙòh chuh in Hilkiā man öp mākūö kūönṙô, hòṅ ò nö kaheuk nup tökētu nö el ngam patī ngam Mā Tēv, nup hamūl yip yōm kūö inkūp nö in yip tarik:

⁵Ngaich hökngen cha nö kēten u nö eltī yip töla-evṙen tarik yip mameukken ngam patī ngam Mā Tēv: ngaich hökngen cha nö kēten u nö eltī yip töla-evṙen tarik yip el patī ngam Mā Tēv, nö vamītit nup manëngö im patī;

⁶In yip töhuveū nö vī chōn, in yip mamānö, in yip ṙamāḵ ihong inrē: nö ṙāi invaha savaich töfāsö ihong inrē nö vinītit ngam patī.

⁷Hö-ö pöri cha-a nö āṅhaṅvin tö ṙôken nup rupīö in cha nuk tökētu nö eltī cha; pò cha nö öt michūṙen.

⁸Ngaich Hilkayā ök mākūö kūönṙô nö ngö ṙô tö Safān ök kamūich, Kôtökūö chin töp lipöre chöngö nö el patī ngam Mā Tēv. Ngaich Hilkayā nö kētök līpöre nö in Safān, vë-ekūö e ngaich anga-aṅ.

⁹Ngaich ang safān ök kamūich nö yihtöre nö ik rācha, ngaich kumtö ṙô nö hēk nö ik rācha, nö ngö ṙô, Ahatnyö nup rupīö yip tarik taheui nup tökôti nö el ngam patī, ngaich kēten u nö eltī yip töla-evṙen tarik yip mameukken ngam patī ngam Mā Tēv.

¹⁰Ngaich Safān ök kamūich nö ve-eny nang ök rācha, nö ngö ṙô, Kētö līpöre ap Hilkayā ap kūönṙô nö in chu. Vë-ekūö e ngaich Safān nö i kūö ök rācha.

¹¹Ngaich ngö inlahen angū-ö, hē ök rācha nö hang nuk ṙô aṅmat ngam līpöre chöngö, tikaichngö inyut re ngaich anga-aṅ.

¹²Ngaich ök rācha nö tölṙô Hilkayā ök mākūö kūönṙô, Ahikam inrē ök kikōnyö kūön Safān, Akpōr inrē ök kikōnyö kūön Mikāya, tö Safān inrē ök kamūich Asayā inrē ök tarik ök rācha, nö ngö ṙô,

¹³Kuṙòh, hatöntöre yin im Mā Tēv öi ṙënngô chu, ṙënngô vē tarik, ṙënngô Yūtā inrē nö ṙòkhöre tö inlahen nup ṙô ngih līpöre ngih tökôti: tön kiröng an ngam lanīnö ngam Mā Tēv nö in hī, pò yik yöng hī nö öt hang në ṙô ngih līpöre, nö la-evṙen tö nup tökūichiyö inlahen hī.

¹⁴Lökten ang Hilkayā ök kūönṙô, Ahikam, Akpōr, Safān, Asayā inrē nö chuh in Hultah ök pròfĕt kikānö, ök pīhö Salum kikōnyö kūön Tīkvah, ök kikōnyö kūön Harhās, yōm inyut; (i yöng ël Yērsalem ök kikānö el öp innëtö elyöngö); ngaich cha-a nö vë-ekūö ò.

¹⁵Ngö ṙô ngaich anga-aṅ tö cha, Ngö ṙô An ngam Mā Tēv, ngam Tēv Israĕl: Vë-eny nang ap tarik yin ap tamīnten yīö in chu,

¹⁶Ngö ṙô An ngam Mā Tēv, Yĕh meuk, kētö tötlöök chin min i kui ngih chūökö, i kui yip aṅ e inrē, tö nup ṙô ngam līpöre nup tö ngaich nö vë-evkūö tö ngam rācha aṅ Yūtā:

¹⁷Pò cha nö ṙāngen chu, ngaich föng tötahūsa nö i tahëng tēv pò cha nö hòṅ harunnyö tanānyö chu nö in nup la-en kuntī cha nö ṙòkhöre; lökten an ngam lanīnö chu nö hūlö kūö min nö i ngih chūökö, hö-ö an min nö nyangngö kūö.

¹⁸Ip rācha pöri aṅ Yūtā, ap tamīnten yīö hatöntöre im Mā Tēv, ngö ṙô pöichö tö ò, Ngö ṙô An ngam Mā Tēv, ngam Tēv Israĕl: I inlahen nup ṙô nup ahang meh,

¹⁹Pò meh ayālö ellōn, ngaich öm hayāichngöre i kūö ngam Mā Tēv, hē meh hang ök ṙô chu lā-al kūö ngih chūökö, lā-al kūö yip aṅ e inrē, hòṅ cha min nö pinngangkūö rinūtngövah inrē, ngaich inrē me-eṅ tikachngö inyut re, peuiny inrē öm i kūö chu; hang ṙô meh chin chū-ö inrē,ngö ṙô ngam Mā Tēv.

²⁰Lökten, yĕh meuk, hamūlten meh chin min in yik yöng meh, hamūli man min inrē el anūlö re im kumchikṙen, öt rēhĕn nup min mat meh nö meuk nup tötlöök kahëtö chu min i kui ngih chūökö. Ngaich cha-a nö kumtö ṙô nö hēk nö ik rācha.