Read Car_Nicobarese 2 RĀCHA 23 Bible Online

2 RĀCHA 23 - Car_Nicobarese bible

2 RĀCHA 23

¹Tīnhanga ngaich ök rācha ngaich cha-a nö hamūlten yik mā aṅ Yūtā nö in ò aṅ Yērusalem inrē.

²Chuh el patī ngam Mā Tēv ngaich ök rācha, ṙòkhöre inrē yik tarik aṅ Yūtā ṙòkhöre inrē yik aṅ Yērusalem nö hol ò, yik kūönṙô pròfĕt, ṙòkhöre inrē tarik, hĕnghöre tökūönö tökiröng inrē: ngaich anga-aṅ nö ahangnyö nuk ṙô ngam lipöre kinlēḵngô nö el nang cha ngam tökôti nö el ngam patī ngam Mā Tēv.

³Sökhaka ök rācha nö i kaha machööḵlö, ngaich i kūö ngam Mā Tēv nö kilēḵngôre, nö tömrit ngam Mā Tēv, haköp nup chöngö ò inrē, nup tökô-en inrē töhameuktu, nup chöngö inrē töhameuktu, nup chöngö inrē tökūichiyö, nö keuheūttö ellōn re, keuheūttö nômö re, nö haköpngö nup ṙô ngam kinlēḵngô nuk tökūichiyö nö i mat ngih līpöre: ṙòkhöre ngaich yik tarik nö sökhaka nö im kinlēḵngô.

⁴Ngaich ök rācha nö tölṙô Hilkayā ök mākūö kūönṙô, tö yik kūönṙô inrē yik ṙanët mitöökö, tö yik yōm kūö inkūp nö kēnyö chūökṙen nö ṙā-ang el ngam Töhet chūök ngam Mā Tēv, nuk tövī-i nö chūökṙen Pēal, chūökṙen Asēra, chūökṙen nup el halīöngö inrē töpōyen: föngngö u ngaich anga-aṅ nö lā-uk Yērusalem el nup kahôyö Kitrōn, ngaich kēngö nup tisum u nö i Pētĕl.

⁵Ngaich anga-aṅ nö ṙāngen yik kūönṙô vame-eṅkūö insātēv, yik vahīlö yik rācha aṅ Yūtā nö föng tötahūsa nö i nup tömaṙô-òl chūök i nup elpanam i Yūtā, i nup chūökö inrē tö vinngö nö i Yērusalem; cha-a inrē yip famög tötahūsa nö in Pē-al, im tavūöi, im chingëṅt, i nup tönët sīön minkahngö, i nup el halīöngö inrē töpōyen.

⁶Ngaich anga-aṅ inrē nö kēnyö ök Asērā nö ṙā-ang el ngam patī ngam Mā Tēv, nö lā-uk Yērusalem, ip kun töhëm mak Kitrōn, ngaich föngngen u nö ip kun töhëm mak Kitrōn, ngaich sōngan nö pihīöyi, ngaich tūingö nuk töpahīöya nö i kui anūlö töng tarīka.

⁷Ngaich anga-aṅ nö tiṙölngö nuk patī yik chamô-òṅ kōiny, nuk el ngam patī ngam Mā Tēv, i chūök yik kikānö nö kupāti hilā ranangngö kūö Asērā.

⁸Kēnyö yik kūönṙô anga-aṅ nö ṙā-ang nuk elpanam Yūtā, ngaich hachōich ngö nuk tömarô-òl chūök i chūök yik kūönṙô nö föng tötahūsa, löktökūö Kīpā söl Pīrsipa; tiṙōlngö nuk tömarô-òl chūök anga-aṅ i nup inkūp nuk ik inkūp lökhöt Yôsuā ök mahayöng ngam elpanam, nuk lātavē tarik nö im inkūp ngam elpanam.

⁹Hö-ö pöri yik kūönṙô nuk lamātulöng chūökö nö yihtöre nö im tahāklö ngam Mā Tēv i Yērusalem, höng nyā rôti pöri cha-a töt aföhlöng nö in yik holre.

¹⁰Chōichngen Tôfĕt, anga-aṅ inrē nö el ök el-achāṙö yik kūön Hinôm pòn sōtö tarik nö vīten kūön re tö kikōnyö hēk kikānö nö tūön kūö tameūyö nö chuh in Mōlek.

¹¹Kēngö nuk kōra inrē anga-aṅ nuk tī yik rācha aṅ Yūtā kinë-eṅkūö ngam tavūöi, i lökhöt im patī ngam Mā Tēv, ranghö öp urôhò Nātanmelem öp yōm urôhò, i manā-angkūö; föngngö nuk inröl ngam tavūöi anga-aṅ nö i kūö tameūyö.

¹²Nup tahāklö inrē nup mī-i kui ök lātulöng urôhò Ahas,nuk vahīlö yik rācha aṅ Yūtā, nuk tahāklö inrē vahīlö Manasē el nuk tönët elmilūkö ngam patī ngam Mā Tēv, tötiṙōli tö ngam rācha kiṙöpi anū-ö nö ṙā-ang umuh, ngaich tūyi nup pitung nö el öp kun töhëm mak Kitrōn.

¹³Tö nuk tömarô-òl chūök lakūö Yērusalem inrē, nuk lāhāmö ngam rung nö tiṙōli, nuk vahīlö Sòlòmön rācha aṅ Israĕl nö mānlö chūök Astôret öp sin-òkkūö aṅ Sītōn, chūök Kimòs inrē ap sin-òkkūö aṅ Mô-āp, chūök Milkōm inrē ök sin-òkkūö aṅ in yik kūön Amön, töhachōchiyö tök rācha.

¹⁴Likölngö nuk insā inrē anga-aṅ nö pinyënyi, ngaich kūölngen Asērim, ngaich hatööḵöl nuk chūöktit tö tangëḵ tarik.

¹⁵Hēk inrē ap tahāklö i Pētĕl, tö ök lātulöng chūök vahīlö Yērōpoām ök kikōnyö kūön Nēpòt, ök vamīten Israĕl nö köölö fālen, angū-ö inrē tahāklö tök latūlöng chūök inrē tö tiṙōli tö ò; föngngö nuk lātulöng chūök anga-aṅ inrē sōngen u ngaich nö pihīöyö, föngngen Asērā inrē.

¹⁶Ngaich hē Yôsiā nö havöökūöre ngaich meuk nup chūök lināpngö kupah anga-aṅ in ök rung; tīnhanga ngaich anga-aṅ, ngaich kē nup tangëḵ el anūlö, föngngö u ngaich nö el ök tahāklö, ngaich hachōichngö e, sā ök ṙô ngam Mā Tēv ök ahangnyö ök tarik ngam Mā Tēv, ök ma-ahangnyö në.

¹⁷Ngaich ngö ṙô anga-aṅ, Inköpkölōn yòh öng ngam maheuṅt chu? Ngaich vë-eny nang ò yik tarik aṅ ngam elpanam, Anūlö ök tarik ngam Tēv an, ök yamih nö ṙā-ang Yūtā nö ahangnyö në tī meh lā-alkūö ngam tahāklö Pētĕl.

¹⁸Ngaich ngö ṙô anga-aṅ, Hökngen ò; un tarīkuvö kamëngö nuk tangëḵ ò. Lökten cha nö hökngen nup tangëḵ ò, nö holtöṙah nuk tangëḵ ök pròfĕt yamih nö ṙā-ang Samarīa.

¹⁹Kē-ĕyö inrē tö Yôsiā nuk patī i nuk lātulöng chūök i Samariā in nuk elpanam, nuk vahīlö yik rācha Israĕl nö harunnyö lanīnö ngam Mā Tēv, ngaich anga-aṅ nö sā tī vē tö u nö ṙòkhöre nuk i Pētĕl.

²⁰Fëlngö yik kūönṙô anga-aṅ nö ṙòkhöre nö el nuk tahāklö yik yōm nuk lātulöng chūök, ngaich föngngö nuk tangëḵ yik tarik anga-aṅ nö ël u; havāntöre ngaich anga-aṅ nö i Yērusalem.

²¹Ngaich ök rācha nö ngö ṙô, Haköpkö ngam pāska ngam Mā Tēv ngam Tēv yīö, sā kinūichngö e nö i mat ngih līpöre kinlēḵngô.

²²Öt töngatī-ivö pāska töhaköpkaṙen löktökūö nuk sakāmö yik ma-akah fālen mahayöngö Israĕl, öt rēhĕn i rô-òtö nuk sakāmö yik rācha aṅ Israĕl, öt rēhĕn in nuk sakāmö yik rācha aṅ Yūtā;

²³Höng ik hinëvhör sīön samyeūheu ök rācha Yôsiā ngih pāska nö haköpkaṙen nö im Mā Tēv nö i Yērusalem.

²⁴Hēk cha-a inrē yik mameuk ma-alaha yik tömilūönö inrē, tö nup tëraf,tö insātēv, ṙòkhöre inrē nup sin-òkkūö tömeūkö, nö im panam Yūtā, Yērusalem inrē, kavāliyö anū-ö tö Yôsiā, pò ò nö hòṅ haköpngö nup ṙô ngam Chöngö nup tökūichiyö nö i mat ngam līpöre ngam kanôtökūö ap kūönṙô Hilkāya nö el ngam patī ngam Mā Tēv.

²⁵Öt lamā urēhĕvkūö anga-aṅ tö rācha tö tösā ò, öp mahavöötökūöre nö i ngam Mā Tēv nö keuheūttö ellōn re, keuheūttö nômö re, keuheūttö kumlēḵ re inrē, asā nup chöngö Môsös inrē nö ṙòkhöre; öt rēhĕn nö lā-unôich ò chamôhòlre nö tösā ò.

²⁶Hö-ö pöri ngam Mā Tēv nö havööngökūöre tö ngam tökalēḵ tökiröng lanīnö ò, ngam töhūlö kūö lanīnö ò nö lā-alkūö Yūtā, kūö nuk inrunnyö lanīnö ò nö ṙòkhöre tö Manasē nö harunnyö lanīnö ò tö u.

²⁷Ngö ṙô ngaich ngam Mā Tēv, Hòṅ kēngen Yūtā chin inrē nö ṙā-ang i kūö chu, sātī chu ngaich kēngen Israĕl, kavalngö ngih chin min elpanam ngih katöllö chu, ngih Yērusalem, ngam patī inrē ṙô chu öich ngö, In e ap min minë-nyö chu.

²⁸Nup la-en Yôsīa, ṙòkhöre nup tī ò inrē, röh nup nö kūichiyö nö i mat Līpöre Kinṙötngö yik Rācha aṅ Yūtā?

²⁹I nuk sakāmö ò ang Fërō Nēkō ök rācha aṅ Aikup nö chuh ip töhël Yūfratīs nö lā-al ök rācha aṅ Asīriā: kiröönngöre ngaich Yôsīa nö lā-al ò: kapahatī ngaich anga-aṅ tö ò nö i Mekītō, hē ò nö meukkūö ò.

³⁰Ngaich pöri yik tarik ò nö kumten ò nö kapah nö el inröl nö ṙā-ang Mekītō, ngaich kēten ò nö i Yērusalem, lāpngen ò ngaich nö i kui kupah ò. Ngaich yik tarik ngam panam nö kē-ĕ Yēhō-āhas ök kikōnyö kūön Yôsīa, ngaich hacham kui ò, vīlen ò ngaich nö rācha nö ṙënngen ök yöng re.

³¹Nët anāi lūöi samyeūheu ṙēti ang Yēhō-āhas hē ranulten ò nö hayöng, ngaich lūöi chumngëṅtö anga-aṅ nö hayöng nö i Yērusalem: Hamutal minënyi ök yöng ò kikānö kūön Yarimiā aṅ Lipnā.

³²Ngaich anga-aṅ nö la-evṙen tö tötlöök nö i kūö ngam Mā Tēv, sā nuk la-en yik yöng ò tö ngaich.

³³Ngaich ang Fërō Nēkō nö nyëkngen ò nö i Riplah ip panam Hamat, pòn sōten ò nö hayöng nö i Yērusalem: ngaich vīten ngam panam nö kētö masūl hēngòng kinlaha ru pīö, hĕng kinlaha humlum,

³⁴Ngaich ang Fërō Nēkō nö vīlen Ēliākim ök kikōnyö kūön Yôsīa ök yöng ò, ngaich haṙīngö minë-eny ò nö Yēhōyakim: kēngen Yērōāhas pöri anga-aṅ; yih anga-aṅ ngaich nö i Aikup, ngaich kapah nö umuh,

³⁵Ngaich ang Yēhōyakim nö kētö pupīö, humlum inrē nö in Fërō; ngaich pöri anga-aṅ nö kētö nuk rupīö nö i ṙāī taṙeūḵ nö chöngö Fërō, hateung tīre anga-aṅ nö yik tarik aṅ ngam panam nö kē rupīö humlum inrē, sātī ngòh töhĕng tak tī anga-aṅ nö kē ṙāi kūö taṙeūḵ, nö kahëtö ò nö in Fërō.

³⁶Nët anāi taneui samyeūheu ṙēti ang Yēhōyakim hē ranulten ò nö hayöng; kahuk sīön samyeūheu anga-aṅ nö hayöng nö i Yērusalem: Sepītah minënyi ök yöng ò kikānö kūön Petayā aṅ Rumah.

³⁷Ngaich anga-aṅ nö la-evṙen tö tötlöök nö i kūö ngam Mā Tēv sā tī yik yöng re nö ngaich.