Read Car_Nicobarese 2 RĀCHA 24 Bible Online

2 RĀCHA 24 - Car_Nicobarese bible

2 RĀCHA 24

¹I nuk sakāsmö ò ang Nēpūketnēsör nö yih ök rācha aṅ Pēpilön, ngaich Yēhōyakim nö lūöi samyeūheu nö tarik ò: havööngökūöre ngaich anga-aṅ nö lā-alkūö ò nö ahôngen ò.

²Ngaich ngam Mā Tēv, nö tīntö lā-al ò tö yik kumyung aṅ Kāltī, aṅ Sīriā inrē, aṅ Mô-ap inrē aṅ in yik kūön Amön inrē, tīntu cha-a nö lā-al Yūtā nö ahatngö e, sā ngam ṙô ngam Mā Tēv, ngam ṙô ò nö löktö eltī yik tarik ò pròfĕt.

³Kô-en angū-ö nö yih nö i kui Yūtā i chöngö ngam Mā Tēv, nö kēngen cha nö ṙā-ang i kūö ò, kūö nuk tökööl Manasē, asā nup töngaichngen tī ò;

⁴Ane inrē kūö kintaknyö mahām töt akahaṙa; pò ò nö hatööḵlen Yērusalem tö mahām töt akahaṙa: ngaich ngam Mā Tēv nö öt hòṅ aṙē-ĕl.

⁵Nuk la-en Yēhōyakim, nuk tī ò inrē töngaichngen, röh nuk nö kūichi nö i mat Līpöre Kinṙötngö yik Rācha aṅ Yūtā?

⁶Haṙòh ngaich Yēhōyakim nö in yik yöngre: ngaich Yēhōiyāchin ök kikōnyö kūön ò nö hayöng nö ṙënngen ò.

⁷Ngaich ök rācha aṅ Aikup nö öt yih nö hēk nö ṙā-ang ip panamre: pò ök rācha aṅ Pĕpilön nö keuheūtlöre tī tö nuk panam ök rācha aṅ Aikup nö kē-ĕ u, löktökūö ök Kun Töhëm Mak i Aikup söl ip tahël Yūfratīs.

⁸Hëvhöre sīön samyeūheu ṙēti ang Yēhōiyachin hē ranulten ò nö hayöng; lūöi chumngëṅtö anga-aṅ nö hayöng nö i Yērusalem: Nēhusta minënyi ök yöng ò kikānö kūön Ēlnātan aṅ Yērusalem.

⁹Ngaich la-evṙen anga-aṅ tö tötlöök nö i kūö ngam Mā Tēv sā nuk la-en ök yöng ò nö ngaich.

¹⁰Hē e yik tarik Nēpūketnēsör ök rācha aṅ Pĕpilön nö yih nö i Yērusalem, havīlöngö ngam elpanam.

¹¹Yih ngaich ang Nēpūketnēsör ök rācha aṅ Pĕpilön nö im elpanam, hē yik tarik ò nö ṙònghöichṙen nö havīlen e;

¹²Ngaich Yēhōiyāchin ök rācha aṅ Yūtā nö kunyī-inyre nö ik rācha aṅ Pĕpilön, anga-aṅ tök yöng ò kikānö, tö yik tarik ò, tö yik kūön rācha tö yik kumkantöre inrē: hē ò nö hëvhöre samyeūheu nö hayöng, ök rācha aṅ Pĕpilön nö kē an.

¹³Ngaich anga-aṅ nö ṙā-ang umuh nö kēngö nuk töpōi ṙāi chehen aṅ ngam patī ngam Mā Tēv, nuk töpōi ṙāi chehen inrē aṅ el patī ök rācha, rökö nö pinyënyi nuk humlum chūökṙen nuk vahī Sòlòmön rācha aṅ Israĕl nö el patī ngam Mā Tēv, sā ṙô ngam Mā Tēv nö ngaich.

¹⁴Kē-ĕyö tö ò inrē nö ṙòkhöre yik aṅ Yērusalem, ṙòkhöre kūön rācha, ṙòkhöre inrē tö-eūnyu kumlēḵ tarik, söm köṅny yik tökē-ĕ nö hakövö, ṙòkhöre töhuveū-en kuntī tarik nö la-evṙen tö yik ramöm vët; öt hĕngtit tak tö ngöh, höng yik tö kô-òngrit nö yāich tarik aṅ ngam panam.

¹⁵Kē-ĕyö inrē Yēhōiyachin tö ò nö i Pĕpilön; ök yöng ök rācha inrē kikānö, tö yik pīhö ök rācha, tö yik kumkantöre, tö yik tökalēḵ tarik inrē aṅ ngam panam, kē-ĕyö tö ò nö ṙā-ang Yērusalem nö hakövö nö i Pĕpilön.

¹⁶Ṙòkhöre inrē yik tökalēḵ tarik, sat köṅny, yik töhuveū-en kuntī tarik inrē nö la-evṙen tö yik ramöm vët hĕng köṅny, ṙòkhöre cha-a nö tökalēḵ töhuveū-en inrē nö kiyung, cha-a tö kē-ĕyö tök rācha aṅ Pĕpilön nö hakövö nö i Pĕpilön.

¹⁷Ngaich ök rācha aṅ Pĕpilön nö vīlen Matanayā ök kahëm ök yöng ò nö rācha nö ṙënngen ò ngaich haṙīngö minënyö ò nö Sētikiā.

¹⁸Nët anāi kahuk samyeūheu ṙēti ang Sētikiā hē ranulten ò nö hayöng; kahuk sīön samyeūheu anga-aṅ nö hayöng nö i Yērusalem: Hamutal minënyi ök yöng ò kikānö kūön Yeremiā aṅ Lipna.

¹⁹Ngaich anga-aṅ nö la-evṙen tö tölöök nö i kūö ngam Mā Tēv, sā nuk tī Yēhōiyakim nö ngaich.

²⁰Teungtökūö angū-ö nö ngaich tö kūö lanīnö ngam Mā Tēv nö i Yērusalem i Yūtā inrē, hanöng saha tī ò nö kavalngen cha nö ṙā-ang i kūö ò. Ngaich ang Sētikīa nö ahôngö chöngö nö lā-al rācha aṅ Pĕpilön.