Read Car_Nicobarese 2 RĀCHA 25 Bible Online

2 RĀCHA 25 - Car_Nicobarese bible

2 RĀCHA 25

¹Ngaich ngö inlahen angū-ö im minchūötöre samyeūheu ò nö hayöng, im sinöm chumngëṅtö, im sinöm sumkam ngam chingëṅt, ang Nēpuketnēsör nö yih ök rācha aṅ Pĕpilön, ṙòkhöre yik kumyung nö in ò, lā-al Yērusalem, ngaich iyöngtöre nö lā-al e; havīlö e cha-a nö vīlö chūök kumyung nö lā-al e.

²Im kinhuksīön samyeūheu ök rācha Sētikiā ngam elpanam nö havīlöngö.

³Im minchūötöre sumkam ngam finënö chingëṅt ök inyāichö nö kalēḵ nö im elpanam, lökten yik tarik aṅ ngam panam nö öt nyā-aṅvkūö.

⁴Alongköṅny kaha ngaich ngam elpanam, ṙòkhöre yik tarik kumyung nö falngöre tö hatööm nö löknyö ik inkup ihôi nuk tönët ihong kinlēḵngô, nuk töröhta nö ik panô-òṅ ök rācha: (vinngö yik aṅ Kāltī nö lā-al ngam elpanam:) ngaich ök rācha nö kiröönngöre nö löknyö öp talöökö Arapā.

⁵Ngaich pöri yik kumyung aṅ Kāltī nö lūḵlörit ök rācha, kô-òl ngaich nö in ò i nup töṙā-akūö panam Yērikō: ṙòkhöre yik kumyung nö parāti tö ò (ṙāngen ò).

⁶Kēḵ ök rācha ngaich cha-a, ngaich kēten ò nö ik rācha aṅ Pĕpilön nö i Riplah; ngaich kahòkken ò cha-a.

⁷I kūö Sētikiā yik kikōnyö kūön ò nö fëli tö cha, pīôknyu nuk mat Sētikiā inrē, halöki ngaich inrē anga-aṅ tö sayōk, ngaich kē-ĕyö nö i Pĕpilön.

⁸Im tinneui chumngëṅtö im sinat sumkam ngam chingëṅt, ngam minchūötör sīön samyeūheu ök rācha Nēpusaratan nö i Yērusalem ök yöngṙen amahati, tarik ök rācha aṅ Pĕpilön.

⁹Ngaich anga-aṅ nö föngtökūö ök patī ngam Mā Tēv, töp patī ök rācha; ṙòkhöre inrē nuk patī i Yērusalem, föngtökūö nuk tökiröng patī anga-aṅ nö keuheūtngöre vah tī.

¹⁰Ngaich yik kumyung aṅ Kāltī, yik hol ök yöngṙen amahati, nö tiṙōlngö nuk ihong kinlōnglö Yērusalem nö vinngö tī.

¹¹Ngaich yik chööḵṙen yik tarik töṙā-ayö nö im elpanam, cha-a inrē yik kamë-engre, yik tökô-òng vah tö tī ök rācha aṅ Pĕpilön, yik chööḵṙen yik tömaṙôngö inrē, nö kē-ĕyö nö hakövö tö Nēpusaratan ök yöngṙen amahati.

¹²Ngaich pöri ök yöngṙen amahati nö ṙātö yik yāich im panam nö tameūich vāin, vamī panô-òṅ inrē.

¹³Ngaich nuk machööḵlö mās mī-ik patī ngam Mā Tēv, tö nuk inröön röön, tö nuk mās mai el patī ngam Mā Tēv, likūki anū-ö nö pinyënyi tö yik aṅ Kāltī ngaich kē-ĕyö nuk mās tö cha nö i Pĕpilön.

¹⁴Ngaich nuk tanīöyö, tö nuk sanël tumlat innyangngö kūö tameūyö tö nuk sanël ṙòkhöre inrē nuk mās chūökṙen aṅtī cha nö meukṙen, kē-ĕyö anū-ö tö cha.

¹⁵Nup chūök kūö tameūyö inrē, tö nuk chūök sanöichtī; nuk humlum, nuk rupīö, kē-ĕyö anū-ö tök yöngṙen amahati.

¹⁶Nuk tönët machööḵlö, tök töhĕng mai, tö nuk inröön röön inrē nuk vahī Sòlòmön nö chehen ngam patī ngam Mā Tēv; nuk mās aṅ i në chūökṙen öt kanlahen lumngan tö ṙôken re.

¹⁷Hëvhörsīön sumkôngö rôlòng ngòh töhĕng machööḵlö, i kui ò inrē öp kupung mās: lūöi sumkôngö rôlòng öp töhĕng kupung; holtö nup ṙòng anār nö vinngö nö sā inhāṅl nö i kui öp kupung, ṙòkhöre nö mās: ngaich sā u ngam innëtö machööḵlö nö sā mat inhāṅl mirun.

¹⁸Ngaich ök yöngṙen amahati nö kē-ĕ Serāya ök mākūö kūönṙô, Safaniā inrē ök innët tak kūönṙô, tö yik tölūöi tak yōm kūö inkūp:

¹⁹Ngaich anga-aṅ nö hĕng tak kahënyi tö kumkantöre nö ṙā-ang elpanam ök yöngṙen yik tarik kumyung; ngaich taneui tak tö cha yik mameuk kūö ök rācha, tökôti nö el panam: tök kamūich inrē, ök yöngṙen yik kumyung, ök mahamūl yik tarik ngam panam; tafūöl anāi yik aṅ i yik tarik ngam panam, yik tökôti nö elpanam.

²⁰Ngaich Nēpusaratan ök yöngṙen amahati nö kē-ĕ cha, ngaich kēten cha nö i Riplah in ök rācha aṅ Pĕpilön.

²¹Fëlö cha ngaich ök rācha aṅ Pĕpilön kumpaha cha inrē nö i Riplah ip panam Hamat. Kē-ĕyö ngaich Yūtā nö ṙā-ang ip panam re nö hakövö.

²²Vīlöng pöri Katālayā ök kikōnyö kūön Ahikam, ök kikōnyö kūön Safān, nö mahayöng yik tarik töṙā-ayö tö Nēpuketnēsör ök rācha aṅ Pĕpilön.

²³Ngaich hē yik yönṙen kumyung, cha-a inrē yik tarik cha, nö hang ök rācha aṅ Pĕpilön nö vīlen Katālayā nö mahayöng, yihtöre cha-a ngaich nö in Katālayā nö i Mispa, ang Ismael inrē ök kikōnyö kūön Nētaniya, Yôhanan inrē ök kikōnyö kūön Kariā, Sarāiyā inrē ök kikōnyö kūön Tanhumet aṅ Nëtōfā, Ya-asaniā inrē ök kikōnyö kūön Mē-akat, cha-a tö yik tarik cha inrē.

²⁴Ngaich chūöku ṙô ang Katālayā tö cha tö yik tarik cha inrē, ngö ṙô tö cha, Ui pa-ekūö öi kūö re tarik vē aṅ Kāltī: iyöng im panam yin, kūönkūö ngam rācha aṅ Pĕpilön, hòṅ e min nö lanööken nö in yīö.

²⁵Ngö inlahen pöri angū-ö nö ngaich im sinātö chingëṅt, tö Ismael ök kikōnyö kūön Nētaniyā, ök kikōnyö kūön Ēlīsamā, mak-alaha rācha, nö yih, söm tak tarik hol inrē, ngaich fëlngen Katālyā, kapah ngaich anga-aṅ yik Yahūti inrē tö yik aṅ Kāltī, yik mī-in ò nö i Mispā.

²⁶Ṙòkhöre inrē yik tarik, hĕnghöre tökūöṅnö tökiröng inrē, tö yik yöngṙen kumyung inrē, nö chōholre, ngaich yih nö i Aikup: pò cha nö pa-ekūö tö yik aṅ Kāltī.

²⁷Ngaich ngö inlahen angū-ö im tölūöi anāi sat samyeūheu Yēhōiyachin rācha aṅ Yūtā nö hakövö, im in nëtsīön chumngëṅtö, im tönët anāi sat sakāmö ngam chingëṅt, ang Ēvilmërōtak rācha aṅ Pĕpīlön, ik samyeūheu ranulten ò nö hayöng, anga-aṅ nö hachohlö kui Yēhōiyachin ök rācha aṅ Yūtā nö ṙā-ang el kinlōngö;

²⁸Ngaich anga-aṅ nö aheūkölōn ṙô nö vë-ekūö ò, ngaich ṙātö kantēra ò nö lātulöng tö kantēra yik rācha mī-in ò i Pĕpilön.

²⁹Haṙī-iyö ngaich tö ò nuk inyut ò nö el kinlōngö, i kūö ò ngaich anga-aṅ nö iṙūöhen nö nyā-aṅvkūö i rô-òtö nuk sakāmö ò.

³⁰Nuk mineukṙen ò, iṙūöhen mineūken anga-aṅ tö ök rācha, kaheuk sakāmö nö hēngö minchööḵö, hanöng saha kinpaha ò.