Read Car_Nicobarese 2 RĀCHA 4 Bible Online

2 RĀCHA 4 - Car_Nicobarese bible

2 RĀCHA 4

¹Ngaich hĕng tak ök kikānö aṅ in yik pīhö yik kikōnyö kūön yik pròfĕt pameuinyhökūö Ēlaisa, nö ngö ṙô, Kapah ök tarik meh ök pīhö chu: ngaich më-eṅ tö-akahalōn tö ngòh tarik meh nö töpa-ekūö tö ngam Mā Tēv: ngaich öp töhötṙehevö nö in chu nö yih nö kēḵ nap tönët tak kūön chu nö töhakövö.

²Ngaich ngö ṙô Ēlaisa tö ò, Suh ap min tī chu in meh? Vë-eny nang chu; asuh chehen öm el patī re? Ngaich ngö ṙô anga-aṅ, Öt chehenvö ön ngòh tarik meh kikānö nö el patī re, höng hĕng mineū-euṅ ap tavī-i.

³Ngaich ngö ṙô anga-aṅ, Kuṙòh, haṙūöng chūökṙen re man nö ṙòkhöre, nup töt aṅhāṅvö chūökṙen; un höng haroh tūmö haṙūöng.

⁴Ngaich kuhēthötre pömchö, löptökūö inkūp re më-eṅ tö nap kikōnyö kūön meh inrē, ngaich ṙöslö aṅ nup chūökṙen nö ṙòkhöre; haköhngen ap tötööḵlö pömchö.

⁵Kiröönngöre ngaich anga-aṅ nö ṙā-ang in ò, ngaich löpngö kūö re tö nak kikōnyö kūön ò inrē: kētö nuk chūökṙen cha-a ngaich nö in ò, asëhönyi ngaich anga-aṅ.

⁶Ngaich ngö inlahen angū-ö, hē nup chūökṙen nö tööḵlö, ngö ṙô anga-aṅ tök kūön re kikōnyö, Hĕngtöre hata man tö chūökṙen. Ngaich ngö ṙô anga-aṅ tö ò, Öt tö-ōtrevö chūökṙen. Sökngö röönre ngaich ök tavī-i.

⁷Yih ngaich anga-aṅ nö ve-eny nang ök tarik ngam Tēv. Ngö ṙô ngaich anga-aṅ, Kuṙòh, inyihngö ap tavī-i, ngaich kētö nup hötṙeh re më-eṅ ngaich ha-aṅhare me-eṅ tö nap kūön meh kikōnyö inrē tö ngam chööḵṙen.

⁸Ngaich hĕng heuh ik töhĕng sakāmö, ang Ēlaisa nö lökngö Sunēm, i chūök ök mā tökôlò kikānö; ngaich anga-aṅ nö asökngen ò nö nyā-aṅvkūö. Ngaich lökten in e, i tum heuh ò nö lök umuh, ngaich kāntöre anga-aṅ nö nyā-aṅvkūö nö umuh.

⁹Ngö ṙô ngaich ök kikānö tök pīhöre, Akahalōn chin tö ngòh nö töhet tarik ngam Tēv, ngòh töng örheūheu röön nö lök hih.

¹⁰Vë-ekūö meh chin tā-a tai vī kun urôhò hĕng i kaha patī; ngaich tā-a inrē tai vī tahāklö chūök mahaṙòh, hĕng mīs, hĕng anūchö, hĕng inrē chūökrit ëāṅvö; ngaich mīnö yē ò nö yih nö in hā, anga-aṅ nö iyöng ël e.

¹¹Ngaich hĕng heuh ik töhĕng, sakāmö, anga-aṅ nö yih nö umuh, kuhēthötre anga-aṅ ngaich nö el ök urôhò ngaich ṙōlngöre nö umuh.

¹²Ngö ṙô ngaich anga-aṅ tö Kīhāsī ök tarik ò, Havëten ap aṅ Sunēm man. Ngaich hē ò nö havëten ò, sökhak ngaich ök kikānö nö i kūö ò.

¹³Ngaich ngö ṙô anga-aṅ tö ò, Ngö ṙô man in ò, Yĕh meuk ṙūötökūö man tö ai öm ngö ṙôken ṙanūöten: asuh ap öre mineukṙen meh? Hòṅ eūkaṙen öm ip rācha hēk ṙöng ip yöngkūö kumyung? Ngaich ngö ṙô anga-aṅ nö sapṙô ò, Höng iyöng in vē tarik re chin.

¹⁴Ngaich ngö ṙô anga-aṅ, Suh ap öre mineukṙen meh? Kaknyöre ngaich Kīhāsī, nö ngö, Höng kô-òngrit an nö töt kūönu tö kikōnyö, ngaich nö köiny ap pīhö ò.

¹⁵Ngö ṙô ngaich anga-aṅ, Havëten ò. Ngaich hē ò nö havëten ò, sökhak ngaich anga-aṅ nö i kūö inkūp.

¹⁶Ngö ṙô ngaich anga-aṅ, I ngih hē, ip invīöltö e, fulkö kikōnyö më-eṅ min kūön re. Ngaich ngö ṙô ök kikānö, Mā chu, hö-övö, Ō më-eṅ tarik ngam Tēv, uh man minyôiny-aṅ i ngòh kūön re kikānö.

¹⁷Pirūkö nyīö ngaich ök kikānö, kayônyö kikānö ngaich nyīö nö ik hē e, hē ngam ṙētak nö vintakūö, sā ṙô Ēlaisa nö in ò.

¹⁸Ngaich hē ök nyīö nö pōyö, hĕng heuh angū-ö ik töhĕng sakāmö, ngam nyīö nö chuh ik yöng re kikōnyö nö i yik mu-uvòh sāiny.

¹⁹Ngö ṙô ngaich anga-aṅ tök yöng re kikōnyö, Kui chu, Kui chu! Ngö ṙô ngaich anga-aṅ tök tarik re, Tētten ò ip yöng ò kikānö.

²⁰Ngaich hē ò nö kēngen ò, nö kēten ò nö ik kikānö yöng ò, këmka anga-aṅ nö i takeun ò söl ik sakāmö, ngaich kapah.

²¹Kiröönngöre ngaich anga-aṅ ngaich haṙōlngen ò nö el ök chamam ök tarik ngam Tēv, öpngökūö ò ngaich anga-aṅ, ngaich kunyī-inyre.

²²Ngaich havëkö ök pīhö re anga-aṅ, nö ngö ṙô, Vë-ekūö meh chin, Hĕng tak tahīntö man in chu tö aṅ in yip tarik, hĕng nòng inrē aṅ in nup köttö, hòṅ chu faltöre ip tarik ngam Tēv, ngaich havan min hēk.

²³Ngaich ngö ṙô anga-aṅ, Kūöyòh öm hòṅ chuh in ò töngamuh? Tö e nö öt rēhĕn nö ayöö nö chingëṅt öt rēhĕn nö töhet sakāmö. Ngö ṙô ngaich anga-aṅ, Höng tölöök an min.

²⁴Ūichlöre ngaich anga-aṅ nö i uk ök köttö, ngaich ngö ṙô tök tarik re, Ahōṙan, pöh urĕh: un hakūöṅniröön, höng yē chu chöngu tö meh.

²⁵Kiröönngöre ngaich anga-aṅ, sölta ngaich nö ip tarik ngam Tēv ip Rôngö Kārmel. Ngaich ngö inlahen angū-ö, hē ök tarik ngam Tēv nö meūkan nö marôvat, ngö ṙô anga-aṅ tök tarik re Kihāsi, Yĕh meuk ngam aṅ Sunëm an ngamô-an:

²⁶Vë-ekūö meh chin fal man höngkūö ò, ngö ṙô tö ò, Lööken ömeh? Lööken öp pīhö meh? Lööken ap nyīö? Lööken, ngö ṙô ò nö sapṙô.

²⁷Ngaich hē ò nö sölta nö ik tarik ngam Tēv nö ip rung, kē kunröön ò ngaich anga-aṅ. Yihtöre ngaich Kīhāsī nö haröhtöre nö kuringngen ò; ngö ṙô pöri ök tarik ngam Tēv, hökngen ò: tön kihngen ap ellōn ò; hanyāti inrē angū-ö nö in chu tö ngam Mā Tēv, nö öt vënyu nö in chu.

²⁸Ngö ṙô ngaich ök kikānö, havëkö kikōnyö öich kūönre im mā chu misī? Röh öich ngö ṙô, Uh chin hachīlka?

²⁹Ngö ṙô ngaich anga-aṅ tö Kihāsī, Nyëklö ṙat re man kēḵ ngam kinchīṙö chu eltī re, kuṙòh kiröönngöre: yē meh meuk kūö tarik, um salāmö ò; yē meh salāmö tö yô-òv, um sapṙô ò hēk, ngaich ṙātö ngam kinchīṙö chu i kūö ap nyīö.

³⁰Ngaich ök yöngnyīö ök yöng ök nyīö nö ngö ṙô, Sā ngam Mā Tēv nö tö-aṅ, Sā ngam nômö meh inrē nö tö-aṅ, hö-ö chin hòṅ ṙāngen meh. Chōholre ngaich anga-aṅ ngaich tömrit ò.

³¹Urĕh ngaich Kīhāsī nö chööḵngen cha, ṙātö ök kinchīṙö ngaich nö i kūö ök nyīö; hö-ö pöri nö ṙô-òv, öt rēhĕn nö hang. Lökten anga-aṅ nö havan nö höngkūö ò, ngaich vë-eny nang ò, nö ngö ṙô, Öt aṅhen ap nyīö.

³²Ngaich hē Ēlaisa nö sölta nö im patī, meuk ngam nyīö ngaich nö kapah nö hulalhaka nö el chamam.

³³Lökten anga-aṅ nö kuhēthötre, ngaich öptökūöre cha-a nö nët taka, ngaich vë-ekūö ngam Mā Tēv.

³⁴Yòhlö ngaich anga-aṅ ngaich fahalre nö ik nyīö, harònglö ök elvāngre nö ik elvāng ò, nuk mat ò inrē nö i nuk mat ò, nuk eltī ò inrē nö i nuk eltī ò: hateunyöre anga-aṅ nö lātulöng tö ò: ṙūnglöre alaha ngaich ök nyīö.

³⁵Havantöre hēk anga-aṅ, ngaich hĕng vöt nö el ök patī, ngaich sōnngöre nö lā-tulöng tö ò: sat heuh ṙô ngaich ök nyīö nö yësö, ngaich milaklö nuk mat re ök nyīö.

³⁶Havëten Kīhāsī ngaich anga-aṅ, ngaich ngö ṙô, Havëten ap aṅ Sunëm man. Havëten ò ngaich anga-aṅ. Ngaich hē ò nö kuhēthötre nö in ò, ngö ṙô ngaich anga-aṅ, Kē ngam kūön re man.

³⁷Kuhēthötre ngaich anga-aṅ, afukngöre ngaich nö i röön ò, ngaich sōnngöre nö lātaṙeū; ngaich kē ök nyīö, kunyī-inyre ngaich.

³⁸Ngaich hēk ang Ēlaisa nö yih nö i Kilkāl: ngaich umuh ök inyāichö im panam; i kūö ò yik kikōnyö kūön yik pròfĕt nö ūichhaka: ngö ṙô ngaich anga-aṅ tök tarik re, Nyatlö ngam tökiröng tanīöyö, sum nyā-aṅkūö më kikōnyö kūön yik pròfĕt.

³⁹Ngaich hĕng tak ök kumröönngöre nö elkahôyö nö köich rōi chōn, ngaich kôtökūö anga-aṅ töp vāin, ngaich hamūl ṙòng ò nö hĕng mitōmö ngaich chūöṙö u nö el ök tanīöyö nyā-aṅkūö: pò cha nö öt akahakūö tö u.

⁴⁰Hòktö nya-aṅkūö yik tarik cha-a ngaich. Ngaich ngö inlahen angū-ö, hē cha nö nyā ök nyā-aṅkūö, ngö ṙô cha-a ngaich nö ayôṙā, Ō tarik ngam Tēv, kinpaha ap umuh el tanīöyö. Ötkô cha-a ngaich nö nyā-aṅ e.

⁴¹Ngö ṙô pöri anga-aṅ, Yĕh chĕi kētö töpahīöya atra. Suklö e ngaich anga-aṅ nö el ök tanīöyö; ngaich ngö ṙô, Hòklö nyā-aṅkūö më tarik, hòṅ cha nö nya-aṅvkūö. Ngaich öt vanāchu nuk aṅ ök tanīöyö.

⁴²Ngaich yihtöre nö umuh ök tarik hĕng tak ṙamā-ang Pēalsalīsā, ngaich kētö rutri ranehlö ṙòng nö ik tarik ngam Tēv, nët anāi nuk rôti pārli tufömngöre nö ṙòng el ök sāk ò. Ngö ṙô ngaich anga-aṅ, Kē-ĕkūö më tarik, hòṅ cha nö nyā-aṅvkūö.

⁴³Ngaich ngö ṙô ök tarik ò, Asuh, ṙātö në öichu i kūö vē töhēngòng tarik? Ngö ṙô pöri anga-aṅ, Kē-ĕkūö më tarik, hòṅ cha nö nyā-aṅvkūö tön ngö ṙô An ngam Mā Tēv, Nyā yip min, ngaich ṙā-alre.

⁴⁴Ṙātö u ngaich anga-aṅ nö i kūö cha, nyā cha-a ngaich, ṙā-alre ngaich, sā ṙô ngam Mā Tēv.