Read Car_Nicobarese 2 RĀCHA 5 Bible Online

2 RĀCHA 5 - Car_Nicobarese bible

2 RĀCHA 5

¹Tökiröngö minā-aṅ ök Nāman nö tarik nö ik yöng re, tö ineū-eūv inrē, pòn Löktö in ò tī ngam Mā Tēv nö kētö minhôiṅyö Sīriā, mākūö kumyung ök rācha ök aṅ Sīriā: tökalēḵ ök inrē nö tarik nö im öt pinhë-eṅkūö, ngaich pöri anga-aṅ nö töyeūnyu.

²Ngaich yik aṅ Sīriā nö kiröönngöre nö kahĕng kiteūm, ngaich kūmuṙen cha-a tö tökē-ĕ nö ṙā-ang panam Israĕl tök kikānö nyīö hĕng tak; ngaich anga-aṅ nö in ök pīhö Nāman.

³Ngaich ngö ṙô anga-aṅ tök yöngṙen re kikānö, Yĕn lōn ngam Tēv öre ngam mā chu nö in öp pròfĕt öp i Samariā! Ngaich lööken öre anga-aṅ tö tī ò tö ngam yeūnyö ò.

⁴Ngaich kuhēthötre anga-aṅ nö vë-eny nang ök mā re, nö ngö ṙô, Ngö ṙô ap nyīö kikānö öp aṅ panam Israĕl.

⁵Ngaich ngö ṙô ök rācha aṅ Sīriā, Kuṙòh, kiröön-ngöre söömtö līpöre chin min ip rācha aṅ Israĕl. Kiröönnngöre ngaich anga-aṅ, ngaich kē kum re tö rupīö söm kinlaha, ngaich tafūöl köṅny nuk humlum, söm lamnömö nuk hilā inrē.

⁶Kē tök līpöre ngaich anga-aṅ nö in ök rācha aṅ Israĕl, nö ngö ṙô, Yē ngih līpöre pöchö nö yih nö in meh, yĕh meuk, tīntö ngòh tarik re chin Nāman nö in meh, hòṅ meh halööklö ngam yeūnyö ò.

⁷Ngaich ngö inlahen angū-ö, hē ök rācha aṅ Israĕl nö vë-ekūö ök līpöre, ngö ṙô ngaich anga-aṅ nö tikaichngö inyut re, Tēv öich chū-ö tökô kumpah, tökô inrē aṅhatī, töp lökten ngòh tarik nö söömtu nö in chu pòn hōtu ngam yeūnyö ò nö lööken? Ngëichkö e pöri, vë-ekūö meh chin, tö inlahen ò nö chöh löknyö chööḵnyö re nö lā-alkūö chu.

⁸Ngaich ngö inlahen angū-ö hē ök tarik ngam Tēv Ēlaisa nö hang ök rācha aṅ Israĕl nö tikaichngö inyut re, söömtö ṙô ngaich anga-aṅ nö ik rācha, tö ngö, Kūöyòh öm tikāichngö inyut re? Hökten ò nö yihtöre nö in chu, hòṅ ò nö akahalōn min tö pròfĕt nö i Israĕl.

⁹Lökten Nāman nö yih nö holtö nuk kōra re, inröl re inrē, sökhak ngaich nö i kūö inkūp ök patī Ēlaisa.

¹⁰Ngö ṙô ngaich Ēlaisa tö ò nöng tanööluṙô, Kuṙòh vōk man i Yôtön sat köti kaha, ngaich sīöpnyöre min ngam alaha meh nö hēk nö in meh, ngaich lööken yēḵ më-eṅ min.

¹¹Tainy pöri ang Nāman kiröönngöre ngaich nö ngö ṙô, Yēh meuk, kumnyī-inyre ap tö lōn chu nö in chu, nö söktöhëch, nö havëkö minë-eny ngam Mā Tēv ngam Tēv ò, ngaich kuvai kël re nö i kui ngam yeūnyö ngaich kētö lanööken e.

¹²Röh nup tahël hī öi i Tamaskös, Apānā, Fārpār inrē, nö mötlö lanöökö tö në mak i Israĕl nö ṙòkhöre? Ötkô öich vōk ël u ngaich lööken? Lökten ò nö havöökūöre nöng tanainyngöre nö kiröönngöre.

¹³Ngaich yik tarik ò nö yihtöre nö haröhtöre ngaich ngö ṙô nö vë-ekūö ò, Kayöngö yē ap pròfĕt nö hōten meh öm la-evṙen tö e? Öp yòh öp tö-ĕhten tö ngam tö ngö ṙô ò tö meh, Vōk man, ngaich lööken yēḵ?

¹⁴Yôkti ngaich agna-aṅ, ngaich sat heuh nö chiṙimtöre nö el Yôtön, sā ṙô ngam tarik ngam Tēv; sīöpnyi ngaich ök alaha ò nö hēk nö sā alaha tënö nyīö ngaich lööken anga-aṅ.

¹⁵Havantöre ngaich anga-aṅ nö ik tarik ngam Tēv, yih ngaich anga-aṅ tö yik hol ò inrē nö ṙòkhöre sökhak ngaich nö i kūö ò: ngö ṙò ngaich anga-aṅ, Yĕh meuk, akahalōn chin ngaich tö töṙö-övö Tēv i në taṙòkhöre panam, höng in Israĕl: vë-ekūö meh chin yĕh lökten, kē raneushöre man i ngòh tarik meh.

¹⁶Ngö ṙô pöri anga-aṅ, Sā ngam Mā Tēv nö tö-aṅ, ngam tö-aṅhavkūö tö chu sökhak, hö-ö chin hōḵ kahë-evö. Mileūchen ngaich anga-aṅ nö hōten ò nö kē-ĕ e; sōḵ pöri anga-aṅ.

¹⁷Ngö ṙô ngaich ang Nāman. Yĕm sōḵ, höng vë-ekūö meh pöri chū-ö öm kētö tumlat i ngòh tarik re sā lumngam kum tönët nòng köttö; töngamūhangen ön min ngòh tarik meh nö öt föng tökētu öt rēhĕn nö kētö tökētu nö i tahëng tēv, höng im Mā Tēv.

¹⁸Aṙētö ngam tarik re an ngam Mā Tēv in e angū-ö; hē ngam mā chu nö kuhēthötre nö el patī Rimòn nö salām ngaich anga-aṅ nö harônlöre nö eltī chu, ngaich sōntöre chū-ö el ngam patī Rimòn, ngaich yē chu sōntöre el patī Rimòn ngaich ngam Mā Tēv nö aṙēlö ngòh tarik re in e angū-ö.

¹⁹Ngö ṙô anga-aṅ tö ò, Ngaich man kuṙòh im kumchikṙen. Lökten ò nö kiröönngöre nö ṙāngen ò nö rēhĕ rô-òlkūö.

²⁰Ngaich pöri Kīhāsī, ök tarik Ēlaisa ök tarik ngam Tēv nö ngö ṙô, Yĕh meuk, aṙēlen Nāman ap yöng chu, öp aṅ Sīriā nö öt kētī ò tö nup kum ò: sā ngam Mā Tēv nö tö-aṅ, hòṅ fallörit ò chin: ngaich rahëchyen kahë in ò.

²¹Lökten Kīhāsī nö fachūlörit Nāman. Ngaich hē Nāman nö meuk ök hĕng tak famallöritre yôktī ngaich anga-aṅ nö ṙā-ang el inröl nö höngkūö ò, nö ngö ṙô, Ṙòkhöre hòng nö lööken?

²²Ngö ṙô ngaich anga-aṅ, Hòṅ, ṙòkhöre nö lööken. Ngö ṙô ap yöng chu nö tīnten chu Yĕh meuk, nët tak nap ṙāl tarik kikōnyö kūön yip pròfĕt tufömtöre yīhih nö in chu nö ṙā-ang öp rung panam Ifrēm; vë-ekūö cha, tö rupīö hĕng kinlaha, nët lamnöömö inrē hilā.

²³Ngö ṙô ngaich ang Nāman, Nët kinlaha kahë man yĕh öm hōḵ. Līpan anga-aṅ, ngaich haṙung nup tönët kinlaha rupīö nö nët misākö, nö holtö nup hilā tönët lamnöömö, ngaich hakeunlö u nö in nak tönët tak tarik ò; tayūkö u cha-a ngaich nö urēhĕkūö ò.

²⁴Sölta cha-a ngaich nö ik rung, kē-ĕ u ngaich anga-aṅ nö ṙā-ang eltī cha, halinngen u ngaich nö el patī re: hökngen nak tarik ngaich anga-aṅ nö kiröönngöre, feus acha-a ngaich.

²⁵Kuhēthötre pöri anga-aṅ, sökhak ngaich nö i kūö ök yöng re. Ngö ṙô ngaich Ēlaisa tö ò, Kīhāsī, ṙā-ang yih ömeh? Ngö ṙô ngaich anga-aṅ, Öt kū-övö ön ngòh tarik meh.

²⁶Ngö ṙô ngaich anga-aṅ tö ò, Hö-ö ök lōn chu taheui nö in meh, hē öp tarik taheūi nö havöökūö ap inröl nö höngkūö meh? Ṙētak kinë-eṅ hilā inrē, kinë-eṅ panô-òṅ ôliv panô-òṅ vāin inrē, kinë-eṅ tarik kikōnyö, tarik kikānö inrē?

²⁷Lökten ap yeūnyö Nāman nö panta nö in meh min, ip kūön meh inrē nöng örheūheu. Kunyī-inyre ngaich anga-aṅ nö ṙā-ang i kūö ò nö yeūnyuvö alaha sā insōho tökënngöre tacham.