Read Car_Nicobarese 2 RĀCHA 6 Bible Online

2 RĀCHA 6 - Car_Nicobarese bible

2 RĀCHA 6

¹Ngaich yik kikōnyö kūön yik pròfĕt nö ngö ṙô tö Ēlaisa, Yĕh meuk, cheūkti ön ngih chūökö nö chūök hī iyöng ngih i kūö meh.

²Vë-ekūö meh in, hökngen ih kiröönngöre chuh Yôtön, ngaich in e öi kēḵ chōn kö kahĕng milöichö i töhĕng tak tarik, ngaich hökngen ih vītö chūök re umuh, chūök ih iyöng. Ngö ṙô ngaich anga-aṅ nö sapṙô cha, kiröönngöre yin kuṙòh.

³Ngaich hĕng tak ök tö ngö ṙô, Vë-ekūö meh in, hōḵ man yĕh kiröönngöre in vē tarik meh. Ngö ṙô ngaich anga-aṅ nö sapṙô cha, Hôṅ pöh.

⁴Kiröönngöre ngaich anga-aṅ nö in cha, chalô cha-a ngaich nö i Yôtön, kūöltö chōn cha-a ngaich.

⁵Hē ök tarik pöri hĕng tak nö kūöltö chōn, fanyötköṅny ngaich ök hanīöng nö ṙā-ang ik haṙah re ngaich fuk el mak: ngö ṙô ngaich anga-aṅ nö hūḵa, Aōla, yöng chu! Pò ò nö töng haṙūöngka.

⁶Ngaich ngö ṙô ök tarik ngam Tēv, Fuk yih ök? Ngaich asōkhökūö ò anga-aṅ tö kamngö ò, ngaich anga-aṅ nö fang kun chōn, ngaich sukten ò nö umuh, ngaich yöölö ök vët.

⁷Ngö ṙô ngaich anga-aṅ, Kē an man. Lökten ò nö silôtö kël re, ngaich kē aṅ.

⁸Hē ök rācha aṅ Siriā nö kiyung nö lā-al Israel; ngaich halēn ṙô re anga-aṅ nö in yik tarik re, nö ngö ṙô, I ane chūök öp min elyöngö chu.

⁹Ngaich ök tarik ngam Tēv nö söömtö ṙô nö ik rācha aṅ Israĕl, nö ngö ṙô, Haṙēmngenre man um lök ip chūökö umuh; tön yih yip aṅ Sīriā nö in e.

¹⁰Ngaich ök rācha aṅ Israĕl nö tīnngö tarik nö ik chūök ṙô ngam tarik ngam Tēv nö sōten ò nö lök in e; ngaich yöölen tī anga-aṅ tö re nö umuh, öt höng hĕng heuh öt rēhĕn nö nët heuh.

¹¹Ngaich ök rācha aṅ Sīriā nö pōyen kinihten ellōn tökūö e; havëtö yik tarik re ngaich anga-aṅ, ngaich ngö ṙô tö cha. Öt hòṅ hameukhömat chu öyih töp in hī lamā ip rācha Israĕl?

¹²Ngaich hĕngtak ök tö ngö ṙô aṅ in yik tarik ò, Mā chu, Ō rācha, hö-övö; tön höng Ēlaisa apa, öp pròfĕt i Israĕl, anga-aṅ ap vamënyö nup ṙô meh el chaman re nö i nap rācha aṅ Israĕl.

¹³Ngaich ngö ṙô anga-aṅ, Kuṙòh ngëichkö chūök ò, hòṅ chu tīnngö kamë-eṅren ò. Ngaich vënyu angū-ö nö in ò, nö ngö, Yĕh meuk, i Tōtan apa.

¹⁴Lökten ò nö tīnngö kōra, inröl inrē, nö umuh, maṙôngö inrē yik kumyung: hatööm tö yīhih cha-a ngaich, ngaich havīlö ök elpanam nö vintakūö.

¹⁵Ngaich hē ök tarik ök tarik ngam Tēv nö ka-euilökūö nö chōholre, kunyī-inyre ngaich, ngaich meuk yik tömaṙôngö nö holtökōra, inröl inrē nö vintakūö nö havīlö ngam elpanam. Ngaich ngö ṙô ök tarik ò tö ò, Aōla, yöng chu! Sitih inlahen öivö min?

¹⁶Um pa-ekūö, ngö ṙô anga-aṅ nö sapṙô ò: tön mötlö ṙôken yip in hī tö cha yip mi-in cha.

¹⁷Vë-ekūötēv ngaich ang Ēlaisa, nö ngö ṙô, Mā Tēv, vë-ekūö meh chin löpnyökūö mat ò, hòṅ ò nö meuk. Ngaich ngam Mā Tēv nö löpnyökūö mat ök ṙālö tarik; meuk ngaich anga-aṅ, meuk ök rôngö inrē nö löpngöre kui tö kōra inröl, tameūyö inrē nö havīlen Ēlaisa.

¹⁸Ngaich hē cha nö peūtöre nö in ò, vë-ekūö ngam Mā Tēv ngaich Ēlaisa, nö ngö ṙô, Fël më tarik, vë-ekūö meh chin, aṅtī tö ötmaneūkö. Fëlö cha ngaich anga-aṅ nö aṅtī tö ötmaneūkö nö sā ṙô Ēlaisa.

¹⁹Ngaich ngö ṙô Ēlaisa tö cha, Rö-ö ön nö ngih talöökö öt rēhĕn nö ngih elpanam; tömrit chu, töich asölten yīö ip tarik töchöhöh tö yīö. Ngaich hachōten cha anga-aṅ nö i Samariā.

²⁰Ngaich ngö inlahen angū-ö, hē cha nö ngaich nö sölta nö i Samariā, ngö ṙô ngaich Ēlaisa, Mā Tēv, löpnyökūö mat vē tarik, hòṅ cha nö meuk. Löpnyökūö mat cha ngaich ngam Mā Tēv ngaich meuk cha-a; yĕh meuk, ngaich cha-a nö ellōn Samariā.

²¹Ngaich ngö ṙô ök rācha aṅ Israĕl tö Ēlaisa, hē ò nö meūkö cha, Kayöngö, fëlö cha öichu? Fëlö cha öichu?

²²Ngaich sapṙô ò anga-aṅ nö ngö, Uh man fëlö cha: hòṅ fëlngö tökē-ĕ ṙöng öm tö meh öm aṅtī tö fël re linreny re inrē? Ṙā-akūö cha tö nyā-aṅ mak inrē, hòṅ cha nö nyā-òk inrē, ngaich kiröönngöre nö chuh ip yöng re.

²³Pōyen halēn ngaich anga-aṅ tö nya-aṅkūö cha: ngaich hē cha nö keuheūtökūö nö nyā-òk inrē, tīniyö cha-a ngaich, ngaich kiröönngöre cha-a nö chuh ik yöng re. Ngaich öt hēka yik kumyung aṅ Siriā nö yih nö i panam Israĕl.

²⁴Ngaich ngö inlahen unôich tö ngih, ang Penhātat ök rācha aṅ Siriā nö hamūl yik kumyung in re nö ṙòkhöre, kiröönngöre ngaich, ngaich havīlen Samariā.

²⁵Ngaich kiröngen ök yöng inyāichö i Samariā: Yēh meuk, ngaich cha-a nö havīlen e, hanöng saha kui köttö töhĕng nö inyīhiyö nö hëvhör anāi ṙāi tö rupīö, ngaich taneui höt tāk tö rupīö ngih töhĕng i töfën kanap sôḵ pumpa.

²⁶Ngaich hē ök rācha aṅ Israĕl nö lök kui ök kinlonglö ök panam, hĕng tak ngaich ök kikānö pameuinyhö kūö ò, nö ngö ṙô, Mā chu, Ō rācha, holṙen chu.

²⁷Ngaich ngö ṙô anga-aṅ, Yē ngam Mā Tēv nö öt holṙen meh, ṙeū-eung yih öich chū-ö min holṙen meh? Ṙeū-eung ël chūök sinôngö sāiny hòng, hēk ṙeū-eung ël chūök kinrān vāin hòng?

²⁸Ngö ṙô ngaich ök rācha tök kikānö, Asuāp halöiny meh? Ngö ṙô ngaich anga-aṅ nö sapṙô, Ngö ṙô ön ngòh kikānö fömngöre tö chu, Kē tap kūön re man kikōnyö, hòṅ hā kā an töngamuh, ngaich huṙöich ai kā ngòh kūön chu kikōnyö.

²⁹Lökten āyö ngaich sum ök kūön chu kikōnyö, ngaich kā an: ngaich im tahëng sakāmö chū-ö ngö ṙô tö ò, Kē töp kūön re man kikōnyö, hòṅ hā kā an: ngaich anga-aṅ nö hayunngö ök kūön re kikōnyö.

³⁰Ngaich ngö inlahen angū-ö, hē ök rācha nö hang ṙô ök kikānö, tikāichngö inyut re ngaich anga-aṅ; (lökngö kui ngam kinlonglö ngam panam anga-aṅ nö kiröönngöre) hatīönken ò yik tarik ngaich meūkan nö inyut tö sāk nö la-ël inyut ò.

³¹Ngaich ngö ṙô anga-aṅ, Ngati tī An yēḵ ngam Tēv tö chu, hēk mötlö inrē, yē ap kui Ēlaisa min öp kikōnyö kūön Safāt nö sökhaka nö in ò töngamuh.

³²Höng ūichhaka pöri Ēlaisa nö el patī re, ūichhak yik mā nö in ò; ngaich hĕng tak ök tarik tahīntö ök rācha nö urēhĕkūö ò: öl tö yīhi pöri yik mā, Yĕh meuk yin tö ngòh kūön famël tarik nö tīnngö kamëngö ngih kui chu? Ngëicha, öptökūö ngam inkūp yĕn öp ma-ahānga haköpngö kūö ngam inkūp pöichö; hòṅ ò nö öt kôhöt: röh ap umuh nö ṙô röön ap yöng ò nö unôichrit ò?

³³Hē ò nöng ṙònghöich ṙô nö vë-ekūö cha, yĕh meuk sölta ngaich ök ma-ahānga nö in ò: ngaich ngö ṙô anga-aṅ, Yĕh meuk, aṅ im Mā Tēv An ngam chanôchö; suh ap pökeh tö-ōtre hinökkö ngam Mā Tēv?