Read Car_Nicobarese 2 RĀCHA 7 Bible Online

2 RĀCHA 7 - Car_Nicobarese bible

2 RĀCHA 7

¹Ngaich ngö ṙô Ēlaisa, Hangihtöre yin tö ṙô ngam Mā Tēv: ngö ṙô An ngam Mā Tēv, Huṙöich ip tö ngatī ṙētak min öp töhĕng nyanum töpahīöya atra nö hĕng siköl ṙāi nö inyīhiyö, ngaich nët nyanum pārlī nö hĕng siköl ṙāi, nö i kūö inkūp Samariā.

²Ngaich ök mā ök chūök ök rācha nö hayönglenre nö ngö ṙô nö sapṙô ök tarik ngam Mā Tēv yēk ngam Mā Tēv öre nö vī nup inkūp el halīöngö, ngaich kô-òren hòng min angū-ö? Ngaich ngö ṙô Ēlaisa, Yĕh meuk, meūkö e nun min minë mat meh, hö-ö pöri min më-eṅ nyā-aṅvkūö tö u.

³Ngaich fën tak yik umuh töyeūnyu tarik i lökhöt kūö inkūp: ngö ṙô cha-a tö höö, Kūöyòh öi ayī-ö höng ūichhak ihih söl i kinpahare?

⁴Yē hī ngö ṙô, Hòṅ keuhēthötre in el ngam elpanam, ngaich elpanam ngam inyāichö, ngaich kapah min ayī-ö umuh: ngaich yē hī ūichhaka höngngöh ihih, kapah min ayī-ö inrē. Tā-a lökten, töi hökngenre öi fukngö in yip kumyung aṅ Siriā: yē cha nö hayöölen hī aṅ, ngaich aṅ ayī-ö min; yē cha nö fëlngen hī, ngaich höng tökapah ayī-ö.

⁵Chōholre cha-a ngaich ik chinṙivtö harap, nö chuh elyöngö yik aṅ Siriā: ngaich hē cha nö sölngö nö ik manā-aṅgkūö ök elyöngö yik aṅ Siriā, ngaich meuk, öt hĕng tak tarik umuh,

⁶Pò ngam Mā nö vīten yik aṅ Siriā kumyung nö hang ṙënṙô inröl, ṙënṙô kōra inrē, ṙënṙô tömaṙôngö inrē kumyung: ngö ṙô ngaich cha-a tö höö, Yĕh meuk haṙāi lā-al hī ap rācha aṅ Israĕl tö yip rācha aṅ Hitait, yip rācha inrē aṅ Aikup, nö yih nö in hī.

⁷Lökten cha nö chōholre ngaich falngöre i chinṙivtö harap, ngaich ṙāngö nuk inrūkui re, tö nuk kōra cha, tö nuk köttö cha, tö ök elyöngö cha inrē, ngaich chööḵöny tö nômö re nö fëlngöre.

⁸Ngaich hē yik töyeūnyu nö sölngö nö i manā-angkūö ök elyöngö, kuhēthötre cha-a ngaich nö el töhĕng inrūkui, nyā chā-a ngaich òk inrē, ngaich kē kum re nö umuh tö rupīö, humlum, hilā inrē, kiröönngöre ngaich nö hayunngen u; yih hēk chā-a nö havantöre, ngaich kuhēthötre nö el ök tahëng inrūkui, ngaich kē kum re inrē nö hayunngen u.

⁹Ngö ṙô cha-a ngaich tö höö, Vāchö inlahen in: sakāmö hē tölöök inhānga ön ngih, ngaich ayī-ö höng öt ṙô-òv: yē hī höngngöh hanöng saha hanatlö peuheū, ngaich kôti min ayī-ö ing fālenre: tā-a lökten, töi kiröönngöre vë-eny nang yip aṅ patī ap rācha.

¹⁰Lökten cha nö yih, ngaich havëkö ök yōmkūö inkūp ngam elpanam; ngaich ngö ṙô cha-a nö vë-eny nang cha, Yih in taheui ip elyöngö yik aṅ Sīriā, ngaich öt meuk tarik taheui umuh, öt rēhĕn hang ṙënṙô tarik, kapòkhak pöri nup kōra, kapòkhak inrē nup köttö, ngaich höng sā inlahenre nup inrūkui.

¹¹Ngaich anga-aṅ nö havëtö yik yōmkūö inkūp; ngaich cha-a nö vë-eny e nö in yik lātuhēt aṅ patī ök rācha.

¹²Chōholre ngaich ök rācha im hatööm, ngaich ngö ṙô tö yik tarik re, hòṅ hameukhö mat yīö chin tö inlahen tī yip aṅ Siriā tö hī. Akahalōn yip kòl tö hī aheuk; lökten yik nö kiröönngöre nö hayunngöre nö elkahôyö nö ngö ṙô, Kē-ĕ cha in min nö aṅ yē cha nö kunyī-inyre nö ṙā-ang el öp panam, ngaich kuhēthötre ayī-ö min im elpanam.

¹³Ngaich hĕng tak öp aṅ in yip tarik ò tö ngö ṙô nö sapṙô, Vë-ekūö meh chin hökngen ap yô-òv nö kē nup tö taneui nòng kōra tö-ōtren nup chööḵṙen im elpanam, (Yĕh meuk, höng anū-ö nup yih ṙôken tö-ōttit nö in Israĕl nö töṙālöng nö in e, yĕh meuk, ngaich nup nö sā ṙôngö yik aṅ Israĕl tökeuheūt-ngörevah:) Tā-a töi tīnngen cha nö ngëicha.

¹⁴Lökten cha ngaich nö nëtö kahë tö inröl nö holtö nuk kōra; ngaich ök rācha nö tīnngö lamūkörit yik aṅ Sīriā, nö ngö ṙô, Kuṙòh ngëicha.

¹⁵Ngaich cha-a nö söl Yôtön nö lūkörit cha; ngaich meuk ök talöökö nö tööḵlö ël tö hilā tö chūökṙen inrē, nuk kavalngö yik aṅ Sīriā i kunrāten cha. Havan ngaich yik tötīni, ngaich vë-eny nang ök rācha.

¹⁶Kunyī-inyre ngaich yik tarik, ngaich kē nuk aṅ elyöngö yik aṅ Sīriā. Lökten nö inyīhiyö töhĕng nyanum töpahīöya atra nö hĕng siköl ṙāi, ngaich nët nyanum pārlī nö hĕng siköl ṙāi, sā ṙô ngam Mā Tēv.

¹⁷Ngaich ngam rācha nö vīlö ök yöngṙen nö yōmkūö inkūp, ök chūök ò nö hayönglenre: ngaich yik tarik nö i kūö inkūp nö röön tö kui ò, kapah ngaich anga-aṅ sā ṙô ök tarik ngam Tēv, ök vamë-eṅkūö ngam rācha hē ò nö yihtöre nö in ò.

¹⁸Ngaich ngö inlahen angū-ö, nö sā ṙô ngam tarik ngam Tēv nö im rācha nö ngö ṙô, Nët nyanum pārli i töhĕng siköl, hĕng nyanum töpahīöya atra i töhĕng siköl, mīnö ip huṙöich nö i kūö inkūp Samariā i tö ngatī ṙētak;

¹⁹Ngaich ngö ṙô ök mākūö nö sapṙô ök tarik ngam Tēv, Yĕh meuk yē ngam Mā Tēv öre nö vī nup inkūp el halīöngö ngaich kô-òren hòng min angū-ö? Ngaich ngö ṙô, Yĕh meuk, meūkö e nun min minë mat meh, hö-ö pöri min më-eṅ nyā-aṅvkūö tö u.

²⁰Teungtökūö ngaich angū-ö nö in ò; kūö yik tarik nö röön tö kui ò, ngaich kapah anga-aṅ.