Read Car_Nicobarese 2 RĀCHA 8 Bible Online

2 RĀCHA 8 - Car_Nicobarese bible

2 RĀCHA 8

¹Ngaich vë-ekūö ök kikānö ang Ēlaisa, ök tökūönu tök töhavantu nômö tö ò, nö ngö ṙô, Chōholre man, kiröönngöre më-eṅ tö yip aṅ patī meh, iyöng rahëich hangkūö ip töng chūök meh kôḵ rahëichtaṙen; tön havëtö inyāichö Aṅ ngam Mā Tēv; ngaich angū-ö min inrē nö yih nö sat samyeūheu nö ing panam.

²Chōholre ngaich ök kikānö, ngaich asā ṙô ngam tarik ngam Tēv; kiröönngöre ngaich anga-aṅ nö holtö yik aṅ patī re, ngaich sat samyeūheu nö rahëichhangkūö nö iyöng panam yik Filistain.

³Ngaich ngö inlahen angū-ö i kinheūten nuk tösat samyeūheu, havan ngaich ök kikānö nö ṙā-ang panam yik Filistian: kiröönngöre ngaich anga-aṅ nö peuinyhökūö ök rācha tökūö ök patī ò, ök taṙeūḵ ò inrē.

⁴Ngaich ök rācha nö vë-ekūö Kīhāsī ök tarik alaha ök tarik ngam Tēv, nö ngö ṙô, vë-ekūö meh chin, vë-eny nang chu man keuheūtnyöre ṙô tö nup tökiröng tī Ēliaisa.

⁵Ngaich ngö inlahen angū-ö, hē ò nö vë-eny nang ök rācha tö tī ò nö havan tö nômö ök tökapah nö in ò, ngaich meuk ök kikānö, ök tökūönu tök kikōnyö töhavantu nômö tö ò, nö peuinyhökūö ök rācha tökūö ök patī ò, ök taṙeuḵ ò inrē. Ngö ṙô ngaich ang Kīhāsī, Mā chu, Ō rācha, anga-aṅ an ngòh kikānö, anga-aṅ angòh kikōnyö kūön ò inrē, ngòh töhavantu nômö tö Ēlaisa.

⁶Ngaich hē ök rācha nö hatön ök kikānö, ngaich vë-eny nang ò anga-aṅ. Lökten ök rācha nö tölṙô töhĕng tak mā, ngö ṙô, Havantö nup inlānen ò nö ṙòkhöre nup ṙòng aṅ ngam taṙeūḵ ò inrē löktökūö ik sakāmö hē ò nö ṙāngö ngam panam, söl ing töngamuh inrē.

⁷Yihtöre ngaich Ēlaisa nö i Tamaskös, ngaich ang Penhatat nö vahavö ök rācha aṅ Sīriā ngaich vënyu nang anga-aṅ tö e, nö ngö ṙô, YIh ap tarik ngam Tēv nö ihih.

⁸Ngaich ngö ṙô ök rācha tö Hāsaĕl, Kē raneushö man eltīre, ngaich kiröönngöre höngkūö ap tarik ngam Tēv, in ò hatöntöre im Mā Tēv, ngö ṙô, Lööken öich min tö ngih invah?

⁹Lökten Hāsaĕl nö kiröönngöre nö höngkūö ò, ngaich kē kum re tö raneushö, ṙòklöre mihëṅṙö nup tölöök chehen Tamaskös, lumngan töfën anāi aṅ tum nòng ūṅt, yih ngaich ang-aṅ, sökhak ngaich nö i kūö ò, ngaich ngö ṙô, Tīnten chu ap kūön meh öich in meh ap rācha aṅ Siriā ang Penhatat, nö ngö ṙô, Lööken öich min töngih invah?

¹⁰Ngö ṙô ngaich Ēlaisa tö ò, Kuṙòh, ngö ṙô tö ò, Lööken man min; ngaich pöri ngam Mā Tēv nö hameukhö mat chu tö ò min nö kapah.

¹¹Ngaich anga-aṅ nö haköp matre nö hatīön kö kūö ò, hanöng saha ò nö sirōngkūö: peuiny ngaich ök tarik ngam Tēv.

¹²Ngaich ngö ṙô ang Hāsaĕl, Mā chu kūöyòh öm peuiny? Ngaich ngö ṙô anga-aṅ nö sapṙô, Pò chu akahalōn töp tötlöök tī meh min in yip kūön Israĕl: föngtu nup min tö meh töngëḵ chūökö, fëli min tö meh yip ṙālö tarik nö nyaha tö fël pinyāṅchi min yip tökūöṅnö sapnyu aich min inrē yip kikānö tökūönu ellōn.

¹³Ngaich ngö ṙô Hāsaĕl, Nö asuh ang ngòh tarik meh? Ngòh töng am, nö tö ngatī tī min tö ngih tökiröng? Ngaich sapṙô ò Ēlaisa nö ngö ṙô Hameukhömat chu An ngam Mā Tēv tö meh min rācha i kui Sīriā.

¹⁴Kiröönngöre ngaich anga-aṅ nö ṙā-ang in Ēlaisa, ngaich yihtöre nö ik yöngre; ök tö ngö ṙô tö ò, Sitih ṙô ap Ēlaisa tö meh? Ngaich ngö ṙô anga-aṅ nö sapṙô ò, Vë-eny nang chu ap tö meh min lööken.

¹⁵Ngaich ngö inlahen angū-ö im huṙöich, hē ò nö kē ök kun kinṙum, sumtö e ngaich nö el mak, ngaich haṙĕh tö e nö i kūö ò, lökten ò ngaich nö kapah: hayöng ngaich Hāsaĕl nö i chūök ò.

¹⁶Im tinneūyö samyeūheu Yōram ök kikōnyö kūön Ahap rācha an Israĕl, rācha ang Yēhōsafāt nö i Yūtā, rĕhtenre ang Yēhōram ök kikōnyö kūön Yēhōsafāt nö hayöng nö rācha nö i Yūtā.

¹⁷Lūöi anāi nët samyeūheu ṙēti anga-aṅ hē ranehten ò nö hayöng; ngaich hëvhöre samyeūheu anga-aṅ nö hayöng nö i Yērusalem.

¹⁸Ngaich anga-aṅ nö lök el talöök yik rācha aṅ Israĕl, nö sā yik aṅ patī Ahap, pò ôn pīhötö ök kikānö kūön Ahap: ngaich anga-aṅ nö la-evṙen tö tötlöök nö i kūö ngam Mā Tēv.

¹⁹Hö-ö pöri ngam Mā Tēv nö hòṅ piyāingen Yūtā, tökūö ök tarik re Tāvit, sā ṙô ò nö kilēḵngôre nö in ò nö kē-ĕkūö ò tö ëāṅvö i yip kūön ò nö örheūheu.

²⁰I nuk sakāmö ò i Ētöm nö ahôngen Yūtā, ngaich kahngenre nö vīlö rācha re.

²¹Ngaich havāngngöre Yōram nö i Sāir, in ò nuk inröl nö ṙòkhöre: choholre ngaich anga-aṅ tö hatööm ngaich kiyung yik aṅ Ētöm yik mahavīlen ò, tö yik yöngkūö nuk inröl inrē: ngaich yik tarik nö falngöre nö chuh el inrūkui re,

²²Ahôngen Yūtā ngaich Ētöm söl ing töngamuh. Hē e inrē Līpnā nö ahôngen Yūtā.

²³Nup ṙôken inlahen Yōram, ṙòkhöre inrē nuk tī ò, röh nuk nö kūichiyö nö i mat Līpöre Kinṙötngö yip Rācha aṅ Yūtā?

²⁴Haṙòh ngaich ang Yōram nö in yik yöng re, ngaich lāpi nö in yik yöng re, elpanam Tāvit: ngaich ök kūön ò kikōnyö ang Ahāsiā nö hayöng nö ṙënngen ò.

²⁵Im innët sīön samyeūheu Yōram ök kikōnyö kūön Ahap rācha aṅ Israĕl, ang Ahāsiā nö rultenre nö hayöng, ök kikōnyö kūön Yēhōram rācha aṅ Yūtā.

²⁶Nët anāi nët samyeūheu ṙēti ang Ahāsiā hē ranulten ò nö hayöng; hĕng samyeūeu anga-aṅ nöhayöng nö i Yērusalem. Atāliya minënyi ök yöng ò kikānö: kūön Omri rācha aṅ Israĕl.

²⁷Ngaich anga-aṅ nöng lök el talöökö yik aṅ patī Ahap, la-evṙen inrē tö tötlöök nö i kūö ngam Mā Tēv, sā inlāhen yik aṅ patī Ahap: pò ò nö köiny kūön aṅ patī Ahap.

²⁸Kiröönngöre anga-aṅ nö hol Yōram ök kikōnyö kūön Ahap nö kiyung nö lā-al Hasaĕl ök rācha aṅ Sīrīa nö i Rēmòt kilīöt; ngaich nyaṅhaṅvö ang Yōre, tö tī yik aṅ Sīriā.

²⁹Havan ngaich ök rācha Yōram nö i Yesrīl nö ôi nuk nyaṅhaṅre nuk tī yik aṅ Sīriā tö tī ò nö i Rāma, hē ò nö kiyung nö lā-al Hasaĕl ök rācha aṅ Siriā. Ngaich Ahāsiā ök kikōnyö kūön Yēhōram rācha aṅ Yūtā, nö kiröönngöre nö chöhken Yōram, nö i Yesrīl ök kikōnyö kūön Ahap, pò ò nö vahavö.