Read Car_Nicobarese 2 RĀCHA 9 Bible Online

2 RĀCHA 9 - Car_Nicobarese bible

2 RĀCHA 9

¹Ngaich Ēlaisa ök pròfĕt nö Hĕng tak havëti tö aṅ in yik kikōnyö kūön yik pròfĕt, ngaich ngö ṙô tö ò, Nyëklö ṙat re mana, ngaich kē ngih pilön tavī-i eltī meh, kiröönngöre ngaich chuh Rēmòtkilīöt.

²Ngaich yē meh min yih umuh, ngëichken Yēhū umuh öp kikōnyö kūön Yēhōsafat öp kikōnyö kūön Nimsī. Ngaich kuhēthötre, ngaich tölṙô ò nö chōholre nö ṙā-ang in yip hol re, ngaich sarōkhöt ò nö el öp latuhēt urôhò.

³Ngaich kē ngam pilön tavī-i, ṙöstö e i kui ò, ngaich ngö ṙô, Ngö ṙô An ngam Mā Tēv, Hacham el kui meh chin ngaich öm rācha i kui Israĕl. Ngaich löpnyö kūö ap inkūp, falnyöre ngaich, un ngöhaka.

⁴Lökten ök ṙāl tarik, pròfĕt nö kiröönngöre nö chuh Rēmòtkilīöt.

⁵Chalô ngaich anga-aṅ, yĕh meuk, yik yöngkūö kumyung nö ūichhakaṙen; ngö ṙô ngaich anga-aṅ, Kūmuṙen chin in meh tö inhānga, Ō yöng-kūö kumyung. Ngaich ngö ṙô ang Yēhū, In chīö tö ih öi ṙòkhöre? Ngaich ngö ṙô anga-aṅ, In meh, Ō yöngkūö kumyung.

⁶Chōholre ngaich anga-aṅ, ngaich kuhēthötre nö el patī; ṙöstö ngam tavī-i ngaich anga-aṅ nö i kui ò, ngaich ngö ṙô tö ò, Ngö ṙô An ngam Mā Tēv, ngam Tēv Israĕl, Ngaich tī chin hacham kui meh rācha i kūö vē tarik ngam Mā Tēv, i kui Israĕl.

⁷Ngaich më-eṅ min tiṙōlngö ngam patī Ahap ap yöng meh, hòṅ chu havahal vah mahām yik tarik chu pròfĕt, mahām yik tarik ngam Mā Tēv inrē nö ṙòkhöre, nö eltī Yēsipel.

⁸Pòn keuheūtngöre min ngam patī Ahap nö payāyi: rökngen nyīö kikōnyö chin min nö ṙā-ang in Ahap, anga-aṅ inrē öp tö-öpīkūö, anga-aṅ inrē öp töṙā-ayö nö el kahôyö in Israĕl.

⁹Ngaich chū-ö min vīten ngam patī Ahap nö sā öp patī Yērōpoām ök kikōnyö kūön. Nēpòt sā ök patī Peāsa inrē ök kikōnyö kūön Ahīyā.

¹⁰Ngaich nup am min nö kā-a Yēsīpel nö ip chūökö i Yesrīl, öt hĕng tak min umuh lamāpngen ò. Löpnyö kūö ök inkūp ngaich anga-aṅ, ngaich falngöre.

¹¹Ngaich kunyī-inyre ang Yēhū nö in yik tarik ök mā ò: ngaich hĕng tak ök tö ngö ṙô tö ò, Lööken hòng nö ṙòkhöre? Kūöyòh ang ngam tökatūöyaṙen nö yih nö in meh? Ngaich ngö ṙô anga-aṅ tö cha, Akahakūö yin töng tarik akahalōn inrē töp ṙô ò.

¹²Ngaich ngö ṙô cha-a, Minyôinyaṅ ò an angū-ö; ve-eny nang ih man ngaich. Ngaich ngö ṙô anga-aṅ Ngö ṙô an taheui nö vë-ekūö chu, Ngö rô An ngam Mā Tēv, hacham el kui meh chin ngaich rācha i kui Israĕl.

¹³Kurāten cha-a ngaich, kö kē inyut re ngaich cha-a, ngaich hayutlöre tö e nö i kui ök ranöönlö, föö ngaich, ngaich ngö ṙô, Rācha ön Yēhū.

¹⁴Lökten Yēhū ök kikōnyö kūön Yēhōsafāt ök kikōnyö kūön Nimsī nö chōchö ellōn nö in Yōram, (Haköpö Rēmòtkilīöt ang Yōram, nö ṙòkhöre tö yip aṅ Israĕl tö kūö Hāsa-ĕl ök rācha aṅ Sīriā:

¹⁵Havan pöri Yōram ök rācha nö ôyö nö i Yesrīl tökūö nuk nyaha ò tö tī yik aṅ Sīriā in ò, hē ò nö kiyūngö Hāsa-ĕl ök rācha aṅ Sīriā.) Ngaich ngö ṙô ang Yēhū, Yē ngih nö ellōn meh ngaich, yĕh un hĕng tak kumnyī-inyre nö ṙā-ang ngih elpanam, nö kiröönngöre nö vë-eny e nö i Yesrīl.

¹⁶El inröl ngaich ang Yēhū ngaich chuh Yesrīl; pòn umuh Yōram nö hulalhaka. Yih inrē ang Ahāsiā ök rācha aṅ Yūtā nö chöhken Yōram.

¹⁷Sökhaka ök chamônga nö i Yesrīl i kui ök chūök chamônga, ngaich meuk tökiteūmhaka hol Yēhū ik yanīhih ò, ngaich ngö ṙô, Meuk töhĕng kiteūm chin. Ngö ṙô ngaich Yōram, Kē tarik hĕng tak mī-i uk kōra, tīnngen ò nö höngkūö cha, hökngen ò nö ngö ṙô, lanāmö öng?

¹⁸Ngaich hĕng tak ök tarik i uk kōra kumröönngöre nö höngkūö ò, ngaich ngö ṙô, Ngö ṙô ap rācha, Lanāmö önguh? Ngaich ngö ṙô Yēhū, Asuh ap lanāmö nö in meh? Havāngtöre man lā unôich chu. Ngaich ngö ṙô ök chamônga, Sölta ap tötīntu nö in cha, hö-ö pöri anga-aṅ nö havan nö hēk.

¹⁹Ngaich tīnngö innëtö anga-aṅ nö i uk kōra, ök tö sötta nö in cha ngaich ngö ṙô, Lanāmö önguh? Ngaich sapṙô ang Yēhū nö ngö, Asuh ap lanāmö nö in meh? Havāngtöre man lā unôich chu.

²⁰Ngaich ngö ṙô ök chamôngā, Sölta ök nö in cha, ngaich rö-ö nö havan: sā tī Yēhū an ngam maha-ō öp kikōnyö kūön Nimsī; pò ò nö öt milēḵ tī nö ahō rit.

²¹Ngö ṙô ngaich ang Yōram, Halēnö hī. Halēn ök inröl ò cha-a ngaich. Kiröönngöre ngaich Yōram ök rācha aṅ Israĕl tö Ahāsiā ök rācha aṅ Yūtā kö el inröl re, höngkūö Yēhū ngaich cha-a nö kiröönngöre ngaich kôtökūö, tö ò nö ik panô-òṅ Nēpòt ök aṅ Yesrīl.

²²Ngaich ngö inlahen angū-ö hē Yōram nö meuk kūö Yēhū, ngö ṙô ngaich ang-aṅ, Lanāmö önguh, Yēhū? Ngaich Sapṙô ò anga-aṅ nö ngö, Lanāmö yòh, yĕn ṙònghöinyṙen ap yöng meh kikānö Yesīpel nö asĕha ngaich nuk la-en milūönö ò inrē nö pōyen?

²³Chuvēkūö re ngaich Yōram, ngaich falngöre, ngaich ngö ṙô tö Ahāsiā, Ō Ahāsiā inpūtö kanô-en ap ihih.

²⁴Mā-ainy kumlēḵ re ngaich Yēhū nö tūök ök linreny re, ngaich nyaha hôi kūö hanīöng ang Yōram, ngaich ök chòk nö tafun köṅny kūö nö lök ik fanöinylö ò, salīni ngaich anga-aṅ nö el inröl.

²⁵Ngö ṙô ngaich Yēhū tö Pitkār ök mākūö kumyung ò, Chaplen ò, ngaich kavalngen ò el ap panô-òṅ minaha Nēpòt ök aṅ Yesrīl; köpölōn ök yöng ò Ahap, hakeunlen ò An ngam Mā Tēv tö ngih lumngan;

²⁶Höng sā vahë mat chin meuk mahām Nēpòt tö yik kikōnyö kūön ò inrē, Ngö ṙô ngam Mā Tēv; Havahal e chin min öich kamtö hih, ngö ṙô ngam Mā Tēv. Lökten kē an ngaich kavalngen ò kam tök chūök, sā ngam ṙô ngam Mā Tēv.

²⁷Ngaich hē Ahāsiā ök rācha aṅ Yūtā nö meūkö e, falngöre ngaich anga-aṅ nö lökngö el ök talöökö ök patī ök panô-òṅ. Lūkö rit ò ang Yēhū, ngaich ngö ṙô, Fëlan inrē nö el ngam inröl: Fëlan cha-a ngaich nö ip paneūlö Kūr, öp i Iplām. Falngöre ngaich anga-aṅ nö i Mekītō, ngaich kapah nö umuh.

²⁸Ngaich yik tarik ò, nö kēngen ò nö el inröl nö i Yērusalem, ngaich lāpngen ò nö ik kui kupah ò nö in yik yöng ò in öp elpanam Tāvit.

²⁹Im kinhuk sīönö samyeūheu Yōram ök kikōnyö kūön Ahap nö rultenre nö hayöng nö i Yūtā.

³⁰Ngaich hē Yēhū nö sölta nö i Yesrīl, hāngö e ngaich ang Yesīpēl; sun mat re ngaich anga-aṅ, ngaich kupunglö keūyöre nö el chalòng kūi re, ngaich môknyökūöre nö löknyö kūö inkūp kuföt.

³¹Ngaich hē Yēhū nö kuhēthötre nö i kūö inkūp, ngö ṙô ngaich Yesīpel, Lanāmö önguh, më-eṅ Simrī famëmngövah yöng re?

³²Môklökūöre ngaich anga-aṅ nö ik inkūp kūföt, ngaich ngö ṙô, Achiāp lamā in chu? Achīö? Nët tak hēk lūöi tak yik kumkantöre mamôknyökūöre nö in ò.

³³Ngö ṙô ngaich anga-aṅ, Sukten ò, Lökten cha-a nö sukten ò, ngaich rahëichyen nuk mahām ò tökachenyköti nö i kaha kinlōngö, i nup kōra inrē: ngaich lök kui ò anga-aṅ nö rööntö kui ò.

³⁴Ngaich hē ò nö kuhēthötre nyā ngaich anga-aṅ òk inrē ngaich ngö ṙô, Meuk ngam töthakôlöngṙô yin kikānö, lāpngen ò: tön kūön rācha an nö kikānö.

³⁵Kiröönngöre cha-a ngaich öt kanôtuvökūö tö alaha ò, höng ök kui, kalröön, tö kintāl eltī ò inrē.

³⁶Lökten cha nö havan nö hēk, ngaich vë-eny nang ò. Ngaich ngö ṙô anga-aṅ, Ṙô ngam Mā Tēv An angū-ö, nö ṙô ò nö in ök tarik ò Ēlaicha ök aṅ Tispī, nö ngö ṙô, Kamtö Yesrīl nup min am nö kā alaha Yēsipel:

³⁷Ngaich min ap alaha Yēsipel höng sā sôḵ nö i kūö ngam panam nö kamtö Yesrīl; hòṅ cha min nö öt ngö ṙô, Yēsrīl; ön ngòh.