Read Car_Nicobarese 1 KINṘÖTNGÖ 10 Bible Online

1 KINṘÖTNGÖ 10 - Car_Nicobarese bible

1 KINṘÖTNGÖ 10

¹Ngaich yik aṅ Filistain nö kiyung nö lā-al Israĕl, falngöre ngaich yik aṅ Israĕl, nö i kūö yik aṅ, Filistain, fukngö ngaich nö kapah nö i kui ök Rung Kilpō-a.

²Kô-òl ngaich yik aṅ Filistain nö in Sôl in yik kikōnyö kūön ò inrē; fëli ngaich tö yik aṅ Filistain Yônatan, Apinatap, Maikisūa inrē, yik kikōnyö kūön Sôl.

³Kalēḵ ngam kinyūngö nö in Sôl, ngaich yik lumreny nö kôtökūö tö ò; ngaich anga-aṅ nö nyahaṅv tö tī yik lumreny.

⁴Ngaich ngö ṙô Sôl töp kamëkö ök lanaklö ò, Hōknyö sanëtre man, sapngen chu tufunngökūö ò, hòṅ vē töttunyīnyi nö öt yih nö ha-önyngövah chu. Sōḵ pöri ök kamëkö ök lanaklö ò; pò ò nö kiröngö pinhëṅ-eṅkūö. Lökten Sôl nö kē ök sanët re, ngaich asīöchöre tö ò.

⁵Ngaich hē ök kamëkö ök lanaklö ò nö meūkö Sôl nö kapah, asīöchöre inrē anga-aṅ tök sanët ò, ngaich kapah.

⁶Ngatī kinpaha ngaich Sôl; anga-aṅ tö yik tölūöi tak kikōnyö kūön ò ṙongngövah inrē yik aṅ patī ò nö kapah.

⁷Ngaich hē yik tarik aṅ Israĕl yik mi-īyöng el achāṙö nö meuk yik kumyung nö falngöre tö Sôl inrē tö yik kūön ò kikōnyö nö kapah, ṙāngö nuk elpanam re cha-a ngaich nö falngöre; ngaich yik aṅ Filistain nö yih nö iyöng ël u.

⁸Im huṙöich hē yik aṅ Filistain nö yih nö luhngö chehen yik tökapah, kôtökūö cha-a ngaich tö Sôl yik kikōnyö kūön ò inrē nö hulalhaka i kui ök Rung Kilpōa.

⁹Luhngö chehen ò cha-a ngaich kē ök kui ò inrē tök lanaklö ò, tīnngö ma-ahānga nö keuheūt panam yik aṅ Filistain, nö kumtö tölöök inhānga nö i nuk insātēv cha in yik tarik inrē.

¹⁰Ngaich cha-a nö halinngen ök lanaklö ò nö el patī nuk tēv cha, ngaich tōkngö ök kui ò nö el patī Tēkòn.

¹¹Hē yik aṅ Yapeskīlīöt pöri nö hang tī yik aṅ Filistain tö Sôl,

¹²Ṙòkhöre ngaich yik töt pa-ekūö tarik nö chōholre, ngaich kēngö ök alaha Sôl tö nuk alaha yik kūön ò kikōnyö ngaich kēten u nö i Yapes. In e cha-a ngaich nö ulngö nuk tangëḵ cha elkatòh ök ōk i Yapes, sat sumkam ngaich nö ahik.

¹³Ngatī kinpaha ngaich Sôl tökūö ò nö öt kò-en, öt kò-en anga-aṅ nö i i ngam Mā Tēv tökūö ò nö öt haköp chöngö ngam Mā Tēv, kūö ò inrē nö hatöntöre nö in ök mameuk ma-alaha nö, lukkö inchōkūöre,

¹⁴Ngaich öt chöh inchōkūöre nö im Mā Tēv. Lökten ngam Mā Tēv nö fëlngen ò, ngaich kētö ök pūlngö ò nö in Tāvit ök kūön Yēsī.