Read Car_Nicobarese 1 KINṘÖTNGÖ 11 Bible Online

1 KINṘÖTNGÖ 11 - Car_Nicobarese bible

1 KINṘÖTNGÖ 11

¹Hamūlöre ngaich yik aṅ Israĕl nö in Tāvit nö i Hepròn, ngaich ngö ṙô, Yĕh meuk, tangëḵ meh in īhö alaha meh inrē.

²I tö misī pòrô hē Sôl nö rācha, ngaich më-eṅ mahachōnyen Israĕl kamëhĕtnen ò inrē: ngö ṙô inrē ngam Mā Tēv tö meh ngam Tēv meh, Më-eṅ man min yōm yip tarik chu Israĕl, ngaich më-eṅ min inrē rācha i kui yip tarik chu Israĕl.

³Lökten nö ṙòkhöre yik minṙöinylen aṅ Israĕl, nö yih nö ik rācha i Hepròn; kilēḵngôre ngaich Tāvit nö in cha nö i Hepròn nö i kūö ngam Mā Tēv, ngaich cha-a ngö hacham kui Tāvit nö rācha nö i kui Israĕl, sā ṙô ngam Mā Tēv nö lökten in Samuĕl.

⁴Ngaich Tāvit tö yik Israĕl nö ṙòkhöre inrē nö chuh Yērusalem, angū-ö an Yepus, elyöngö yik aṅ Yepus, yik aṅ ngam panam.

⁵Ngö ṙô yik aṅ Yepus tö Tāvit, Hö-ö man hōḵ yihtökūö ihih. Ngaich pöri Tāvit nö kē ök töngëḵ Sīyôn, angū-ö an elpanam Tāvit.

⁶Ngö ṙô ang Tāvit, Öp famëlngö yip aṅ Yepus min ngaich anga-aṅ min nö mu-urĕh nö yöngkūö kumyung. Ngaich Yô-ap ök kikōnyö kūön Sēruyā nö urĕhlö nö yônlö, lökten ò ngaich nö yöngkūö kumyung.

⁷Iyöng ël ngam töngëḵ chūök ngaich Tāvit; lökten e nö kaheūkö nö elpanam Tāvit.

⁸Ngaich anga-aṅ nö vīlö ök elpanam nö vinngö tī löktökūö Millō nö chuvī taptöre kūö; vītit nup tahëng im elpanam inrē ang Yô-ap.

⁹Ngaich Tāvit nö kiröng kirönglöre, pò ngam Mā Tēv yik tömaṙôngö nö in ò.

¹⁰Vē yin yöngkūö yik tökalēḵ tarik Tāvit, yik hamòltökūö ò nö im pūlngö ò, nö holre tö yik aṅ Israĕl, nö vīlen ò nö rācha, sā ngam ṙô ngam Mā Tēv nö in Israĕl.

¹¹Ngih ön yih ineūkö yik tökalēḵ tarik Tāvit: Yasopĕ-am, aṅ Hakmön, yöngkūö yik tölūöi tak; aṅtī tök vöi re anga-aṅ nö lā-al yik tölūöyòng töhĕng tum nyahāṅ nö fëli.

¹²Ṙanët ò in yik tölūöi tak tökalēḵ tarik ang Ēliēsör kikōnyö kūön Tōtō, aṅ Ahoh.

¹³In Tāvit anga-aṅ nö i Pestammim hē yik, aṅ Filistain nö hamūlöre nö hòṅ kiyung. Hĕng kamnāchö ök umuh tumlat tölööklö aṅ tö pārlī, ngaich yik tarik nö falngöre nö ṙā-ang in yik aṅ Filistain.

¹⁴Haköp röön re pöri anga-aṅ nö ellōn öp kamnāchö, nö laklö e, ngaich fëlngö yik aṅ Filistain; ngaich ngam Mā Tēv nö hayööken cha nö lökten im yöng minhôinyö.

¹⁵Lūöi tak yik tölūöi anāi yöngkūö yik tarik chu ik ihong nö in Tāvit ik kinluhu Atulam, hē yik kumyung aṅ Filistain nö i yöng el ök achārö Rifēm.

¹⁶Ngaich ngöh Tāvit nö el ök töngëḵ chūökre; ngaich yik kumyung aṅ Filistain nö kē-ĕ i Petlihem.

¹⁷Ngaich ngö ṙô Tāvit nö yīkölōn, Ō hĕng tak öp öre kamëtö òk chu tö mak tö aṅ ök tö-ūlö mak Pētlihem ngam mi-ikūö inkūp!

¹⁸Ngaich yik tölūöi tak tökalēḵ tarik nö tufunngöre nö ik elyöngö yik aṅ Filistain fòklö mak ngaich nö ṙā-ang el ök tö-ūlö mak i Petlihem ök mi-ikūö inkūp ngaich kēten e nö in Tāvit. Sōḵ pöri Tāvit nö ôkö e: ṙöstö e ngaich anga-aṅ nö im Mā Tēv,

¹⁹Ngaich ngö ṙô, Marôvat an yēḵ tö chu nö i kūö ngam Tēv chu tö chu ngatī. Òk mahām nômö vē tarik ṙöng öich? Pò cha nö kētö e. Lökten ò nö sōḵ nö ôkö e. Anū-ö nun në tī vē tökalēḵ tarik.

²⁰Ngaich Apīsai, ök hol maneuk Yô-ap, nö yöngkūö yik tölūöi anāi, Aṅtī tö vöi re anga-aṅ nö lā-al yik tölūöyòng tarik ngaich fëlngen cha, teunglö minë-eny ngaich nö i yik tölūöi tak.

²¹Anga-aṅ öku töyahlö ineūnyö nö in yik tölūöi anāi, anga-aṅ ngaich yöngkūö cha, hö-ö pöri nö söllö nö in yik tölūöi tak.

²²Penyā inrē ök kikōnyö kūön Yehōiatā töt pinhë-eṅvkūö nö tarik aṅ Kapsīl, tökiröngö vahīṙen; nët tak fahël anga-aṅ tö Ariĕl aṅ Mô-ap, kiröönngöre ang-aṅ inrē ngaich hĕng höiny nö fël lāyön nö el kinluhu nö hĕng heuh hē tökënngöre tacham nö paṙōngköti.

²³Hĕng höiny anga-aṅ inrē nö fëlngö aṅ Aikup öt tarik tömarôlòng taneui sumkôngö rôlö. Aṅhaṅv eltī ök aṅ Aikup tö vöi tö sā ṙôngòng yöng kinpāt hilā; chuh in ò pöri Penayā nöng tinkūngu, ngaich kichötngö ök vöi nö ṙā-ang eltī ök aṅ Aikup, fëlngen ò ngaich nö aṅtī tök vöi re.

²⁴Anū-ö nun tī Penayā ök kikōnyö kūön Yēhōyāta, ngaich teūngen tö minë-enyre nö hol yik tölūöi tak tökalēḵ tarik.

²⁵Tö-eūnyu anga-aṅ nö hol yik tölūöi anāi, hö-ö pöri anga-aṅ nö söllö nö in yik tölūöi tak. Ṙāten ò ngaich Tāvit nö i kui yik amahten ò.

²⁶Vē tökalēḵ tarik aṅ in yik kumyung, Asahel hol maneuk Yô-ap, Elhanan kikōnyö kūön Tōtō aṅ Petlihem,

²⁷Sammòt aṅ Haròt, Hēles ök aṅ Pĕlòn,

²⁸Ira kikōnyö kūön Ikhes aṅ Tekō-a, Apī-ēsör aṅ Anatòt,

²⁹Sīpĕkai aṅ Husat, Ilai aṅ Ahòh,

³⁰Maharai aṅ Nētōfāh, Helet kikōnyö kūön Pe-anā aṅ Nētōfāh,

³¹Itai kikōnyö kūön Ripai aṅ Kīpī-a i Penyamin, Penāya aṅ Piraton,

³²Hurai aṅ i nuk kun töhëm mak i Kā-as Apī-ĕl aṅ Arpat,

³³Asmavet aṅ Paharum, Elipā aṅ Sa-alpòn,

³⁴Hāsem aṅ Kīson, Yônatan kikōnyö kūön Sakō aṅ Harar,

³⁵Ahīyam kikōnyö kūön Sakar aṅ Haras, Elifal kikōnyö kūön Ör,

³⁶Hīför aṅ Mekarāt, Ahiyā aṅ Pēlòn.

³⁷Hesrō aṅ Kārmel, Nē-arai kikōnyö kūön Ispai,

³⁸Yô-el ök hol maneuk Nātan, Mīphar kikōnyö kūön Hakrī,

³⁹Sēlek aṅ Amön, Nahārai aṅ Pi-eròt, kamëktö lanaklö Yô-ap ök kikōnyö kūön Serūyā,

⁴⁰Ira aṅ Itar, Kārep aṅ Itar,

⁴¹Urayā aṅ Hītait, Sapāt kikōnyö kūön Ahlai,

⁴²Atina kikōnyö kūön Sīsa aṅ in yik Rūpön, yöngṙen yik Rūpön, lūöi anāi yik hol ò inrē,

⁴³Hanan kikōnyö kūön Mēaka, Yôsafāt inrē aṅ Mītin,

⁴⁴Usī-a aṅ Astarat, Samā Yē-i-ĕl inrē kikōnyö kūön Hōtam aṅ Arō-er,

⁴⁵Yētīya-el kikōnyö kūön Simrī, Yôha inrē hol maneuk ò, aṅ Tis,

⁴⁶Ĕli-el aṅ Mahav, Yërīpai inrē Yôsavīya inrē yik kikōnyö kūön Elnā-am, Itma inrē aṅ Mô-ap,

⁴⁷Eli-el Opĕt inrē Yē-asī-el inrē aṅ Mēsōpa.