Read Car_Nicobarese 1 KINṘÖTNGÖ 12 Bible Online

1 KINṘÖTNGÖ 12 - Car_Nicobarese bible

1 KINṘÖTNGÖ 12

¹Cha-a yin vē tarik yamih nö in Tāvit nö i Siklek, hē ò nö öt chuhēṙen nö havötköre cha-a yin inrē aṅ in yik tökalēḵ tarik hamòlṙen ò el kinyūngö.

²Lumreny yik nö tarik tömihôin nö lirenyngö chòk, chu-vīl ihong inrē nö aṅngöre lā-a, hāmö tavē inrē; aṅ Penyamin yik, mak alaha Sôl.

³Haī-esör ök yöngkūö, ngaich hēk Yô-as, nak kikōnyö kūön Semē-ah aṅ Kīpī-a; Yēsī-ĕl inrē tö Pēlĕt nak kikōnyö kūön Asmavet; Përaka, Yēhū aṅ Anatòt,

⁴Ismayā aṅ Kipīön tökalēḵ nö tarik aṅ in yik tölūöi anāi yöngṙen inrē nö i kui yik tölūöi anāi; Yarimiā, Yahasī-el, Yōhanan, Yōsapat aṅ Këtīrah,

⁵Elusai Yērimòt, Pī-ali-a, Semarīyā, Sefatīyā aṅ Haruf;

⁶Elkāna, Isīyā, Asaril, Yō-esör, Yasōpē-am inrē aṅ in Kōra;

⁷Yô-elā inrē tö Sĕpatīya, kikōnyö kūön Yērōham, aṅ Kitōr.

⁸Aṅ in yik Kāt yik umuh mahavāngtöre nö in Tāvit ik töngëḵ chūökö elnyalnyi tökalēḵ töha-eh inrē nö kumyung, töhuveū nö i lanaklö vöi inrē, yih tösā arëkūö lāyön, töveut inrē sā vaneūtö kēsöl nö i kui rôngö:

⁹Ĕsör ök yöngkūö, Opētiyā innëtö, Ēli-āp linūöyö,

¹⁰Mismana finënö, Yarimiā tinneūyö,

¹¹Attai tinfūölö Ēli-ĕl sinātö,

¹²Yōhanan hinëvhöre, Ēlsapāt minchūötöre,

¹³Yarimiā sinömö, Makpe-anai kinhuk sīönö.

¹⁴Yöngkūö kumyung yin vē aṅ Kāt, öp tökūönö i kui töhēngòng öp tökiröng inrē i kui töhĕng köṅny.

¹⁵Cha-a yin vē tarik mahavāngngö kui Yôtön ik raneh chingëṅt, hē e nö taṙēchi kui, pāngö tī ngaich tö yik el achāṙö nö ṙòkhöre, lā chuhöt lā sūng inrē.

¹⁶Rīkre yik tarik Penyamin Yūtā inrē yamih nö ik töngëḵ chūök Tāvit.

¹⁷Kunyī-inyre ngaich Tāvit nö höngkūö cha ngaich ngö ṙô tö cha, Yē yīö holrevöṙô yih in chu öi holṙen chu, mūlta min öp ellōn chu nö in yīö; yē e pöri nö inchīlngövah chu in yip lā-al chu, öich tö pòrô öt aṅhaṅv eltī tö tövach, ngam Tēv yik yöng hī an yēḵ mameūkö e vëken yīö inrē.

¹⁸Yih ngaich ngam Töhet Fanöinylö nö i kui Amāsai, yöngkūö yik tölūöi anāi, ngaich ngö ṙô anga-aṅ. ʽʽŌ Tāvit, më-eṅ meh in; Ō kūön Yēsī, hol meh in! Lanāmö, lanāmö in meh, Lanāmö inrē in yip hamòlṙen meh! Pòn holṙen meh ngam Tēv meh.ʼʼ Ngaich Tāvit nö kē-ĕ cha, vīlen cha ngaich nö yöngkūö yik kumyung in ò.

¹⁹Rīkre yik tarik Manasē ṙāmā-angre nö chuh in Tāvit hē ò nö yih nö holtö yik aṅ Filistain nö ik kinyūngö nö lā-al Sôl. (Hö-ö pöri anga-aṅ nö holṙen cha, pò yik mā aṅ Filistain nö vë-ekūöre ngaich tīnngörit ò, nö ngö ṙô, Kihten elkui in min ayī-ö yē ò nö ṙāngen hī nö chuh in Sôl.)

²⁰Isāha ò nö chuh Siklek vē yin tarik Manasē mahavāngtöre nö in ò: Atnah, Yōsapat, Yatiya-el, Maiköl, Yōsapāt, Ēlihū, Siletai inrē yöngkūö tököṅnyu in Manasē.

²¹Holṙen Tāvit cha-a nö lā-al yik töng kamiltöre tö inlānen holre; pò cha nö ṙòkhöre nö tö-eūnyuvö tökalēḵ inrē nö tarik, yöngṙen inrē nö in yik kumyung.

²²Örhĕng hang sumkam yanīhih yik tarik nö in Tāvit nö holṙen ò, hanöng saha yik kumyung nö kiröngen, sā kumyung aṅ im Tēv.

²³Në nun tum miyöngö yik tö-aṅhāṅv tī kumyung yik yamih nö in Tāvit nö i Hepròn nö kamëtö ngam pūlngö Sôl nö in Tāvit sā ngam ṙô ngam Mā Tēv.

²⁴Tarik aṅ Yūtā kamëkö lanaklö vöi inrē tafūöl köṅny hëvhörṙòng tö-aṅhāvṅvti kumyung.

²⁵Aṅ in Sīmōn, tö-eūnyu tökalēḵ tarik inrē nö i kinyūngö, sat köṅny hēngòng.

²⁶Aṅ in Lēvī fën köṅny tafūölòng.

²⁷Ök kūön rācha Yēhōyata, aṅ patī Āròn, hol ò inrē lūöi köṅny sātòng

²⁸Sētòk ṙal tarik tö-eūnyu nö tökalēḵ, nët anāi nët tak yik yöngṙen aṅ patī ök yöng ò,

²⁹Aṅ in Penyamin, mak alaha Sôl lūöi köṅny pōyen yik aṅ in cha mahaköpngöre nö i patī Sôl.

³⁰Aṅ in Ifrēm nët anāi köṅny hëvhöre ṙòng, tökalēḵ tarik, tö-eūnyu nö i patī yik yöng cha.

³¹Ròngti aṅ miyöngö Manasē hëvhör sīön köṅny, yik töminënyu nö yih nö vīlen Tāvit nö rācha.

³²Aṅ in Isakār tarik yik tö-akaha elmat tö nuk ṙētak, tö-akahalōn tök töhōtu la-en Israĕl, nëtòng yöngkūö, ṙòkhöre yip mak alaha cha inrē nö el katòh chöngö cha.

³³Aṅ Sepulön taneui anāi köṅny tö-ulòhten nö ngaich nö kumyung, tökētuṙen aṅtī nö i kinyūngö tö nup taṙòkhöre chehetī i kinyūngö, nö holṙen Tāvit nö hēngòng ellōn.

³⁴Aṅ in Naftalī hĕng köṅny yöngṙen yik töhōlu tö yik tölūöi anāi sat köṅny tarik töchehevti tö lanaklö vöi inrē.

³⁵Aṅ Tën nët anāi hëvhöre köṅny tafūölòng tarik tö-aṅhavtī nö i kinyūngö.

³⁶Aṅ Asēr fën anāi köṅny tö-ulòhten kumyung lēn nö i kinyūngö.

³⁷Aṅ in Rūpön Kāt inrē ròngti inrē miyöngö Manasē nö ṙeū-eung lāmuh tö Yôtön, hēngòng nët anāi köṅny tarik tö aṅhavin tö nup taṙòkhöre chehetī i kinyūngö.

³⁸Ṙòkhöre vē, tarik kumyung, töhatöökö nö i kinyūngö, yih vīlen Tāvit nö rācha i kui Israĕl nö ṙòkhöre; ngatī inrē yik Israĕl nö ṙòkhöre nö hēngòng ellōn nö vīlen Tāvit nö rācha.

³⁹Ngaich umuh cha-a nö in Tāvit lūöi sumkam, nyā-aṅvkūö òk inrē, pò yik hol cha nö halēn mineukṙen cha.

⁴⁰Ngaich inrē yik hol cha, marôvat löktökūö Isākār, Sepulön, Naftalī inrē yih nö kumtö nyā-aṅkūö i uk köttö, ūṅt miūl kōiny nuā inrē, pōyen nup töfaṙëcha atra, ṙòng anychīr kēk tövī-i, tötumre tönyô angkūr, vāin tavī-i inrē, kōiny nuā sīṅp inrē, pòn ṙanāmölōn ök umuh in Israĕl.