Read Car_Nicobarese 1 KINṘÖTNGÖ 13 Bible Online

1 KINṘÖTNGÖ 13 - Car_Nicobarese bible

1 KINṘÖTNGÖ 13

¹Ngaich ang Tāvit nö vë-ekūö yik yöngṙen tököṅnyu töṙôngu inrē, nö kö kahĕng tak vahë-ekūö tö yöngṙen.

²Ngaich ngö ṙô Tāvit tö yik tömūl nö ṙòkhöre aṅ Israĕl, Yē e nö tölöök nö in yīö yē e inrē nö lōn ngam Mā Tēv ngam Tēv hī, tā-a töi söömhanga marô-òlkūö in yip hol hī töng ngöh aṅ panam Israĕl, hol cha inrē nö chuh in yip kūönṙô yip Lēvī inrē i nup elpanam tö-aṅhāṅvkūö panam tö kiyôp, hòṅ cha nö holre nö yihtöre nö in hī.

³Ngaich tā-a töi hēk kētö ap kasòng chöngö ngam Tēv hī nö in hī, tön höng rö-ö in miṙūöt tö e hēngen tö nuk sakāmö Sôl.

⁴Ṙòkhöre ngaich yik tömūl nö hō-olōn tö e pò e nö tölöök nö i mat yik tarik nö ṙòkhöre.

⁵Lökten Tāvit nö hamūl yik Israĕl nö ṙòkhöre löktökūö Sīhōr i Aikup Söl ip lökhöt i Hamat, nö kētö ngam kasòng chöngö ngam Tēv nö ṙeū-eung Kiriatyēarim.

⁶Ngaich hēk Tāvit tö yik Israĕl nö ṙòkhöre nö chuh Pē-alā, ngam angū-ö, Kiriatyē-arim ngam aṅ panam Yūtā, nö ṙeū-eung umuh nö kē-ĕre ngam kasòng chöngö ngam Tēv, ngam tökaheūkö tö minë-eny ngam Mā Tēv ngam amūichhaka nö el kantēra latulöng tö nup kërup.

⁷Ngaich cha-a nö kē ök kasòng chöngö ngam Tēv nö el tufömngöre inröl, ṙā-ang patī Apinatap, ngaich Ūsa, Ahi-ō inrē nö yōm ök inröl.

⁸Ṙòkhöre ngaich hēḵ Tāvit tö yik aṅ Israĕl nö ṙamölōn nö i kūö ngam Tēv nö mā-ainyre, holtö tinkökö, hārp, tampōröm, simpôl, römpĕt inrē.

⁹Ngaich hē cha nö sölta nö i chūök pinṙōngö sāiny Kītòn, silô tö këlre Ūsā nö ṙapkö ök kasòng chöngö, pò nuk kōiny nuā nö kavē-ĕre.

¹⁰Hūlökūö ngaich ök tanānyö ngam Mā Tēv nö in Ūsā; chökhutī ngaich anga-aṅ tö ò pò ò nö silô tö kël re nö ik kasòng chöngö; kapah ngaich anga-aṅ nö i kūö ngam Tēv nö umuh.

¹¹Tainy ngaich ang Tāvit pò ngam Mā Tēv nö tainy nö in Ūsa; ngaich kaheūkö ök chūök nö Pērĕsūsa söl ing töngamuh.

¹²Pa-ekūö ngaich Tāvit tö ngam Tēv ik sakāmö angū-ö; ngö ṙô ngaich anga-aṅ, Sitih kanô-òṅ öichvö kētö ngam kasòng chöngö ngam Tēv nö i patī chu?

¹³Lökten Tāvit nö öt kētö ök kasòng chöngö nö i patī elpanam Tāvit, höng sirēngö e pöri anga-aṅ nö i patī Opēt-ētöm ök aṅ Kit.

¹⁴Ngaich ngam kasòng chöngö ngam Tēv nöng ngöh nö lūöi chumngëṅtö nö in yik aṅ patī Opētētöm el patī ò; ngaich ngam Mā Tēv nö kôlò tī tö aṅ Patī Opētitöm nup taṙòkhöre in ò inrē.