Read Car_Nicobarese 1 KINṘÖTNGÖ 14 Bible Online

1 KINṘÖTNGÖ 14 - Car_Nicobarese bible

1 KINṘÖTNGÖ 14

¹Ngaich Hairām ök rācha aṅ Tūrös nö tīnngö ma-ahānga nö in Tāvit, sītör chōn inrē vamī ihong tö mistirī nö mānlö patī ò.

²Ngaich Tāvit nö meuk ngam Mā Tēv nö haköpngen ò nö rācha nö i kui Israĕl, tö ök pūlngö ò inrē nö hapōilöng tö pòkūö yik tarik ò Israĕl.

³Ṙūölö ṙôken pīhöre ngaich Tāvit nö i Yērusalem, pōyen hakūönti inrē Tāvit tö nyīö kikōnyö kikānö inrē.

⁴Në nun minënyö yik nyīö yik in ò nö i Yerusalem: Sammū-a, Sōpāp, Nātān, Sòlòmön,

⁵Iphār, Elisū-a Ēlpēlĕt,

⁶Nōkah, Nēfĕk Yāfī-ā,

⁷Ēlīsāma, Pēli-atā, Ēlifëlet inrē.

⁸Hē yik aṅ Filistain nö hāngö Tāvit nö hachāmö kui nö rācha nö i kui Israĕl nö ṙòkhöre, ṙòkhöre ngaich yik aṅ Filistain nö kiröönngöre nö chöhö Tāvit; hāngö e ngaich Tāvit ngaich kiröönngöre nö lā-al cha.

⁹Yih yik aṅ Filistain nö el achāṙö Rifēm nö kilöön inlānen.

¹⁰Hatöntöre ngaich Tāvit nö im Tēv, Kiröönngöre öichu lā-al yip aṅ Filistain? Kēten cha öm min eltī chu? Ngaich ngö ṙô ngam Mā Tēv tö ò, Kuṙòh, kēten cha chin min eltī meh.

¹¹Lökten ang Tāvit nö kilöönö cha nö i Pāl Perasim ngaich mihôiṅ tö cha. Ngaich ngöṙô anga-aṅ, “Halöngten chu an ngam Tēv kuhēthötre sā ṙanöingö öich i yip lā-al re”. Lök ök chūökö nö Pāl Perasim invëka.

¹²Ṙāngö nuk tēv re cha-a nö umuh, kētö chöngö ngaich Tāvit, föngi ngaich anū-ö.

¹³Hēk nö sönen yik Filistain nö el achāṙö nö kilöön inlānen.

¹⁴Ngaich hē Tāvit nö hēk nö hatöntöre nö im Tēv, ngö ṙô ngaich ngam Tēv tö ò, Uh man kiröönngöre öm löklö lā-uk cha; kiröönngöre pöri havīngöre ngaich yih in cha kamtö nup palsam chōn.

¹⁵Ngaich yē meh hangṙô röön kumröönngöre nö el kui nup palsam chōn ngaich möl më-eṅ kuṙòh kiyung; tön ngaich an ngam Tēv nö urēhĕkūö meh nö fël yip aṅ Filistain kumyung.

¹⁶Ngaich Tāvit nö sā ṙô ngam Tēv nö tölṙô ò, ngaich cha-a nö fël yip kumyung aṅ Filistain löktökūö Kīpīön tölngö Kēsör.

¹⁷Keuheūtngöre chūök ngaich ineūnyö Tāvit nö i minë panam, ngaich ngam Mā Tēv nö kētö kui yik pumnāmö tarik nö pa-ekūö tö ò.