Read Car_Nicobarese 1 KINṘÖTNGÖ 15 Bible Online

1 KINṘÖTNGÖ 15 - Car_Nicobarese bible

1 KINṘÖTNGÖ 15

¹Ngaich Tāvit nö mānlö patīre nö ël ök elpanam Tāvit; ane inrē anga-aṅ halēn chūök ök kasòng chöngö ngam Tēv, vītö chūök inrūkui e inrē.

²Ngö ṙô ngaich Tāvit, Öthĕngtak höng yip Lēvī kameun ngam kasòng chöngö ngam Tēv, pò ngam Mā Tēv nö katöllen cha nö kameun ngam kasòng chöngö ngam Mā Tēv mameukṙen ò inrē nöng örheūheu.

³Hamūl yik aṅ Israĕl ngaich Tāvit nö ṙòkhöre nö i Yerūsalem nö kētö öp kasòng chöngö ngam Mā Tēv nö ik chūök e, ök halēnken ò chūök e.

⁴Hamūl yik kikōnyö kūön Āròn inrē anga-aṅ tö yik Lēvī:

⁵Aṅ in yik kikōnyö kūön Kōhat, Uri-ĕl yöngkūö, holtö töhēngòng nët anāi; hol maneuk ò;

⁶Aṅ in yik kikōnyö kūön Mērāri. Asāyā yöngkūö, holtö tönëtòng, nët anāi hol maneuk ò;

⁷Aṅ in yik kikōnyö kūön Kersōm, Yô-el yöngkūö, holtö töhēngòng lūöi anāi hol maneuk ò;

⁸Aṅ in yik kikōnyö kūön Elīsafān, Samāyā yöngkūö, holtö tönëtòng hol maneuk ò;

⁹Aṅ i yik kikōnyö kūön Hepròn, Eli-ĕl yöngkūö, holtö töhëvhör anāi hol maneuk ò:

¹⁰Aṅ i yik kikōnyö kūön Usiel, Aminatap yöngkūö, holtö töhēngòng nëtsīön tak hol maneuk ò;

¹¹Ngaich Tāvit nö havanten nak kūönṙô nā Sētòk, Apīatör inrē, tö yik Lēvī hēk Urī-el, Asāyā, Yô-ĕl, Samayā, Eli-ĕl, Aminatap inrē,

¹²Ngö ṙô ngaich tö cha, Yī-ö yin yöngkūö patī yik yöng Lēvī; ahetlöre yin, yī-ö tö yip hol maneuk yīö, hòṅ yīö kētö öp kasòng chöngö ngam Mā Tēv, ngam Tēv Israĕl, ip chūök e töhalēnkaṙen tö chu.

¹³Kūö yīö ik la urĕh öt keūnö e ngaich ngam Mā Tēv ngam Tēv hī nö tāiny nö in ih pò ih öt milēṙen tö e nö sā inchöngten re nö in e.

¹⁴Ahetlöre ngaich yik kūönṙô tö yik Lēvī nö kēlö ök kasòng chöngö ngam Mā Tev, ngam Tēv Israĕl.

¹⁵Ngaich yik Lēvī nö keun ök kasòng chöngö ngam Tēv nö el ranôṙö cha, nö kaneūnu, sā inchöngten re tö Môsös nö sā ngam ṙô ngam Mā Tēv.

¹⁶Ngaich ang Tāvit nö tölṙô yik yöngkūö aṅ in yik Lēvī nö vīlö yik hol maneuk cha nö tumkökṙôre yik töhōtu nö pōitô tī nö röng nuk ranöng, i hārp, līör, simpôl inrē, nö hachônglö ṙô ṙanāmölōn.

¹⁷Lökten yik Lēvī nö vīlen Heman ök kikōnyö kūön Yô-ĕl; ök hol maneuk ò inrē Asaf kikōnyö kūön Perekiyā; aṅ in yik kikōnyö inrē kūön Mērārī, hol maneuk cha, Ētan ök kikōnyö kūön Kusayā;

¹⁸Hol cha inrē yik hol maneuk cha im innëtö chūök Sekariyā Yē-asi-el, Semiramòt Yēhī-ĕl, Unnī, Ēli-ap, Pennayā, Me-asīyā, Matītīyā, Ēlifelehu Mikneyā inrē, yik yōmkūö inkūp inrē, Opĕtitöm Ye-ī-el inrē;

¹⁹Tumkökṙôre, Hēman, Asaf, Etān inrē, cha-a pamòng mās simpôl;

²⁰Sekariyā, Asī-el, Semiramôt, Yehī-el, Unnī, Elī-āp, Mē-esī yā, Pennayā inrē ramöng Hārp nö sātī Alamòt;

²¹Matitiyā pöri Elifelehū, Miknëyā, Opĕt-ĕtöm, Ya-i-el, Asasīyā inrē mahachōḵlö ṙô nö aṅtī tö līör sātī Semīnit.

²²Kenneyā yöngṙen yik Lēvī nö i ëlö tinkökö, cha-a mahachōḵ tö ëlö tinkökö, pò ò nö töakaha elmat.

²³Perekiyā, Elkāna inrē yōm kūö inkūp ök kasòng chöngö.

²⁴Sipaniyā, Yôsafat, Natanĕl, Amasāi, Sakariya, Pennayā, Ēli-ĕsör, tö yik kūönṙô, famöö römpĕt nö i kūö ök kasòng chöngö ngam Tēv. Opĕtitöm, Yahī-a inrē yōmkūö inkūp ngam kasòng chöngö.

²⁵Lökten Tāvit tö yik minṙöinylen Israĕl, tö yik yöngkūö tököṅnyu inrē, nö kiröönngöre nö kēlö ök kasòng chöngö kinlēḵngô ngam Mā Tēv nö ṙā-ang patī Opĕtitöm nö holtö ṙanāmölōn.

²⁶Kūö ngam Tēv inrē nö holṙen yik Lēvī yik kameun ök kasòng chöngö kinlēḵngô ngam Mā Tēv, kētö tökētu cha-a sat nòng kōiny nuā sat nòng inrē kūön sīṅp.

²⁷Hayūtöre ang Tāvit tö tövai linen hilā, ngatī inrē nö ṙòkhöre yik Lēvī yik kameun ök kasòng chöngö, tö yik tumkökṙôre, Kenneyā inrē mahachōlö ṙô yik tumkökṙôre; hayūtö inrē Tāvit tö linen Sörplis.

²⁸Lökten yik Israĕl nö ṙòkhöre nö kēlö ök kasòng chöngö kinlēḵngô ngam Mā Tēv nö holtö inyôṙö ṙô, I ṙô sinrōl nö fööṙö, römpĕt, simpôl inrē pōitô inrē ëlö tinkökö nö i ṙô hārp, līör inrē.

²⁹Ngaich hē ngam kasòng chöngö kinlēḵngô ngam Mā Tēv nö yih nö ik elpanam Tāvit, môknyö kūönre ngaich Maiköl nö löknyö kūö inkūp lökhöt kuföt, ök kikānö kūön Sôl, ngaich ök rācha Tāvit nö kiṙīöm nö ṙāmölōn; ngaich anga-aṅ nöng ellōn re lōn nö ahūöngen ò.