Read Car_Nicobarese 1 KINṘÖTNGÖ 16 Bible Online

1 KINṘÖTNGÖ 16 - Car_Nicobarese bible

1 KINṘÖTNGÖ 16

¹Ngaich cha-a nö kēhĕt ök kasòng chöngö ngam Tēv, ngaich ṙātö e nö el ök rūkui vahīlö Tāvit nö chūök e; kētö töföngö tökētu cha-a ngaich inlām tökētu inrē nö i kūö ngam Tēv.

²Ngaich hē Tāvit nö keuheūten nö kētö töföngö tökētu tökētu inrē inlāmö, hakôlò yik tarik ngaich anga-aṅ nö i minë-eny ngam Mā Tēv.

³Michööḵ yik Israĕl inrē nö ṙòkhöre, hĕnghöre kikōnyö kikānö inrē, kököhĕng vat tö rôti, hĕng michūöṙö alaha, kēk inrē nup tönyô angkūr.

⁴Vīlö yik rīkre inrē Lēvī anga-aṅ nö mameukṙen nö i kūö ngam kasòng chöngö ngam Mā Tēv nö mahavë-a, maha-öinytö tī, maha-öiny ngam Mā Tēv inrē, ngam Tēv Israĕl.

⁵Asaf ök yöngkūö, ṙanët ò yin vē Sakaria, Yē-i-el, Semīramòt, Yēhi-el, Matītiyā, Ēli-āp, Pennayā, Opĕtitöm. Yē-i-el inrē, ramöng hārp līör inrē, Asaf ök pamòng simpôl,

⁶Pennayā inrē tö Yahasī-el nak kūönṙô tö iṙūöhö ṙô nö föö römpĕt, nö i kūö ök kasòng kinlēḵngô ngam Tēv.

⁷Ngaich ik sakāmö angū-ö ang Tāvit nö rĕhtenre nö vīlö nöinyö tö tikökö nö im Mā Tēv tö Asaf yik hol maneuk ò inrē.

⁸Ō ha-öny ngam Mā Tēv, havëkö minë-eny ò, Mikahtölōn in yip tarik tö nup vahīṙen ò!

⁹Tikökhökūö ò, ha-öinyan tīkökṙôre, Vënyö nup pinngangkūö la-en ò!

¹⁰Eu-eūre im töhet minënyö; Hökngen nup ellōn yip chamöh ngam Mā Tēv nö ṙāmölōn!

¹¹Chöh ngam Mā Tēv tö ngam kumlēḵ ò Chöh ngam kūö ò inṙūöhen!

¹²Köpölōn tö nuk pinngang- kūö la-en ò nuk tökeuheū- ten, Nuk pinngangkūö tī ò, inkaha fālen ṙô ò,

¹³Ō kūön Aprahām ök tarik ò, kikōnyö kūön Yāköp, yik ka- töllö ò!

¹⁴Anga-aṅ an Mā Tēv, Tēv hī; i në tumlat nup inkahafālen aṅ in ò.

¹⁵Kūötenre an nö örheūheu tö ngam kinlēḵngô aṅin ò, ngam ṙô hachöngten ò, I tököṅnyu tumköl chap,

¹⁶Ngam kinlēḵngô vahīten ò in Aprahām, ngam töchūöku kinlēḵngô ò in Isāk,

¹⁷Ngam haköpngö ò inchöng- ten in Yāköp, Sā töt chanūhuvṙen kinlēḵngô in Israĕl.

¹⁸Tö ngö ṙô, In meh tī chin min kētö ngam panam Kanā-an, nö minchööḵö meh nö amin.

¹⁹Hē cha nö ṙòngmö kūönen, nö töt kaheuktu inrē, törahëich- taṙen nö iyöng in e,

²⁰Ṙeū-eung pumnāmö tarik söl im tahëng, nöng karööna röön, löktökūö im töhĕng pūlngö söl i tahëng tarik,

²¹Öthĕng tak halöngten an tö mahakihten cha; chöö-önyten cha an nö vëkö rācha,

²²Nö ngö ṙô, Un lūölka më hacham kui chu, Un hachökö më pròfĕt chu!

²³Ṙòkhöre tumlat, tikökhökūö ngam Mā Tēv! Kaheuk sakāmö vënyö ngam inyööken aṅ in ò.

²⁴Vënyö ngam kanôlò ò in yip pumnāmö tarik, minë pinngangkūö la-en ò in yip tarik!

²⁵Tön kiröng an ngam Mā Tēv töhòṅ kiröngö nöinyö, Töhòṅ pahë-evö an inrē nö tulöng tö nup tēv.

²⁶Pò nup tēv yip tarik nöng insātēv; Vamīlö halīöngö pöri ngam Mā Tēv.

²⁷Ineū-eu, minā-aṅ inrē i kūö ò; kumlēḵ, ṙanāmölōn inrē im chūök ò.

²⁸Ha-öiny ngam Mā Tēv, Ō mupīhö tarik, ha-öiny ngam Mā Tēv kanôlò kumlēḵ inrē!

²⁹Ha-öiny ngam Mā Tēv tö ineū-eu minë-eny ò; Kētö tökētu, yihtöre i kūö ò! Salām ngam Mā Tēv haṙāköre im töhet;

³⁰Kichëyöre i kūö ò, ṙòkhöre tumlat; hòn, köp öthētu nö halöinyköre.

³¹Hökngen minë halīöngö nö ṙāmölōn, ngam tumlat inrē nö haṙamlōnre, hökngen u nö ngö ṙô in vē pumnāmö tarik, Hayöng an ngam Mā Tēv!

³²Hökngen ngam mai nö ṙënuṙô, tö nup aṅ e inrē, hökngen nup elngāṅṙö nö hapōilôre, tö nup aṅ e inrē!

³³Ngaich tikökṙôre min nup chōn el inchōn nö ṙāmölōn I kūö ngam Mā Tēv, tön yih an nö akah fālen ngih tumlat.

³⁴Ō hā-öiny ngam Mā Tēv, pò ò nö tölöök; pòn köp ngam hanāngen ò nö örheūheu!

³⁵Ngö ṙô inrē: Ṙānyen ih, Ō Tēv inyööken ih, hamūlö ih hayööken ih inrē ṙā-ang in yip pumnāmö tarik, hòṅ ih ha-öiny ngam töhet minënyö meh, Ineū-eu yēḵ inrē im nöinyö meh.

³⁶Tökôlò an yēḵ ngam Mā Tēv, ngam Tēv Israĕl, nö töng öt chanūhevṙen! Ngö ṙô ngaich yik tarik Āmen! Ha-öiny ngam Mā Tēv yēḵ

³⁷Ṙāngen Asaf ngaich Tāvit nö umuh tö yik hol maneuk ò inrē i kūö ök kasòng kinlēḵngô ngam Mā Tēv nö iṙūöhen nö meukṙen nö i kūö ngam kasòng chöngö nö asā la-en töhĕng sakāmö,

³⁸Opĕtitöm inrē tö yik tötafūöl anāi hëvhöre hol maneuk cha; Opĕtitöm pöri, ök kikōnyö kūön Yētūtun, Hōsā inrē nö yōmkūö inkūp.

³⁹Ṙā-ayö inrē Sētòk ök kūönṙô yik hol maneuk ò inrē kūönṙô nö i kūö ngam inrūkui ngam Mā Tēv ik latulöng chūökö ök i Kīpīön,

⁴⁰Nö föng tökētu nö im Mā Tēv el ök tahāklö töföngö tökētu nö örheūheu peuheū harap, sā kinūchngö e nö im chöngö ngam Mā Tēv i inchöngten Israĕl tö ò.

⁴¹Hol cha ang Haman Yētūtun, yik hol cha tökatöllöng töpötiṙen nö minënyu nö ha-öiny ngam Mā Tēv, tökūö ngam tököp hanāngenlōn ò nöng öt chanūhuvṙen.

⁴²Inu ang Haman Yētūtun inrē tö römpĕt simpôl inrē nö i ëlö tinkökö tö ranöng töhet tinkökö inrē. Vīlöngö yik kikōnyö kūön Yētūtun nö ik inkūp.

⁴³Ṙòkhöre ngaich yik tarik nö kö kiröönngöre nö i patīre, chuh patī re inrē Tāvit nö hakôlò yik aṅ patī re.