Read Car_Nicobarese 1 KINṘÖTNGÖ 17 Bible Online

1 KINṘÖTNGÖ 17 - Car_Nicobarese bible

1 KINṘÖTNGÖ 17

¹Iyöng el patī re ngaich Tāvit, ngö ṙô ngaich Tāvit, tö Nātan ök pròfĕt, Yĕh meuk, iyöng el patī chin chū-ö töchōntö sītör, ngaich pöri ngam kasòng kinlēḵngô ngam Mā Tēv nöng el katòh rūkui.

²Ngö ṙô ngaich Nātan tö Tāvit, Kē-ĕkūöre man töp ellōn meh, tön in meh an ngam Tēv.

³Im hatööm pöri angū-ö nö yih ngam ṙô ngam Mā Tēv nö in Nātan.

⁴Kuṙòh vë-eny nang ap tarik chu Tāvit, Ngö ṙô an ngam Mā Tēv: uh man mānlö patī chu tö chūök chu iyöng.

⁵Tön rö-ö chin iyöng elpatī hēten tö ök sakāmö chu hachōnyen Israĕl söl ing töngamuh, ngaich pöri chū-ö kiröönngöre löktökūö ngih rūkui söl i ngī-aṅ rūkui löktökūö ngih elyöngö inrē söl i ngī-aṅ elyöngö.

⁶I nup taṙòkhöre chūökö chūök chu havötköre in yip Israĕl, hĕng höiny milôhò öichu tö ṙô in yip kamhôka i Israĕl, yip tö tölöṙô tö chu nö hayōm vē tarik chu, öich ngö ṙô, Kūöyòh öyih öt mānlö patī chu tö töt chōntö sītör?

⁷Lökten man töngamuh ngö ṙô töp tarik chu Tāvit, Ngö ṙô an ngam Mā Tēv yip tö maṙôngö, Kē-ĕ meh chin ṙā-ang ip kiyôp, ṙā-ang i tinömkörit sīṅp inrē, pò meh hōtu rāchakūö vē tarik chu Israĕl:

⁸In meh chin inrē ip töng kū-ö meh kiröönngöre, ngaich inrē öich rökngen yik lā-al meh nö ṙòkhöre nö ṙā-ang i kūö meh; vīlö minë-eny meh chū-ö min inrē, sā minë-eny yip tökiröng ing tumlat.

⁹Ngaich chū-ö min halēnngö öp chūök vē tarik chu Israĕl, teūichten cha chin min inrē, hòṅ cha nö iyöng ip kanahngenre chūökö, nö öt hēk nö piyôka; yip töchökhuṙen tarik min inrē öt hēk nö halëlngen cha, sā ök lā urĕh,

¹⁰Löktökūö ök hē chu vīlö kamhôṅka i kui vē tarik chu Israĕl; tumṙeūtö yip lā-al meh chin min. Hēk inrē öich vë-eny nang meh tö ngam Mā Tēv nö mānlö patī meh min.

¹¹Hē nup sakāmö meh min nö timtöre kūö öm chuh in yip yöng re, ngaich chū-ö min hachohlö öp kūön meh unôichrit meh, hĕng tak aṅ in yip kikōnyö kūön meh, haköpi ap min tö chu pūlngö ò,

¹²Anga-aṅ ap min mamānlö patī chu, ngaich chū-ö min haköpngö öp kantēra ò nöng örheūheu.

¹³Yöng ò Chin min, ngaich anga-aṅ min inrē nö kūön chu; hö-ö chin min kēngö öp tököp hanāngenlōn nö ṙā-ang in ò, sā tī chu kēngö e ṙā-ang in ò ök mu-urēhĕkūö meh,

¹⁴Haköpngen ò pöri chū-ö min el ngih patī chu im pūlngö chu inrē höng örheūheu köp min inrē öp kantēra ò nöng örheūheu.

¹⁵Sā minë ṙô nö ṙòkhöre, sā minë tömeūkö inrē nö ṙòkhöre, ṙô Nātan nö vë-ekūö Tāvit.

¹⁶Kuhēthötre ngaich Tāvit ūichngöre ngaich nö i kūö ngam Mā Tēv, ngaich ngö ṙô, Ō Mā Tēv, achīö öich chū-ö asuh öng inrē ngam patī chu, tö meh ngaich ngih rô-òlkūö tī kēten chu?

¹⁷Tökūöṅnö öng ngih nö i kūö meh, Ō Tēv; ngaich më-eṅ inrē ṙô-òv inrē tö ngam patī ngòh tarik meh öm marô-òtö ṙô, ngaich hameukhö mat chu tö mu-unôich tumkölchap, Ō Mā Tēv!

¹⁸Sitih huneū-euṙô öng Tāvit nö in meh nö kô-òren tökūö inpōilö ngam tarik meh? Pò meh akahalōn tö ngòh tarik meh.

¹⁹Ō Mā Tēv, kūö ngòh tarik re man, ane inrē sā öp lōn meh öm tī-iv tö në tökiröng, i minkahtölōn tö në tökiröng.

²⁰Ō Mā Tēv, öt asā-av man, öt Tēvu inrē nö hol meh, sā nup ahang në el nang ih.

²¹Öp yòh ap pumnāmö tarik ing tumlat tö sā vē tarik meh Israĕl, vē havah ngam Tēv nö tarik ò, vīlö ngam minë-enyre më-eṅ nö kiröng nö pinhë-eṅkūö inrē, i tī meh ahōngö yik pumnāmö tarik nö i kūö vē tarik meh vē ṙahānyö meh nö ṙā-ang Aikup?

²²Ngaich më-eṅ vīlö vē tarik meh Israĕl nö örheūheu nö tarik meh; Ō Mā Tēv, ngaich më-eṅ inrē vītöre Tēv cha.

²³Ō Mā Tēv, yĕh ngaich man, hökngen ngam ṙô meh i ngòh tarik meh i inlahen inköpngö ngam patī ò nö örheūheu, ngaich më-eṅ sā ṙô meh ngaich öm ngatī tī;

²⁴Ngaich min ngam minë-eny meh nö köp hapōilöng inrē nöng örheūheu, nö ngö, Ngam Mā Tēv yip tömaṙôngö ngam Tēv Israĕl, anga-aṅ an Tēv Israĕl, Ngaich ngam patī ngam tarik meh Tāvit min nö köp nö i kūö meh.

²⁵Pò meh, öm Tēv chu, öm hameukhö mat ngòh tarik meh tö meh min mānlö patī ò; lökten ön ngòh tarik meh nö kôtökūö tö kumlēḵre nö havë-a nö i kūö meh.

²⁶Ō Mā Tēv, më-eṅ man Tēv, tö ngaich öm kilēḵngôre tö ngih tölöök öm in ngòh tarik meh;

²⁷Lökten man yĕh töngamuh kuchīkölōn hakôlò ngam patī ngòh tarik, hòṅ e nö iṙūöhen nö örheūheu nö i kūö meh; Ō Mā Tēv, pò öp töhakôlöng ṙô tö meh nö örheūheu nö tökôlò.