Read Car_Nicobarese 1 KINṘÖTNGÖ 18 Bible Online

1 KINṘÖTNGÖ 18 - Car_Nicobarese bible

1 KINṘÖTNGÖ 18

¹Unôich ngaich tö ngih ang Tāvit nö mihôiṅ tö yik aṅ Filistain ngaich hayöngö cha, kē-ĕ Kāt anga-aṅ tö nuk tuhēt e inrē nö ṙā-ang eltī yik aṅ Filistain.

²Mihôiṅ inrē anga-aṅ tö Mô-ap ngaich yik aṅ Mô-ap nö tarik Tāvit ngaich kētö masūl.

³Mihôiṅ inrē Tāvit tö Hatatēsör ök rācha aṅ Sōpah, lā Hamat, ik sā ò nö kiröönngöre nö asöklö ök minkahngö ò nö ik tahël Yūfrātīs.

⁴Hĕng köṅny nuk inröl kahë Tāvit nö ṙā-ang in ò, sat köṅny tarik aṅ uk kōra, nët anāi köṅny inrē kumröön kunyung; ngaich Tāvit nö rökngö inröt rôngö kalröön nuk kōra, hēngòng pöri nuk töṙātu i töhēngòng inröl.

⁵Ngaich hē yik aṅ Siriā i Tamaskös nö yih nö holṙen Hatatēsör ök rācha aṅ Sōpāh, ngaich Tāvit nö fël yik tönët anāi nët köṅny tarik aṅ Sīriā.

⁶Ṙātö amahati ngaich Tāvit nö i Sīriā i Tamaskös; ngaich yik aṅ Sīriā nö tarik Tāvit, ngaich kētö masūl. Ngaich ngam Mā Tēv nö kētö minhôiṅyö Tāvit ip töng kū-ö ò nö kiröönngöre.

⁷Kē nuk humlum lanaklö inrē Tāvit nuk kahëkö yik tarik Hatatēsör, kētu ngaich nö i Yērusalem.

⁸Ṙeū-eung Tiphat, Kun inrē, nuk elpanam Hatatĕsör, ang Tāvit nö pōyen kahë tö mās; anū-ö nuk vahī Sòlòmön mās mai machööḵlö, mās chūökṙen inrē.

⁹Hē Tō-u ök rācha aṅ Hamat nö hāngö Tāvit nö keuheutngöre vah tī nö mihôiṅ tö yik kumyung in Hatatēsör, ök rācha aṅ Sōpāh,

¹⁰Tinngö ök kūönre anga-aṅ kikōnyö ang Hatōram nö ik rācha Tāvit nö salāman, ha-öinyan inrē pò ò nö kiyung nö lā-al Hatatēsör ngaich mihôiṅ tö ò; pòn töṙōl heuh Hatatēsör nö kiyung nö lā-al Tō-u. Ngaich anga-aṅ inrē nö söömtö töṙōlkangen chehen, humlum, rupīö, mās inrē;

¹¹Anū-ö inrē kahëtö Tāvit nö im Mā Tēv, holre tö nuk rupīö, humlum inrē nuk kahë ò nö in yik pumnāmö tarik; i Ētöm, Mô-ap, Amön, Filistain, Amelek inrē.

¹²Apīsāi, ök kikōnyö kūön Serūyā, nö hëvhör sīön köṅny fahël tö yik aṅ Ētöm el Achāṙö Sāl.

¹³Ṙātö amahati ngaich anga-aṅ nö i Ētöm; ṙòkhöre ngaich yik aṅ Ētöm nö tarik Tāvit. Ngaich ngam Mā Tēv nö kētö minhôiṅyö nö in Tāvit ip töng kū-ö ò nö kiröönngöre.

¹⁴Lökten Tāvit nö hayöng nö i kui Israĕl nö ṙòkhöre; ngaich anga-aṅ inrē nö chīpö tī ṙōngö tī inrē nö kahôkken yik tarik re.

¹⁵I kui yik kumyung ang Yôap ök kikōnyö kūön Serūyā; Yēhōsafat ök kikōnyö kūön Ahīlöt nö yōm kinṙötö;

¹⁶Sātòk inrē ök kikōnyö kūön Ahītöp tö Ahīmelek ök kikōnyö kūön Apiātör cha-a nak kūönṙô; Sēvsa inrē yōm kinūichö;

¹⁷Pennaya inrē ök kikōnyö kūön Yēhōyata i kui yik Chērit tö yik Pēlĕt inrē; ngaich yik kikōnyö kūön Tāvit nö yöngkūö yik mā nö i la-en ök rācha.