Read Car_Nicobarese 1 KINṘÖTNGÖ 19 Bible Online

1 KINṘÖTNGÖ 19 - Car_Nicobarese bible

1 KINṘÖTNGÖ 19

¹Unôichrit ngih ang Nāhas nö kapah ök rācha aṅ Amön, ngaich ṙënngen ò nö hayöng ök kikōnyö kūön ò.

²Ngaich ngö ṙô Tāvit, Hòṅ lök i hinang chöngö chin in Hanun öp kikōnyö kūön Nāhas, pò ök yöng ò nö lök i hinang chöngö nö in chu. Lökten Tāvit nö tīnngö ma-ahānga nö haṙamlōn ò i kinpaha ök yöng ò. Yih ngaich yik tarik Tāvit nö in Hanun nö i panam yik Amön, nö haṙamlōn ò.

³Ngaich pöri yik kūön rācha aṅ Amön nö ngö ṙô tö Hanun, Kūö Tāvit nö söömtö inṙamlōn meh, tömilēḵṙen ap tölōn meh tök yöng meh? Röh yip tarik ò nö yih nö in meh nö chöh nö tiṙōlhanga inrē nö hayuntö mat re töng panam?

⁴Lökten Hanun nö kē yik tarik Tāvit, kuhākngen cha ngaich, kamöpngö nup inyut cha nö lökngö ṙat, i kūö takeun, tīnngörit cha ngaich;

⁵Kiröönngöre cha-a ngaich. Hē Tāvit nö vënyu nang tö lāinyngen yik tarik, tīnngö hamöng kūö cha anga-aṅ, pò yik tarik nö kiröngö sumrōngkūö. Ngaich yin i Yerikō hanöng saha sanīöplö nup sanôi kūö yīö, ngaich möl yī-ö havan.

⁶Ngaich hē yik aṅ Amön nö meūköre nö kunyahavṙen tö Tāvit, ngaich Hanun tö yik aṅ Amön nö söömngö töhĕng köṅny tālen rupīö nö haṙāi inröl aṅ uk kōra inrē tarik aṅ Mesapotamia, Aramē-akah, aṅ Sōpah inrē.

⁷Lūöi anāi nët köṅny nuk inröl töhaṙāyö tö cha tök rācha aṅ Mē-akah inrē nö holtö yik kumyung in ò, yik yamih ngaich iyöngtöre nö i kūö Mētēpā. Hamūlö inrē yik aṅ Amön nö ṙā-ang elpanam re ngaich yih nö ik kinyūngö.

⁸Hē Tāvit nö hāngö e, tīnngen Yô-ap anga-aṅ ngaich tö yik kumyung tökalēḵ tarik nö ṙòkhöre.

⁹Kunyī-inyre ngaich yik aṅ Amön ngaich haṙāköre nö ik lökhöt ök elpanam nö kiyung, yik rācha inrē yamih nö köhngen el töngāṅ panam.

¹⁰Hē Yô-ap nö meuk ök kinyūngö nö lakūö lā uk ò inrē, yik lā-al ò, ngaich anga-aṅ nö töllö yik tarik tökatöllöng in Israĕl, haṙākö cha ngaich nö lā-al yik aṅ Siriā;

¹¹Kētu yik tahëng tarik ò nö hayōmö tö Apisāi ök kahëm ò haṙākö cha-a ngaich nö lā-al yik aṅ Amön.

¹²Ngö ṙô anga-aṅ, Yē yip aṅ Sīriā nö yahlö kumlēḵ tö chu, ngaich holṙen chu min më-eṅ; yē yip aṅ Amön pöri nö yahlö kumlēḵ tö meh, ngaich holṙen meh chū-ö min.

¹³Um pa-ekūö, ta-a töi sā tarik in vē tarik hī, chöö-önytö minë elpanam ngam Tēv hī, tī-iv an yēḵ ngam Mā Tēv tö nup tölöök tö lōn ò.

¹⁴Lökten Yô-ap tö yip tarik in ò inrē nö ṙūötöre nö i kūö yik aṅ Sīriā nö kiyung falngöre cha-a ngaich nö i kūö ò.

¹⁵Hē yik aṅ Amön nö meuk yik aṅ Sīriā nö falngöre, ngatī cha-a inrē nö falngöre nö i kūö Apīsāi, ök hakëm Yô-ap, ngaich kuhēthötre nö ik elpanam. Yih ngaich Yô-ap nö i Yērusalem.

¹⁶Hē yik aṅ Sīriā pöri nö meūköre nö ötkô tö tī Israĕl, tīnngö ma-ahānga cha-a ngaich nö kēnyö yik aṅ Sīriā yik lamuh tö Yūfrātīs, holten Sōfak ök yöngṙen yik kumyung in Hatatësör nö i kui cha.

¹⁷Ngaich hē Tāvit nö vënyu nang, hamūl yik aṅ Israĕl ngaich anga-aṅ, ngaich havāngngö kui Yôtön, ngaich yih nö in cha, ngaich hamūllö yik in ò kumyung nö lā-al cha, ngaich hē Tāvit nö haṙaktöre nö im kinyūngö nö lā-al yik aṅ Sīriā, kiyūngö ò cha-a ngaich.

¹⁸Falngöre ngaich yik aṅ Sīriā nö i kūö Israĕl; ngaich Tāvit nö fëlngö yik aṅ Sīriā yik tarik tösat köṅny inröl, fën anāi köṅny inrē kumröön inröl fën anāi köṅny inrē kumröön kumyung, fëlngen Sōfak inrē ök yöngkūö kumyung cha.

¹⁹Ngaich hē yik tarik Hatatēsör nö hameūlöre nö ötkô tö tī Israĕl, vī lanāmö cha-a nö el katòh ò. Lökten yik aṅ Sīriā nö öt hōḵ nö hēk nö holṙen yik aṅ Amön.