Read Car_Nicobarese 1 KINṘÖTNGÖ 23 Bible Online

1 KINṘÖTNGÖ 23 - Car_Nicobarese bible

1 KINṘÖTNGÖ 23

¹Hē Tāvit nö ngaich nö köiny sööḵngö nö ngaich tö nuk sakāmöre, vīlen Sòlòmön anga-aṅ ngaich ök kikōnyö kūön ò nö rācha i kui Israĕl.

²Hamūl yik yöngṙen ang Tāvit nö ṙòkhöre i Israĕl tö yik kūönṙô yik Lēvī inrē.

³Kaheūkö ngaich yik Lēvī, tö lūöi anāi samyeūheu tö tulöng inrē, ngaich ök ṙôken cha nö lūöi anāi hëvhör köṅny tarik.

⁴Nët anāi fën köṅny aṅ in cha, mahayōm la-en ngam patī ngam Mā Tēv, ṙô Tāvit, tafūöl köṅny min yip mā yöngṙen kamhôṅka inrē,

⁵Fën köṅny yōm kūö inkūp, fën köṅny inrē yip maha-öiny ngam Mā Tēv nö aṅtītö nup ranöng vahī chu nö i nöönyö.

⁶Ngaich ang Tāvit nö halēnö cha nö michöö-ö nö sā yik kikōnyö kūön Lēvī: Kersōm, Kōhat, Mērarī inrē.

⁷Vē yin kikōnyö kūön Kersōm, Lātan: Yēhi-el yöng kūö, Sētām, Yô-ĕl inrē, lūöi taka.

⁸Kikōnyö kūön Lātan: Yēhē-el yöng kūö, Sētām, Yô-ĕl inrē lūöi taka.

⁹Kikōnyö kūön Sīmëī: Sēlōmòt, Hāsī-el, Haran inrē, lūöi taka. Cha-a yin vē yöng kūö patī yik yöng Lātan.

¹⁰Kikōnyö inrē kūön Sīmëī: Yahat, Sīnā, Yē-us, Përiyā inrē. Cha-a vē töfën tak kikōnyö kūön Simë-ī.

¹¹Yāhat ök yöng kūö, innëtö inrē Sīsā; Yē-us pöri Përiya inrē nö öt ṙōl tak kūön tö kikōnyö lökten cha nö kaheuktu nöng hĕng nö yöng kūö patī ök yöng cha.

¹²Kikōnyö kūön Kōhat: Amram, Ishar, Hepròn, Usī-el inrē, fën taka.

¹³Kikōnyö kūön Amram: Āròn, Môsös inrē. Hakösīṙen ang Āròn nö ma-ahetlö nup tölngö töhet, hòṅ ò tö yip kikōnyö kūön ò inrē nö örheūheu nö föng tötahūsa i kūö ngam Mā Tēv, meukṙen ò inrē ṙônyö inkôlò inrē i minë-eny ò nö örheūheu.

¹⁴Vē kikōnyö pöri kūön Môsös ök tarik ngam Tēv nö minënyu nö i miyöngö Lēvī.

¹⁵Kikōnyö kūön Môsös: Kersōm, Ēliasar inrē.

¹⁶Kikōnyö kūön Kersōm: Sēpu-el ök yöng kūö.

¹⁷Kikōnyö kūön Ēliasar: Rīhapiya ök yöng kūö; öt kūönu Ēliasar tötahëng kikōnyö, pōyen kūön pöri Rēhapīya tö kikōnyö.

¹⁸Kikōnyö kūön Ishar: Selōmit ök yöng kūö.

¹⁹Kikōnyö kūön Hepròn: Yërīya ök yöng kūö Amāriya innëtö, Yēhasi-el linūöyö, Yēkamë-am finënö.

²⁰Kikōnyö kūön Usī-el: Maika yöng kūö innëtö inrē Isīya.

²¹Kikōnyö kūön Mërārī: Mahlī, Musī inrē. Kikōnyö kūön Mahlī: Ēli-asār, Kis inrē.

²²Kapah ang Ēliasar nö öt kūönu tö kikōnyö, höng kikānö pöri; ngaich yip mak alaha cha, yik kikōnyö kūön Kis nö pīhöten tö cha.

²³Kikōnyö kūön Musī: Mahli, Ēter, Yeremòt inrē, lūöi taka.

²⁴Vē yin kikōnyö kūön Lēvī nö lökten i patī yik yöng cha, yik yöng kūö patī yik yöng cha nö sā kinṙötngö cha nö sā tūmö minë-eny i töhĕng tak löktö kūö tö nët anāi samyeūheu ṙēti söl tulöng inrē nö töla-evṙen nö im patī ngam Mā Tēv.

²⁵Pòn ngö ṙô Tāvit, Ngam Mā Tēv, ngam Tēv Israĕl, nö ngaich nö kētö lanāmö nö in vē tarik ò; ngaich iyöng Yērusalem min anga-aṅ nö örheūheu.

²⁶Ngatī inrē yik Lēvi nö öt ngöhören nö keun ngam inrūkui hēk inrē nup töng chehen i la-en e.

²⁷Pòn i nuk manā-aṅ ṙô Tāvit nö anū-ö në ṙôken yik Lēvī löktökūö tö nët anāi samyeūheu ṙēti söl tulöng,

²⁸Ngaich pöri öp la-en cha min nöng hamòlṙen yip kikōnyö kūön Āròn nö i la-en ngam patī ngam Mā Tēv, nö mahayōm minë eltīchöölö, töminë urôhò inrē, inhëtö nup taṙòkhöre töhet, i töng la-en ngam patī ngam Tēv inrē:

²⁹Holṙen inrē in nup töhet rôti, i maita tökētu kulöl, nup vēföör inrē aṅ i tötaföhlöng rôti, tö kahūlö tökētu, tökētu tökalūöchö tö tavī-i, ṙòkhöre inrē nup kinlah ṙôken hēk kinlah ṙôkö.

³⁰Kaheuk peuheū cha-a min inrē nö sökhaka, nö ha-öinytö tī ha-öiny ngam Mā Tēv inrē, ngatī inrē tö lā harap,

³¹Ip töng hē kinëtö töföngö tökētu nö im Mā Tēv hē el töhet sakāmö, ayöö chingëṅt, nyinā-aṅ sakāmö inrē, i tumtak hinôtö cha, nö örheūheu nö i kūö ngam Mā Tēv.

³²Ngatī cha-a min nö hayōm ngam rūkui manūlö tö ngam töhet chūök, holṙen yip kūön Āròn min cha-a inrē, yip hol maneuk cha, nö i la-en ngam patī ngam Mā Tēv.