Read Car_Nicobarese 1 KINṘÖTNGÖ 28 Bible Online

1 KINṘÖTNGÖ 28 - Car_Nicobarese bible

1 KINṘÖTNGÖ 28

¹Yēruselem ang Tāvit nö hamūl yik mā kūö Israĕl, yik mā kūö yik miyöngö, yik yöngṙen yik tömichööḵlöng kumyung yik lamök la-en ök rācha, töchöngu i tököṅyu, töchöngu i töṙôngu, yōm nuk inlānen nuā ök rācha inrē tö yik kikōnyö kūön ò, holre tö yik mā kūö patī rācha, tö kalēḵ tarik, ṙòkhöre inrē yik töha-eh nö kiyung.

²Choholre ngaich ök rācha Tāvit nö söklöre ngaich ngö ṙô: Hang ṙô chu, mak alaha chu tarik chu inrē. Tö ellōnu chin tö minānlö öp patī chūök ṙinātö ngam kasòng kinlēḵngô ngam Mā Tēv, nö ranööntö röön ngam Tēv hī inrē; ngaich chū-ö halēnken minānlö e.

³Ngö ṙô pöri ngam Tēv tö chu, Uh man më-eṅ mānlö öp patī i minë-eny chu, tön kumyung man, ngaich pōyen kitaknyi tö mahām.

⁴Ngaich sön ngam Mā Tēv Israĕl nö atöllen chu nö ṙā-ang i patī ök yöng chu öich rācha i kui Israĕl örheūheu; pòn atöllen Yūtā anga-aṅ nö yöngṙen, el patī Yūtā kikōnyö inrē kūön ök yöng chu anga-aṅ nö kuchīkölōn nö vīlen chu rācha i kui Israĕl nö ṙòkhöre.

⁵Ngaich i vē kūön chu nö ṙòkhöre (pò ngam Mā Tēv nö pōiyen tī tö kikōnyö kūön) ngaich anga-aṅ nö atöllen Sòlòmön ngam kikōnyö kūön chu nö ūich el kantēra ngam pūlngö ngam Mā Tēv i kui Israĕl.

⁶Ngö ṙô anga-aṅ tö chu, Ap kūön meh ap min Sòlòmön manānlö patī chu tö nup el milūkö e inrē, pò chu ngaich atöllen ò nö kūön chu, yöng ò chū-ö min inrē.

⁷Haköpngö ngam pūlngö ò chin min nö öṙheūheu yē ò nö iṙūöhen nö kalē-ĕlōn nö haköp në chöngö chu në inchöngten aṅ in chu inrē, nö sā töngamuh.

⁸Lökten tö ngamuh i kui Israĕl nö ṙòkhöre ngam manūlö ngam Tēv inrē, i hināngö tö ngam Tēv hī inrē, haköp yin chöh nup chöngö ngam Mā Tēv yīö inrē; hòṅ yīö amīnu tö ngih tölöök panam, ngaich ṙātö e nö amin yip kūön yīö nö örheūheu unôichrit yīö.

⁹Më-eṅ inrē, kūön chu Sòlòmön, akahakūö man tö ngam Tēv ngam yöng meh, lök la-en ò inrē keuheūttö ellōnre holtö töhō kui lōn; tön chöh ellōn taṙòkhöre an ngam Mā Tēv, akaha elmat inrē tö tanūtö ellōn. Yē meh chöhan, kôtö kūö man min tö ò; yē meh pöri ṙāngen ò kavali min më-eṅ tö ò marôvat öm urāngen.

¹⁰Haṙēmngenre man töngamuh, tön atöllen meh an ngam Mā Tēv öm mānlö öp patī tö het chūök; hangë-eṅre man, la-evṙen inrē tö e.

¹¹Ngaich ang Tāvit nö kē-ĕkūö ök kūönre Sòlòmön tö insā vinī-i ök rittūi ök tempöl, tö nuk patī e chūök rupīö e, lātulöng urôhò e, la-ël inrē tökiröng urôhö, urôhò ap anūchö miṙēlōn inrē;

¹²Insā vinī-i nup më-ellōn ò nö ṙòkhöre nup el milūkö ngam patī ngam Mā Tēv, ṙòkhöre nup tö kiröng urôhò nö havīlö e, nup chūök rupīö ngam patī ngam Tēv, nup chūök tökētu inlōnti inrē;

¹³I minchöölö yip kūönṙô tö yip Lēvī, ṙòkhöre nup la-en el patī ngam Mā Tēv; ṙòkhöre nup chūökṙen i la-en el patī ngam Mā Tēv,

¹⁴Kalaha lumngan nup humlum chūökṙen i tö hĕng la-en, kalaha lumngan nup rupīö chūökṙen i tö hĕng tö la-en,

¹⁵Kalaha lumngan nup humlum chūök ëāṅvö tö nup ëāṅvö inrē, kalaha humlum i töhĕng chūök ëāṅvö tö nup ëāṅvö e inrē, kalaha lumngan rupīö chūök ëāṅvö tö nup ëāṅvö e, sā tumkangen la-en ngih tö hĕng chūök ëāṅvö,

¹⁶Kalaha lumngan nup humlum i tö hĕng mīs chūök töhet rôti, rupīö i nup rupīö mīs,

¹⁷Humlumnyöre inrē lanòk, pēsön, kōp inrē, i nup humlum töchilū kökalaha lumngan; ik rupīö töchilū kökalah lumngan.

¹⁸Ip tahāklö tötahūsa tö halööktitvö humlum, töp lumngan e inrē; ane inrē ök insā vīnī-i ök humlum inröl nuk kërup mahanyāknyö këlre nö rup tö kui ök kasòng kinlēḵngô ngam Mā Tēv.

¹⁹Ṙòkhöre anū-ö nö sehlö mineūkö tö kūö ngam kinūichö tī ngam Mā Tēv nö in e, ṙòkhöre nuk la-en nö vī-i nö sā ngam insātī vamī.

²⁰Ngaich ngö ṙô Tāvit tök kūönre Sòlòmön, Hangë-eṅre man um pa-ekūö inrē, la-evṙen tö e. Um pa-ekūö, um ngangngö kūö; tön in meh an ngam Mā Tēv, ngam Tēv chu, Öthōḵ an nö öt teung nö in meh hēk öthō nö ṙāngen meh, hanöng saha nup la-en i ngam patī ngam Mā Tēv nö keuheūten.

²¹Yĕh meuk tö minchööḵlö yip kūönṙô tö yip Lēvī inrē nö i nup la-en ngam patī ngam Tēv; in meh inrē i nup tökeuheūttöre la-en vē töhō tarik töhuveū-en i tökeuheūttöre la-en; i chöngö meh yin inrē vē mā kūö vē tarik nö ṙòkhöre.