Read Car_Nicobarese 2 KINṘÖTNGÖ 10 Bible Online

2 KINṘÖTNGÖ 10 - Car_Nicobarese bible

2 KINṘÖTNGÖ 10

¹Chuh Sikem ngaich Rēhopōam, pòn ṙòkhöre yik Israĕl nö yih nö i Sikem nö vīlen ò nö rācha.

²Ngaich hē Yēropōam ök kikōnyö kūön Nēpòt nö hāngö e (pò ò nö i Aikup, i chūök ò nö meutngö tök rācha Sòlòmön), havan ngaich Yēropōam nö ṙā-ang Aikup.

³Ngaich cha-a nö tīnngö mahavëken ò; ngaich yih Yēropōam tö yik Israĕl nö ṙòkhöre ngaich ngö ṙô tö Rēhopōam,

⁴Vīten ih ök yöng meh kikōnyö langānö kum. Lökten töngamuh ahöhlö nup tö kihngen la-en aṅ in ök kikōnyö yöng meh nuk kum ih inrē tö langan tī ò, ngaich īhö min hōḵ lök la-en meh.

⁵Ngö ṙô ngaich anga-aṅ tö cha, Ip tö lūöi töre sumkam yin yih in chu hēk. Lökten yik tarik nö kiröönngöre.

⁶Ngaich ök rācha Rēhopōam nö hòṅ halēnö tö yik tö köṅnyu tarik, yik samökhaka nö i kūö ök yöng ò Sòlòmön hē ò nö ṙòngmö aṅ, nö ngö ṙô, Sitīh ṙô öi yī-ö halēnö chu sap ṙô vē tarik?

⁷Ngaich ngö ṙô achā-a tö ò. Yē meh min aheūkölōn tö vē tarik haṙamlōn cha inrē; löökö ṙô inrē vë-ekūö cha, ngaich cha-a min nö örheūheu nö tarik meh.

⁸Ngaich pöri anga-aṅ nö ṙāngö ngam inlēnö ngam kahëtö yik tö köṅnyu nö in ò, ngaich kēḵ inlēnö nö in yik ṙālö tarik yik samīöp nö anònglö kui ò ngaich i kūö ò nö sökhaka.

⁹Ngö ṙô anga-aṅ tö cha, Sitīh ṙô öi yī-ö halēnö chu hòṅ hī sap ṙô vē tarik vē tö ngö ṙô tö chu, Ahöhlö nuk hakeunlö ök yöng re man nö in ih?

¹⁰Ngaich yik ṙālö tarik nö ngö ṙô tö ò yik anònglö sanīöpö ò, Ngö ṙô man vë-ekūö yip tarik yip tö ngö ṙô tö meh, Langānö tī ök yöng meh tö kum ih, ahöhlen ih pöri yēḵ më-eṅ tö e; Ngö ṙô man tö cha, Chilöl ön ngòh kūöṅnö kuntī chu tö ṙat ök yöng chu.

¹¹Yĕh pöchö töngamuh, sā ök yöng chu nö hakeunlen yīö tö tölangan kaneun, ṙūöhten lumngan kum yīö chin chū-ö Aṅtī tö fanòh ök yöng chu nö chökṙen yīö, aṅtī tö ka-ëp pöri min chū-ö chökṙen yīö.

¹²Lökten Yēropōam nö yih tö yik tarik inrē nö ṙòkhöre nö in Rēhopōam ik linūöyö sakāmö, sā ṙô ök rācha, Yih yin in chu hēk ip linūöyö sakāmö.

¹³Kësô ngaich ök rācha nö sap ṙô cha, ngaich ṙāngö inlēnöre tö yik tö köṅnyu tarik,

¹⁴Vë-ekūö cha ngaich ök rācha Rēhopōam nö sā ök inlēnö re tö yik ṙālö tarik, nö ngö ṙô, Langānötī ök yöng chu tö kum yīö, ṙūötö ṙôken e pöri chu-ö min; aṅtī tö fanòh ök yöng chu nö chökṙen yīö, aṅtī tö ka-ëp pöri chu-ö min chökṙen yīö.

¹⁵Ngatī inlahen ök rācha nö öt hang ṙô yik tarik; pò e angū-ö nö kahëtökūö ngam Tēv hòṅ ngam Mā Tēv nö hateungngö ngam ṙô re, ngam ṙô ò nö in Ahīcha ök aṅ Sailo nö in Yēropōam ök kikōnyö kūön Nēpòt.

¹⁶Ngaich hē yik Israĕl nö ṙòkhöre nö meuk ök rācha nö öt hang ṙô cha, ngaich yik tarik nö sap ṙô ök rācha, Sūöp minchööḵö hī in Tāvit? Hö-ö in amīnu im kūön Yēsi. Kö el in rūkuire yin Ō Israĕl! Tavīt meuk ngam patīre man töngamuh. Lökten yik Israĕl nö chuh el rūkui re.

¹⁷Hayöng pöri Rēhopōam nö i kui yik tarik Israĕl yik mī-iyöng el nuk elpanam i Yūtā.

¹⁸Ngaich ök rācha Rēhopōam nö tīnngen Hëtōrām, ök yöngṙen tö lā-evṙen nö i kui yik tö hanlīpö tö lā-evṙen, kulëhekui ngaich anga-aṅ tö yik tarik Israĕl nö aṅtī tö ihong ngaich kapah. Kurāten ngaich ök rācha Rēhopōam nö yôklö nö el inröl re, nö falngöre nö i Yērusalem.

¹⁹Ngatī inlahen Israĕl nö ahôngö chöngö ngam patī Tāvit söl ing töngamuh.