Read Car_Nicobarese 2 KINṘÖTNGÖ 11 Bible Online

2 KINṘÖTNGÖ 11 - Car_Nicobarese bible

2 KINṘÖTNGÖ 11

¹Hē Rēhopōam nö yih nö i Yērusalem hamūl yik aṅ patī Yūtā anga-aṅ, Penyamin inrē, hēngòng hëvhör anāi köṅny tökatöllöng kumyung, nö lā-al Israĕl, nö havantö ngam pūlngö nö in Rēhopōam.

²Yih pöri ngam ṙô ngam Mā Tēv nö in Semayā ök tarik ngam Tēv:

³Ngö ṙô tö Rēhopōam ök kikōnyö kūön Sòlòmön rācha aṅ Yūtā, in yip Israĕl inrē i Yūtā Penyamin inrē,

⁴Ngö ṙô an ngam Mā Tēv, Uh man kiröönngöre hēk um kiyung lālö yip holre. Kö havantöre yin i patīre, tön aṅ in chu an angū-ö. Lökten cha nö hang ṙô ngam Mā Tēv, ngaich havantöre nö öt kiröönngöre nö lā-al Yēropōam.

⁵Iyöng Yērusalem ang Rēhopōam, ngaich vīlö nuk elpanam lanaklö nö i Yūtā.

⁶Vīlen Pĕtlihem anga-aṅ, Ētam, Tēkōa,

⁷Pĕtsūr, Sokō Atulam,

⁸Kāt Mërisā, Sif,

⁹Atōrēm, Lakis, Asēkā,

¹⁰Sōrah, Ayalòn, Hepròn inrē, chūök kumyung nö elpanam nö i Yūtā, Penyamin inrē.

¹¹Vīlö nuk chūök kumyung anga-aṅ nö ngëḵ, ṙātö töchöngu inrē nö in u, chūök nyā-aṅkūö inrē, tavī-i, vāin inrē.

¹²Ṙātö lanaklö anga-aṅ vöi inrē nö i nuk elpanam nö ṙòkhöre, vi-i u inrē nö ngëḵ. Ngatī tī anga-aṅ nö ṙapken Yūtā Penyamin inrē.

¹³Ngaich yik kūönṙô tö yik Lēvi inrē yik aṅ Israĕl nö ṙòkhöre nö yihtöre nö in ò nö ṙeū-eung i nup chūök cha nö iyöng.

¹⁴Pò yik Lēvi nö ṙāngö nuk tumlatre nuk minë-eny cha inrē ngaich yih nö i Yūtā, Yērusalem inrē, pò Yēropoam, yik kikōnyö kūön ò inrē nö ahōngen cha nö ṙā-ang la-en kūönṙô ngam Mā Tēv,

¹⁵Ngaich anga-aṅ nö vīlö kanahngen re tö kūönṙô nup lātulöng chūökö, nö i la-en nup satīör, ane inrē i la-en nup kun nuā nuk vahī ò,

¹⁶Ngaich cha-a yik tölōnu nö chöh ngam Mā Tēv Israĕl yih ngaich cha-a nö ṙā-ang i nup miyöngö Israĕl nö i Yērusalem nö kētö tökētu im Mā Tēv, ngam Tēv yik yöng cha.

¹⁷Hangëṅkö ngam pūlngö Yūtā cha-a, ngaich lūöi samyeūheu cha-a nö vīlen Rēhopōam ök kūön Sòlòmön nö köp, pò cha nö lūöi samyeūheu nö lök eltalöökö Tāvit Sòlòmön inrē.

¹⁸Kē pīhöre ngaich Rēhopōam tö Mahalat kūön Yērimòt ök kikōnyö kūön Tāvit, tö Apīhēl inrē ök kikānö kūön Ēliap ök kikōnyö kūön Yēsī;

¹⁹Kūöntö kikōnyö ngaich anga-aṅ nö in ò, Yē-us, Semeriyā, Saham inrē.

²⁰Unôichrit ò anga-aṅ nö kē-ĕ Ma-akāh ök kikōnyö kūön Apsalem, ök tö kūönu nö in ò tö Apīcha, Atai, Sīsā, Sēlomit inrē.

²¹Mötlö hanāngenlōn Rēhopōam tö Ma-akāh ök kikānö kūön Apsalem tö yik pīhö ò nö ṙòkhöre yip pīhö ò töl inrē (hëvhöre sīön tak yik pīhö ò tafūöl anāi inrē yik pīhö ò töl, nët anāi hëvhöre tak yik kūön ò kikōnyö, tafūöl anāi inrē yik kūön ò kikānö);

²²Vīlen Apīcha inrē ang Rēhopōam ök kikōnyö kūön Ma-akāh nö yöng kūö kūön rācha nö in yik hol maneuk ò pòn hòṅ vīlen ò nö rācha.

²³Huveū-en tī angā-aṅ, michööḵngö yik rīkre kūön ò kikōnyö nö i nup tumtit Yūtā, Penyamin inrē, el nup chūök kumyung elpanam; pōyen tī anga-aṅ inrē nö kē-ĕkūö cha tö nyā-aṅkūö, kētö pīhö cha inrē.