Read Car_Nicobarese 2 KINṘÖTNGÖ 12 Bible Online

2 KINṘÖTNGÖ 12 - Car_Nicobarese bible

2 KINṘÖTNGÖ 12

¹Hē ngam inyöngö tö Rēhopōam nö köp ngëḵ inrē, ṙāngö ngam chöngö ngam Mā Tēv ngaich anga-aṅ, ṙòkhöre inrē yik Israĕl nö anòngngen ò.

²Im tinneui samyeūheu ök rācha Rēhopōam, pò cha nö öt kô-en nö im Mā Tēv, ang Sīsak rācha aṅ Aikup nö yih nö lā-al Yērusalem.

³Holtö tö nët sīönòng inröl ane inrē tafūöl anāi köṅny aṅ uk kōra tarik. Öt kanṙeūken yik tarik inrē yik hol ò nö yih nö ṙā-ang Aikup Lipya, Sūkim, Iti-ōpia inrē,

⁴Kē nup chūök kumyung elpanam anga-aṅ i Yūtā ngaich yih nö tölngö Yērusalem.

⁵Ngaich ök pròfĕt Semayā nö yihtöre nö in Rēhopōam in yik kūön rācha inrē i Yūtā, yik mahamūlöre nö i Yērusalem, tökūö Sīsak, ngaich ngö ṙô tö cha, Ngö ṙô an ngam Mā Tēv, Ṙāngen chu yin, lökten chin ṙāngen yīö eltī Sīsak.

⁶Ngaich yik kūön rācha i Israĕl tök rācha inrē nö hayāichngöre nö ngö ṙô, Tölöök an ngam Mā Tēv.

⁷Hē ngam Mā Tēv nö meūkö cha nö hayāichngöre, yih ngaich ngam ṙô ngam Mā Tēv nö in Semayā: Hayāichngöre yip; hö-ö chin hòṅ ahatngen cha, kē-ĕkūö cha pöri tö ṙinānyö, hö-ö öp min lanīnö chu nö vōktu nö i kui Yērusalem nö löktö eltī Sīsak.

⁸Ngaich pöri min cha-a nöng tarik ò, hòṅ cha nö akahalōn tö la-en chu ane inrē tö la-en në pūlngö në panam.

⁹Lökten Sīsak ök rācha aṅ Aikup nö yih nö lā-al Yērusalem; kēngö nuk chehen ngam patī ngam Mā Tēv anga-aṅ tö nuk chehen ök patī ök rācha inrē: keuheūtngöre kahëngö anga-aṅ, kēngö nuk humlum lanaklö anga-aṅ inrē nuk vahī Sòlòmön:

¹⁰Ngaich ök rācha Rēhopōam nö vī ṙënngen u tö mās lanaklö, ngaich kēten u nö eltī yik mākūö amahati, yik amahtö ök inkup ök patī ök rācha.

¹¹Ngaich i tumheuh ök rācha nö chu elpatī ngam Mā Tēv, yih ngaich yik amahati nö kumten u, ngaich kumten u hēk nö el urôhò amahati.

¹²Ngaich hē ò nö hayāichngöre havööngö kūöre ngaich ök lanīnö ngam Mā Tēv, nö ṙā-ang in ò, pòn sōtu nö keuheūtngöre tī nö tirōl hanga; hēk inrē, lööken inlahen nö ngaich nö i Yūtā.

¹³Lökten Rēhopōam nö haköpngöre nö i Yērusalem nö hayöng. Fën anāi kahuk samyeūheu ṙēti ang Rēhopōam hē ranulten ò nö hayöng sat sīön samyeūheu anga-aṅ nö hayöng nö i Yērusalem, ök elpanam atöllö ngam Mā Tēv nö i nup taṙòkhöre miyöngö Israĕl chūöktī ò töp minë-eny ò. Na-amah minënyö ök yöng ò kikānö aṅ Amön.

¹⁴Ötlöökö la-en anga-aṅ, pò ò nö öt kētö kūö ellōnre nö chöh ngam Mā Tēv.

¹⁵Në nun inlaha Rēhopōam, löktö kūö ök raneh söl ik manā-aṅ, röh nup nö kūichiyö nö i kinṙötö Samayā ök pròfĕt Aitō inrē ök mameuk? Iṙūöhen ngaich nuk kinyūngö i hôi Rēhopōam tö Yēropōam.

¹⁶Haṙòh ngaich Rēhopōam nö in yik yöngre, ngaich lāpiyö nö elpanam Tāvit; hayöng ngaich ök kikōnyö kūön ò Apīcha nö ṙënngen ò.