Read Car_Nicobarese 2 KINṘÖTNGÖ 13 Bible Online

2 KINṘÖTNGÖ 13 - Car_Nicobarese bible

2 KINṘÖTNGÖ 13

¹Im himëvhöre sīön samyeūheu ök rācha Yēropōam ang Apīcha nö rultenre nö hayöng nö i Yūtā.

²Lūöi samyeūheu anga-aṅ nö hayöng nö i Yērusalem. Mikāya minënyi ök yöng ò kikānö kūön Yūriĕl aṅ Kipīa.

³Ngaich kinyūngö ök umuh tö Yēropōam inrē. Kiröönngöre ngaich Apīcha nö kiyung hōlu tö kumyung tö yik tarik tötpa-ekūö, fënòng köṅny yik tökatöllöng tarik; ṙūötöre inrē Yēropōam nö hatöököre nö im kinyūngö nö lā-al nö holtö tö hëvhör ṙòng köṅny tö katöllöng tökalēḵ kumyung.

⁴Söklöre ngaich Apīcha nö i kui öp rung Sëmarēm öp mi-i nup rung panam Ifrēm, ngaich ngö ṙô, Hang ṙô chu, Ō Yēropōam ṙòkhöre inrē Israĕl!

⁵Hö-ö ömeh hòṅ akahalōn tö ngam Mā Tēv Israĕl nö kē-ĕkūö Tāvit nö rācha nö i kui Israĕl nö örheūheu ip kūön ò kikōnyö inrē nö lökten ik kinlēḵngô aṅ i sāl?

⁶Sönen pöri Yēropōam ngam kūön Nēpòt, tarik Sòlòmön ök kūön Tāvit, nö choholre nö ahôngen nö lā-al kūö ngam mā ò;

⁷Ngaich rīkre yip tötlöök nö harāinyngen Rēhopōam ök kūön Sòlòmön, hē Rēhopōam ök kūön Sòlòmön, hē Rēhopōam nö ṙòngmö ayal öl inrē nö huveū-en, öt akahakūö inrē tö cha.

⁸Ngaich man yih töngamuh tölōnre, mihôiṅ tö ngam pūlngö ngam Mā Tēv eltī vē kūön Tāvit, pò meh kiröngö ṙôken ngaich īnu inrē më-eṅ tö minë humlum kun nuā minë vahī Yēropōam nö tēv.

⁹Röh öyih ngaich ahōngen yik kūönṙô ngam Mā Tēv, yip kūön Āròn, tö yik Lēvī inrē, ngaich vīlö kūönṙôre yī-ö öi sā yip tarik aṅ tahëng panam? Öp yamih nö kahngenre nö ahetlöre nö holtö tö hĕng nòng kūön nuā hēk sat nòng kūön sīṅp nö vīlöre nö kūönṙô nup törö-ö nö tēv.

¹⁰In ih pöri īhö, ngam Mā Tēv an Tēv ih, hö-ö in īhö ṙāngen ò. Kūönṙô yin vē in ih mameukṙen ngam Mā Tēv nö kūön Āròn, Lēvī inrē lamök la-en cha.

¹¹Kaheuk peuheū yin harap inrē nö kētö töföngö tökētu nö im Mā Tēv lōpan, tötahūsa inrē, ngaich ṙātö töhet rôti nö el ngam mīs töng humlumnyöre, haṙūötken ngam humlum chūök ëāṅvö pòn hōtu nup ëāṅvö nö hūkūö nö kaheuk harap; pò ih hang chöngö ngam Mā Tēv ngam Tēv ih, ngaich pöri yī-ö ṙāngen ò.

¹²Yĕh meuk, in ih an ngam Tēv i kui ih, ngaich yip kūönṙô inrē nö holtö nup römpĕt kinyūngö nö föö invëkö kumyung nö lā-al yīö. Ō yī-ö kūön Israĕl, uh yin kiyung lālö ngam Mā Tēv, ngam Tēv yik yöng yīö; tön rö-ö yin kô.

¹³Ngaich Yēropōam nö tīnngö mahayun nö havīngöre nö löktö lā uk cha; ngaich lökten yik kumyung in ò nö lākūö Yūtā, ngaich yik mahayun nö lā uk cha.

¹⁴Ngaich hē Yūtā nö ngëicha, yĕh meuk, ök kinyūngö nö lākūö lā uk cha inrē; ngaich cha-a nö vë-ekūö ngam Mā Tēv, föö nuk römpĕt ngaich yik kūönṙô.

¹⁵Ngaich yik tarik aṅ Yūtā nö hūnyö ṙô kinyungö. Ngaich hē yik tarik aṅ Yūtā nö hū-a, ötkô-ò tī ngaich ngam Tēv tö Yēropōam tö yik Israĕl inrē nö ṙòkhöre nö i kūö Apicha, Yūtā inrē.

¹⁶Falngöre ngaich yik tarik aṅ Israĕl nö i kūö Yūtā, ngaich ngam Tēv nö kēten cha nö eltī cha.

¹⁷Ngaich Apicha tö yik tarik ò inrē nö pōihöiny nö fëlngen cha; lökten yik aṅ Israĕl tö fukngö tökūö fanël nö taneuyòng köṅny tö katöllöng tarik.

¹⁸Ngatī inlahen yik tarik Israĕl nö tumṙeūtu hē e, ngaich yik tarik Yūtā nö mihôiṅ, pò cha nö hayönglenre nö im Mā Tēv, ngam Tēv yik yöng cha.

¹⁹Lū-u Yēropōam ngaich ang Apīcha, ngaich kē nuk elpanam nö in ò, Pētĕl hol tö nuk tuhēt e Yësanah inrē, holtö nuk tuhēt e Efròn inrē, holtö nuk tuhēt e.

²⁰Öt havanlöre kanô-òṅ ngaich Yēropōam i nuk sakāmö Apīcha; fëlan ngam Mā Tēv, kapah ngaich anga-aṅ.

²¹Sīöplö kumlēḵ pöri Apīcha. Fën sīön tak kahë ngaich anga-aṅ tö pīhöre, ngaich nët anāi nët tak yik kūön ò kikōnyö tafūöl sīön tak yik kikānö.

²²Kūchīyö nuk tö ōtngöre inlahen Apīcha, talöökö ò ṙô ò inrē, i ṙô ök pròfĕt Aitō nö eū-a.