Read Car_Nicobarese 2 KINṘÖTNGÖ 14 Bible Online

2 KINṘÖTNGÖ 14 - Car_Nicobarese bible

2 KINṘÖTNGÖ 14

¹Haṙòh ngaich Apīcha nö in yik yöngre, ngaich cha-a nö lāpngen ò nö ik elpanam Tāvit; hayöng ngaich Asā ök kikōnyö kūön ò nö ṙënngen ò. Hē nuk sakāmö ò ngam panam nö söm samyeūheu nö heūheure.

²Löökö la-en ang Asā chip inrē nö i mat ngam Mā Tēv ngam Tēv ò,

³Kēngö nuk tahāklö anga-aṅ aṅ tahëng panam nuk chūökö lātulöng inrē, ngaich linkölngö nuk machööḵlö kūölten Asērīm inrē,

⁴Ngaich kētö chöngö Yūtā nö chöh ngam Mā Tēv, ngam Tēv yik yöng cha, haköp ngam chöngö inrē tö ngam inchöngten.

⁵Ngaich anga-aṅ inrē nö kēngö nuk lātulöng chūökö, nuk tahāklö, lōpan inrē nö ṙā-ang nup elpanam i Yūtā nö ṙòkhöre. Ngaich ngam pūlngö nö heūheure nö el katòh ò.

⁶Vīlö elpanam anga-aṅ chūök kumyung nö i Yūtā, pò ngam Tēv nö kētö haneūheu. Öt kinyūnguvö anga-aṅ i nuk samyeūheu anū-ö, pò ngam Mā Tēv nö kētö lanāmö nö in ò.

⁷Ngaich ngö ṙô anga-aṅ tö Yūtā, Tā-a töi vīlö në elpanam, öi havīlö u tö kinlōngö chūök chamônga inrē, inkūp kāl kūö inrē; ngam panam tö ōtren nö in hī, pò hī chöh ngam Mā Tēv ngam Tēv hī; chöhan in ngaich, ngaich anga-aṅ nö kē-ĕkūö hī tö lanāmö nö keuheūtngöre lā-a. Lökten cha nö vī-il u ngaich kôlò.

⁸Lūöyòng köṅny yik kumyung in Asā aṅ Yūtā, tö-aṅhāṅvti tö lanaklö vöi inrē, nëtòng hëvhör anāi köṅny tarik aṅ Penyamin, kamëkö lanaklö lumreny inrē; ṙòkhöre cha-a vē nö tarik tökalēḵ tö-eūnyu inrē.

⁹Yih ngaich Sērah ök aṅ Itiōpia nö holtö töhĕng tum köṅny ṙôken kumyung nö lā-al cha lūöyòng inröl inrē, yih ngaich nöng tölngö Mërisa.

¹⁰Kunyī-inyre ngaich Asā nö höngkūö ò, ngaich cha-a nö haṙāköre nö im kinyūngö el achāṙô Safëtah i Mërīsa.

¹¹Ngaich Asā nö vë-ekūö ngam Mā Tēv ngam Tēv ò, Ō Mā Tēv, öt hĕng tak tö sā meh hamòlṙen ih. Ō Mā Tēv ih, tön in meh in hayönglenre i minë-eny meh inrē öi yih lā-al vē tömaṙôngö. Ō Mā Tēv, Më-eṅ man Tēv ih; un hĕng tak yĕh tarik tökô nö lā-al meh.

¹²Lökten ngam Mā Tēv nö ötkô-òti tö yik aṅ Itiōpia nö i kūö Asā i kūö Yūtā inrē, falngöre ngaich yik aṅ Itiōpia.

¹³Lū-u cha ngaich Asā tö yik tarik hol ò nö tölngö Kĕrār, fukngö ngaich yik aṅ Itiōpia hanöng saha töt hĕng tit tak tö ōtre nö aṅ; pò cha nö ngaich nö payāyi nö i kūö ngam Mā Tēv yip kumyung aṅ in ò inrē. Ngaich yik tarik aṅ Yūtā nö Pōyen halaingö tö nuk chehen töṙā-ai.

¹⁴Keuheūtngöre tī cha-a tö nuk elpanam mahavīlen Kĕrar, pòn i kui cha ngam pinhë-eṅ kūö tö ngam Mā Tēv. Höng kētöre cha-a tö nuk chehen i nuk elpanam, pòn pōyen nuk in u.

¹⁵Ngaich cha-a nö tiṙōlngö nuk rūkui yik tösīṅpu pōyen halaingö ngaich tö siṅp ūṅt inrē. Havan ngaich cha-a nö i Yērusalem.