Read Car_Nicobarese 2 KINṘÖTNGÖ 16 Bible Online

2 KINṘÖTNGÖ 16 - Car_Nicobarese bible

2 KINṘÖTNGÖ 16

¹Im tölūöi anāi tafūöl samyeūheu Asā nö hayöng, kiröönngöre ngaich Pa-asā rācha aṅ Israĕl nö lā-al Yūtā, vīlen Ramā anga-aṅ inrē, pòn sōḵ nö hĕng tak halöngten tö kumyī-inyre hēk yih nö in Asā ök rācha aṅ Yūtā.

²Ngaich Asā nö kēḵ rupīö humlum inrē nö ṙā-ang el nuk chūök chehen ngam patī ngam Mā Tēv el patī ngam rācha inrē, ngaich söömngen u nö in Penhatat rācha aṅ Siriā, ök mī-iyöng Tamaskös, nö ngö ṙô,

³Ta-a tai mūl ayā-a tö meh, tö chu inrē, sā e nö ik yöng chu tök yöng meh inrē, yĕh meuk, söömtö rupīö chin in meh humlum inrē; kuṙòh litòkngö öp manūlö man im Pasā rācha aṅ Israĕl, hòṅ ò nö heūlngöre tö chu.

⁴Ngaich Penhātat nö hang ṙô ök rācha Asā, tīntö yik töchöngu ngaich anga-aṅ in yik kumyung in ò nö lā-al nuk elpanam Israĕl, ngaich cha-a nö kē-ĕ Iyôn. Tën, Apĕlmēm, ṙòkhöre inrē nuk elpanam chūök chehen Neftali.

⁵Hē Pa-asā nö hāngö, ṙāngenre ngaich anga-aṅ nö vīlen Ramā, ngaich hökngen ök la-enre nö sökngöre.

⁶Keuheūtlöre tī ngaich ök rācha Asā nö kē-ĕ Yūtā, ngaich cha-a nö halaingö nuk ihong Ramā tö nuk savaich e inrē, nuk chehetī Pa-asā nö vīlö e, anū-ö ngaich chehetī Asā nö vīlen Kēpā Mispā inrē.

⁷Hē e Hananī ök mameuk nö yihtöre nö in Asā ök rācha aṅ Yūtā, ngaich ngö ṙô tö ò, Pò meh hayönglenre ip rācha aṅ Sīriā, öm öt hayönglenre im Mā Tēv meh, ngaich yik kumyung ök rācha aṅ Sīriā nö öt kô-òngvah tö tī meh.

⁸Röh yik aṅ Iti-ōpia tö yik aṅ Līpia nö tö kiröngen kumyung nö holtö töpōyen inröl tarik inrē aṅ uk kōra? Ngaich kūö meh hayönglenre im Mā Tēv, kēten cha anga-aṅ ngaich nö eltī meh.

⁹Pò minë mat ngam Mā Tēv nö keuheūt maheuṅkre nö ing tumlat, nö hameuktö min hôiṅyöre nö lā in ò, kulō-ovṙen man ngaich in e angū-ö; pò meh min ngaich löktö kūö ing töngamuh öm höng īnu tö kinyūngö.

¹⁰Ngaich Asā nö tainy nö ik mameuk, halökngen ò ngaich nö el kinlōngö, pò ò nö tainy nö in ò kūö e. Öt milēḵ inrē Asā nö chökhutī tö yik rīkre tarik hē e.

¹¹Nuk la-en Asā, löktö kūö ik raneh söl ik mānā-aṅ, röh nuk nö kūchīyö nö i mat öp Līpöre yik Rācha aṅ Yūtā Israĕl inrē.

¹²Im linūöi anāi machūötöre samyeūheu Asā nö hayöng ngaich vahavö nuk kalröön ò, ngaich ök vah ò nö ṙūönyöre ṙôken; ngaich öt tinrīku anga-aṅ ik vahre nö chöh ngam Mā Tēv, chöh holṙenre pöri tö lamë-en vah.

¹³Haṙòh ngaich Asā nö in yik yöngre, kapah ik samyeūheu töfën anāi kahuk hē ò nö hayöng.

¹⁴Lāpngen ò cha-a ngaich nö el ök anūlö ahulhöt ò nö el ök panam Tāvit. Ṙātu anga-aṅ nö el chūök kupah ök tö hatöölöng aṅ tö töṙōlkangen tötahūsa töhalēnö tö yip töhuveū vamī tötahūsa; kiröngö vahī cha-a ngaich tö tameūyö nö ineū-euṅ ò.