Read Car_Nicobarese 2 KINṘÖTNGÖ 18 Bible Online

2 KINṘÖTNGÖ 18 - Car_Nicobarese bible

2 KINṘÖTNGÖ 18

¹Ngaich töngamuh Yēhōsafāt nö kiröngen kanôlò ineū-eu inrē; ngaich anga-aṅ nö in Ahap nö lökten i pīnīhö nö hamūltöre.

²Chuh in Ahap anga-aṅ nö i Samariā unôichrit töharoh tum samyeūheu. Ngaich ang Ahap nö pōyen ṙahatnyö likeun tö sīṅp kōiny nuā inrē tö pòkūö ò kūö yik tarik inrē hol ò, ngaich haṙöiten ò nö kiröönngöre nö lā-al Ramòtkīlīöt.

³Ngö ṙô ang Ahap ök rācha aṅ Israĕl tö Yēhōsafāt rācha aṅ Yūtā, Hō öm in chu chuh Ramòtkīlīöt? Sap ṙô ò ngaich anga-aṅ, Sā meh chin chū-ö vē tarik chu sā yip tarik meh. Hō in in meh im kinyūngö.

⁴Ngaich ngö ṙô ang Yēhōsafāt tök rācha aṅ Israĕl, Urĕh yĕh hatönken ṙô ngam Mā Tēv.

⁵Ngaich ök rācha aṅ Israĕl nö hamūl yik pròfĕt nö hĕng kiteūm, fënòng tumtak tarik ngaich ngö ṙô tö cha, kiröönngöre öyih kiyung la-al Ramòtkīlīöt, hēk hökngenre öichu? Ngö ṙô ngaich cha-a, Kuṙòh: tön kētö e an min ngam Tēv nö eltī ngam rācha.

⁶Ngö ṙô pöri Yēhōsafāt, Öt hĕng tak hòng ihih tahëng pròfĕt ngam Mā Tēv öp chūökṙô hī hatöntöre?

⁷Ngaich ngöṙô ök rācha aṅ Israĕl, tö Yēhōsafāt, Ōtre ap umuh tarik hĕng tit taka öp chūök ṙô hī kô-òren hatöntöre im Mā Tēv, Mīkaya ap kikōnyö kūön Imla; kunyaha el mat pöri chū-ö tö ò pòn öt hĕng heuh nö löökö vahë-eny nö lā in chu, örheūheu pöri nöng töt löök. Ngaich ngö ṙô ang Yēhōsafāt, Uh an yēḵ ngam rācha nö ngatī ṙô.

⁸Ngaich ök rācha aṅ Israĕl nö havëkö ök hĕng tak mā kūö nö ngö ṙô. Ka-eūyen kēten Mikayā öp kikōnyö kūön Imla.

⁹Ngaich ök rācha aṅ Israĕl tö Yēhōsafāt inrē ök rācha aṅ Yūtā nö ūichhaka nö el nuk kantēra cha; hayūtö tö inyut re nö rācha; ūichhakaṙen cha-a nö el chūök pinṙōngö sāiny ip inkūp lökhöt i Samariā; ngaich ṙòkhöre yip pròfĕt nö vë-eny nö i kūö cha.

¹⁰Ngaich ang Sētikia ök kikōnyö kūön Kēnanā nö vī sinrōlre tövët, ngaich ngö ṙô, Ngö ṙô an ngam Mā Tēv, Aṅtī tö në man min kuringngö yip aṅ Siriā hanöng sāha cha nö hatngö.

¹¹Ngatī ṙô yik pròfĕt nö ṙòkhöre nö vë-eny, nö ngö ṙô, Kuṙòh chuh Ramòtkilīöt öm mihôiṅ; kētu an min tö ngam Mā Tēv nö eltī ngam rācha.

¹²Ngaich ngö ṙô ök tö tīniyö ök kumröönngöre nö havëken Mikāya tö ò, Yĕh meuk, hēngòng ṙô yin më pròfĕt tö ngam ahō-o ngam rācha; ngatī ap yēḵ ṙô meh sā ngam ṙô cha nö hĕng ṙô-òv inrē tötöhō-ov.

¹³Ngö ṙô pöri Mikayā, Sā ngam Mā Tēv nö tö aṅ, öp ṙô ngam Tēv chu, angū-ö min ṙô chu.

¹⁴Ngaich hē ò nö yihtöre nö ik rācha, ngö ṙô ngaich ök rācha tö ò, Mīkayā, chuh Ramòtkilīöt öi kiyung, hēk hökngen re öichu? Ngaich sap ṙô anga-aṅ, Kuṙòh öm mihôiṅ; kētu yip min nö eltī meh.

¹⁵Ngö ṙô pöri ök rācha tö ò, Ām heuh öich min chūökuṙô in meh öich hōten meh ṙô-òv in chu töp töng tökô-en i minë-eny ngam Mā Tēv?

¹⁶Ngaich ngö ṙô anga-aṅ, Meūkö Israĕl chin nö ṙòkhöre nö parāti nö i kui minë rôngö, sā sīṅp töt yōmuṙen; ngaich ngö ṙô ngam Mā Tēv, Rö-ö yin vē nö töyönguṙen; hökngen cha nö köhavan nö i patīre im kumchikṙen.

¹⁷Ngaich ngö ṙô ök rācha aṅ Israĕl tö Yēhōsafāt, Röh öich taheui ṙô-òv in meh tö ò nö öt hōḵ nö löököṙô nö lā in chu höng tötlöök.

¹⁸Ngaich Mikayā nö ngö ṙô, Lökten hang ṙô ngam Mā Tēv, Meuk ngam Mā Tēv chin nö el kantēra yip tömaṙôngö el halīöngö nö sökhaka nö lahāmö ò lā tavē ò inrē;

¹⁹Ngaich ngö ṙô ngam Mā Tēv, Chiāp min mahaṙöingen Ahap rācha aṅ Israĕl, hòṅ ò nö kiröönngöre ngaich fukngö nö i Ramòtkilīöt Ngaich hēngö ṙô ök tö hĕng tak, tahëngö ṙô inrē ök tahëng.

²⁰Hĕng tak ngaich ök ma-alaha kumnyī-inyre nö lā kūö sökhak ngaich nö i kūö ngam Mā Tēv, nö ngö ṙô, Chū-ö chin töhōḵ haṙöingen ò. Ngaich ngö ṙô ngam Mā Tēv tö ò, Öm sītih tī?

²¹Ngaich ngö ṙô anga-aṅ, Kiröönngöre chin min ngaich min chū-ö töminyôinyaṅ ma-alaha elvāng yip pròfĕt ò. Ngaich ngö ṙô anga-aṅ, Më-eṅ man haṙöingen ò, ngaich teunglen min më-eṅ; kuṙòh kiröönngöre ngatī inlahen.

²²Lökten yĕh meuk töngamuh, chaphöt töminyôinyaṅ ma-alaha an ngam Mā Tēv nö el vāng vē pròfĕt meh; ötlöököṙô an ngam Mā Tēv nö lā in meh.

²³Ngaich ang Sētikia ök kikōnyö kūön Kēnanā nö haröhtöre ngaich fatāk kūö Mīkayā, nö ngö ṙô, Öp yòh ap taheui talöökö ngam Fanöinylö ngam Mā Tēv nö ṙā-ang in chu nö vë-ekūö meh?

²⁴Ngö ṙô Mīkayā, Yĕh meuk, meuk man min kuhēthötre el ap lātuhēt uròhò öm hayunngöre.

²⁵Ngaich ngö ṙô ök rācha aṅ Israĕl, Kē-ĕ Mīkayā, kēngen ò hēk in Amön ap mahayöng ngam elpanam in Yô-as inrē öp kikōnyö kūön öp rācha;

²⁶Ngö ṙô, Ngö ṙô ap rācha, chaphöt ngòh tarik el kinlōngö, kūön vat tī hā-aṅ len ò tö ròtī mak inrē, hanöng saha invānö tö chu im lanāmö.

²⁷Ngaich ngö ṙô ang Mīkayā, Yē meh havan im lanāmö, ngaich ngam Mā Tēv nö öt ṙô-òv nö löknyö in chu. Ngö ṙô ngaich anga-aṅ, Hang yin, ṙòkhöre yī-ö tarik!

²⁸Lökten nö ngaich ök rācha aṅ Israĕl tö Yēhōsafāt ök rācha aṅ Yūtā nö kiröönngöre nö chuh Ramòtkilīöt.

²⁹Ngaich ngö ṙô ök rācha aṅ Israĕl tö Yēhōsafāt, Harīkngenre chin chū-ö chuh im kinyūngö, inyut tö inyutre pöri më-eṅ öm rācha. Harīkngenre ngaich ök rācha aṅ Israĕl; kiröönngöre ngaich cha-a nö im kinyūngö.

³⁰Ngaich ök rācha aṅ Sīria nö tölṙô yik yöng kūö nuk inröl ò, Un kiyung tökūöṅnö un rēhĕn tö kiröng höng ip rācha aṅ Israĕl.

³¹Ngaich hē yik yöng kūö nuk inröl nö meūkö Yēhōsafāt, ngö ṙô cha-a, Anga-aṅ an rācha aṅ Israĕl. Lökten cha nö havöötökūöre nö lā-al ò; ayôṙa ngaich Yēhōsafāt, holṙen ò ngaich ngam Mā Tēv, Ṙūöhöyö cha-a nö ṙā-ang in ò tö ngam Tēv,

³²Pòn hē yik yöng kūö nuk inröl nö meūkan nö öt rācha aṅ Israĕl havöökūöre ngaich cha-a nö ṙeū-eung i linū-u ò.

³³Hĕng tak pöri ök tarik kamlahang tī re nö tūök ök linerenyre, kô-òng vah tī ngaich tök rācha aṅ Israĕl nö lökhöt hôi mat ök lanaklö tök lanaklö elngòh; lökten an nö ngö ṙô tök yōm ök inrölre. Havööngö kūöre kēnyen chu ṙā-ang im kinyūngö, tön ngaich chin nyahāṅvö.

³⁴Ṙūöhölre kumlēḵ ngaich ngam kinyūngö im sakāmö angū-ö, ngaich ök rācha aṅ Israĕl nö harônlöre nö el ök inrölre nö kū-öten yik aṅ Sīriā söl harap; ngaich i sanipti ngam tavūöi kapah ngaich anga-aṅ.