Read Car_Nicobarese 2 KINṘÖTNGÖ 19 Bible Online

2 KINṘÖTNGÖ 19 - Car_Nicobarese bible

2 KINṘÖTNGÖ 19

¹Havan ngaich Yēhōsafāt ök rācha aṅ Yūtā nö i patīre i Yērusalem.

²Kunyī-inyre pöri Yēhū nö höngkūö ò ök kikōnyö kūön Hananī ök mameuk, ngaich ngö ṙô tök rācha Yēhōsafāt, Töhōtu öm holṙen tötlöök hāngenlōn inrē tö cha yip tö sumrīk tö ngam Mā Tēv? Ngaich ök lanīnö nö in meh ṙamā-ang im Mā Tēv, tö kūö ngih.

³Rahëichyen pöri tölöök tökôti nö in meh, pò meh ngaich tiṙōlngö nuk Asēra nö ṙā-ang im panam, ngaich kētö kūö ellōnre inrē me-eṅ chöh ngam Tēv.

⁴I yöng Yērusalem ngaich Yēhōsafāt; ngaich hēk anga-aṅ nö kunyi-inyre nö in yik tarik löktö kūö Pīrsīpā i nup rung panam Ifrēm, ngaich kēten cha nö hēk nö im Mā Tēv, ngam Tēv yik yöng cha.

⁵Vīlö kamhôṅka inrē anga-aṅ nö im panam el nuk elpanam chūök kunyung i Yūtā, i töhĕng elpanam ngaich hēk i tahëng,

⁶Ngö ṙô anga-aṅ tö yik kamhôṅka, Ngëichkö nuk la-enre yin, tön rö-ö yin kamhôṅka öi i tarik i ngam Mā Tēv pöri; in yīö an anga-aṅ yē yīö akah fālen.

⁷Yĕh pöchö ngaich, i kui yīö an yēḵ ngam pinhë-eṅkūö tö ngam Mā Tēv; haṙēmngenre tö nup la-en yīö, tön rö-övö nö inchōichnguvö nö in öp töchip hēk öt intöltenvö, hēk öt kē raneushö minyôiny.

⁸I Yērusalem inrē ang Yēhōsafāt nö vīlö yik rēvre Lēvī kūönṙô inrē nö yöng kūö i mupīhö Israĕl, nö akah fālen nö i chūök ngam Mā Tēv ngaich halöök nup fālen linā-alkūö. I Yērusalem nuk anūchö cha.

⁹Ngaich kētö chöngö cha anga-aṅ: ngatī inlahen pöichö i pinhë-eṅkūö tö ngam Mā Tēv, i kanô-en, kinheūttö ellōn inrē,

¹⁰Yē öp fālen nö yih nö in yīö nö ṙā-ang in yip hol yīö yip mī-iyöng el nup elpanam, inlahen finëlngö tarik, chöngö, ngaich yī-ö haköpten cha, hòṅ cha nö öt fāluṙen nö i kūö ngam Mā Tēv hòn öt yih ngam lanīnö nö i kui yīö in yip hol yīö inrē. Ngatī inlahen yī-ö, ngaich yī-ö min öt fāluṙen.

¹¹Yĕh meuk, i kui yīö an Amāriyā nö yöng kūö kūönṙô i tö keuheūttöre im mā Tēv; Sëpatīyā inrē öp kikōnyö kūön Israĕl, öp mahayöng aṅ patī Yūtā, i nup tökeuheūttöre i la-en rācha; kūönṙô yīö min inrē yip Lēvi nö yöngṙen. Kēken u un pa-ekūö, in yip töchiplen an yēḵ ngam Mā Tēv!