Read Car_Nicobarese 2 KINṘÖTNGÖ 2 Bible Online

2 KINṘÖTNGÖ 2 - Car_Nicobarese bible

2 KINṘÖTNGÖ 2

¹Ngaich töngamuh Sòlòmön nö hòṅ lōnu tö minānlö ök tempöl nö i minë-eny ngam Mā Tēv, hĕng patī rācha inrē chūök ò.

²Sat anāi köṅny yik tarik töhakösīṙen nö tamyuk tölangan hëvhör anāi köṅny inrē famung ihong nö ip rung panam, lūöi köṅny tafūölòng inrē yik mameukken cha.

³Söömngö ṙô ngaich Sòlòmön nö in Huram ök rācha aṅ Tūrös: Sā meh ngaich lök alaha ök yöng chu Tāvit öm söömtö sītör chōn ò nö manlö patī elyöngö ò, ngatī man yēḵ löḵ alaha chu.

⁴Yĕh meuk, hòṅ mānlö patī chin i minë-eny ngam Mā ngam Tēv chu ngaich kētö e in ò nö chūök finöngö lōpān nö tö tahūsa nö i kūö ò, nö tö iṙūöhen tökētu aṅ i töhet rôti töföngö tökētu inrē tö peuheū tö harap inrē, hē el anôilö, tufömngöre chingëṅt inrē nup tökiröng nyinā-aṅ inrē tö hakāmi nö im Mā Tēv ih. Sā inchöngten e nö örheūheu nö in Israĕl.

⁵Tökiröng ap patī öp mahānlö chu, pò ngam Tēv ih nö kiröng tö Tēv nö ṙòkhöre.

⁶Achīö pöri öre tökô mamānlö patī ò, yĕn öt rēhĕn ngam halīöngö, öt rēhĕn ngam lā tulöng halīöngö, nö kô-òre nö chūök ò? Achīö öich chū-ö öich mamānlö patī ò, höng chūök finöngö tötahūsa öre nö i kūö ò?

⁷Lökten man tangamuh tīntö tarik in chu hĕng tak töhuveū-en nö i vinī-i humlum, rupīö, mās, vët inrē, i tö amëla linngūṅṙö töhuṙing, i tö amëla tököinyö nganāvö mat, tölingūṅ ta-īö inrē, töhaköptu inrē nö i kin-īpö mirun, nö hol yip tömilichngen huneū-en yip mī-in chu i Yūtā Yērusalem inrē, yip halēnten ök yöng chu Tāvit.

⁸Söömtö sitör chōn inrē in chu, sīprös, ôlköm savach inrē aṅ Lepanön, tön akahalōn chin tö yip tarik meh nö heuveū-en nö ṙāt savach nö i Lepanön hol yip tarik meh min yip tarik chu inrē,

⁹Mahalēn nup savach chu nö pōiyen, tön tökiröng öp min patī mahānlö chu pinngangkūö inrē.

¹⁰Kē-ĕkūö yip tarik meh chin min, kamūöltö chōn ṙamat savach inrē, nët anāi köṅny kōr tösōngö vīt, nët anāi köṅny kōr parlī, nët anāi köṅny pāt vāin, nët anāi köṅny pāt tavī-i.

¹¹Ngaich Huram ök rācha aṅ Tūrös nö sapṙô ök tökūchö līpöre ngaich söömngö e nö in Sòlòmön, Pò ngam Mā Tēv nö hāngenlōn tö yip tarik re vīlen meh anga-aṅ ngaich rācha i kui cha,

¹²Ngö ṙô inrē Hūram, Tökôlò an yēḵ ngam Mā Tēv Israĕl, ngam vamī-il halīöngö tumlat inrē, ngam kamë-eṅkūö ök rācha Tāvit tö kikōnyö kūön tö-akaha, tökētu mikah mikah elmat inrē, nö mamānlö ngam tempöl ngam Mā Tēv, mānlö chūökre inrē tö patī rācha.

¹³Ngaich chin hĕng tak tahīnti tö töhuveū-en tarik, tö-inu tö mikah elmat, Huramapī,

¹⁴Kikōnyö kūön ök kikānö aṅ in yik kikānö kūön Tën, aṅ Tūrös ök tarik kikōnyö yöng ò, tö haköptu an nö i la-en i humlum, rupīö, mās, vët, ihong chōn inrē, i tö-amëla elmat töhuṙing i tölingūṅ, tököinyö nganāṅvö mat, ta-īö līnen inrē töfaṙë-cha, tökeuheūtöre huneū-en inrē nö i kin-īpö mirun i vinī-i töng sitih mirun nup tinöölô ò nö kô-òren, nö hol yip tö huveū-en tarik meh, yip tö huveū-en tarik öp mā chu, ök yöng meh Tāvit.

¹⁵Ngaich man yĕh lökten söömtö vīt parlī inrē, tavī-i vāin inrē, nup ṙô ngam mā chu nö in vē tarik meh;

¹⁶Ngaich īhö min ṙat nup töng sitih savach lōn meh i Lëpanön, ngaich īhö min kētö u in meh nö el inpöh nö lök el mai i Yòppa, hòṅ meh kē-ĕ u nö chuh Yērusalem.

¹⁷Ngaich ang Sòlòmön nö kaheuk tumtak yik aṅ tahëng tarik mi-iyöng i panam Israĕl, unôichrit kinṙeūkö cha tök yöng ò Tāvit; ngaich kôti cha-a nö hēngòng taneui anāi lūöi köṅny tafūölòng.

¹⁸Sat köṅny yik aṅ in cha in cha tökatöli kameun tölangan, hëvhör köṅny famung ihong nö ip rung panam, lūöi köṅny tafūölòng mameukken yip tarik nö la-evṙen.