Read Car_Nicobarese 2 KINṘÖTNGÖ 21 Bible Online

2 KINṘÖTNGÖ 21 - Car_Nicobarese bible

2 KINṘÖTNGÖ 21

¹Haṙòh ngaich Yēhōsafāt nö i yik yöngre lāpi ngaich nö in yik yöngre nö elpanam Tāvit; ṙenngen ò ngaich nö hayöng ök kikōnyö kūön ò Yēhōram.

²Hol maneūku anga-aṅ, tö kikōnyö kūön Yēhōsafāt: Asariyā, Yēhīel. Sakariyā, Asarīya, Maiköl, Kefatiyā inrē; ṙòkhöre yin vē nö kikōnyö kūön Yēhōsafāt rācha aṅ Yūtā.

³Kiröngen tī ök yöng cha nö alōnten cha, tö rupīö, humlum, töpōi ṙāi chehen inrē, holre tö nuk chūök kumyung elpanam i Yūtā; kētöm pūlngö pöri anga-aṅ nö in Yēhōrām pòn lanòh anga-aṅ.

⁴Hē Yēhōrām nö yôklö nö el kantēra ök yöngre ngaich nö köp, fëlngö yik hol maneukre anga-aṅ nö aṅtī tö sanët, rīkre inrē yik kūön rācha aṅ Israĕl.

⁵Lūöi anāi nët samyeūheu ṙēti ang Yēhōrām hē ò nö rācha, hëvhör samyeūheu anga-aṅ nö hayöng nö i Yērusalem

⁶Lök el talöökö yik rācha aṅ Israĕl anga-aṅ nö sā la-en yik aṅ patī Ahap; pòn kūön Ahap ök pīhö ò. La-evṙen inrē anga-aṅ tö töchōich nö i kūö ngam Mā Tēv.

⁷Sönngenre ngam Mā Tēv nö öt hòṅ piyāingö ngam patī Tāvit, kūö ngam kinlēḵngô vahī ò nö in Tāvit, ngaich kūö ò nö kilēḵngôre nö kētö ëāṅvö nö in ò in yip kikōnyö kūön ò inrē nöng örheūheu.

⁸Hē nuk sakāmö ò Ētòm nö ahôngen chöngö Yūtā, ha-ūichlö rācha re ngaich nö kahngenre.

⁹Havāngngöre ngaich Yēhōrām nö holtö yik töchöngu ṙòkhöre inrē nuk inröl ò, choholre anga-aṅ ngaich tö hatööm ngaich kiyung yik aṅ Ētöm yik mahavīlen ò tö yik töchöngu i nuk inröl ò inrē.

¹⁰Ngatī inlahen Ētöm nö ahôngen chöngö Yūtā nö söl ing töngamuh. Hē e inrē Lipā nö ahôngen chöngö ò, pò ò nö ṙāngö ngam Mā Tēv, ngam Tēv yik yöng ò.

¹¹Hēk inrē anga-aṅ nö vīlö lātulöng chūökö ip rung panam Yūtā, ngaich hachōten yik aṅ Yērusalem nö im tötkô-en, vīten Yūtā inrē nö lō-ongkūö.

¹²Ngaich hĕng ök līpöre tökūichö yamih nö in ò ṙā-ang in Elāicha ök pròfĕt, tö ngö ṙô, Ngö ṙô an ngam Mā Tēv, ngam Tēv ök yöng meh Tāvit, Pò meh ötlök nuk talöökö ök yöng meh Yēhōsafāt, hēk i nuk talöökö Asā ök rācha aṅ Yūtā,

¹³Ngaich pöri öm lök talöökö yik rācha aṅ Israĕl, ngaich hachō-o Yūtā tö yip aṅ Yērusalem inrē im öt kanô-en, sā ngam patī Ahap nö hachō-o Israĕl nö im ötkanô-en, ngaich më-eṅ inrē fëlngö yik hol maneukre, yik aṅ patī ök yöng meh yik tö-ĕhten tö meh;

¹⁴Yĕh meuk, kētö öp yöng tölëlngökūö invah an min ngam Mā Tēv nö i kui yip tarik meh, kūön meh, pīhö meh, nup taṙòkhöre inrē inlānen meh,

¹⁵Ngaich më-eṅ min inrē pōihangṙen vahāvö töp invah ellōn meh, hanöng saha nup ellōn meh min nö talīn köṅny tö kūö ap invah meh, kaheuk sakāmö.

¹⁶Ngaich ngam Mā Tēv nö haruhlö lanīnö yik aṅ Filistain nö lā-al Yēhōrām tö yik Arap inrē töröhta nö in yik aṅ Itīōpia;

¹⁷Yih cha-a ngaich nö lā-al Yūtā, havīlen e ngaich, ngaich halaingö nuk chehen ök rācha kanôtökūö cha nö el patī ò yik kikōnyö kūön ò inrē tö yik pīhö ò, lökten nö öt kikōnyuvö kūön ò töṙā-ai höng Yēhō-ahas, ök manāngö kūö ò kikōnyö.

¹⁸Pòrô pöri angū-ö ngih ngaich fëlngen ò ngam Mā Tēv töp invah töt lanë-enṙen ellōn ò.

¹⁹Irô-òten e ngaich, i kinheūten tö nët samyeūheu, ök invah ellōn ò nö talīnköṅny tī tö puhū ò, holtö chanöököre ngaich anga-aṅ nö kapah. Öt vī tameūyö yik tarik ò nö ineū-euṅ ò, nö sā ök tameūyö vahī cha in yik yöng cha.

²⁰Lūöi anāi nët samyeūheu ṙēti anga-aṅ hē ranulten ò nö hayöng, ngaich hëvhöre samyeūheu anga-aṅ nö hayöng nö i Yērusalem; ngaich öt hĕng tak tö haṙivlōn hē chanuhu ò. Lāpngen ò cha-a ngaich nö elpanam Tāvit, hö-ö pöri nö el anūlö rācha.