Read Car_Nicobarese 2 KINṘÖTNGÖ 22 Bible Online

2 KINṘÖTNGÖ 22 - Car_Nicobarese bible

2 KINṘÖTNGÖ 22

¹Ngaich yik aṅ Yērusalem nö vīlen Ahasīyā ök manāngö kikōnyö kūön rācha nö ṙënngen ò; pò yik tö hĕng kiteūm tarik yik yamih nö hol yik Arap nö fëlngen yik maṙöinylö kūön ò nö ik elyöngö cha. Lökten Ahasiyā ök kikōnyö kūön Yēhōrām rācha aṅ Yūtā nö hayöng.

²Fën anāi samyeūheu ṙēti Ahāsiya hē ranulten ò nö hayöng hĕng samyeūheu anga-aṅ nö hayöng nö i Yērusalem. Atālīya minënyi ök yöng ò kikānö, yōm Ōmrī nö kikānö.

³Lök el nuk talöökö aṅ patī Ahap inrē anga-aṅ, pòn ök kikānö yöng ò mahalēnan nö i tötlöök la-en.

⁴La-evṙen anga-aṅ tö tötlöök nö i kūö ngam Mā Tēv sā inlahen yik aṅ patī Ahap; pòn unôichrit kinpaha ök kikōnyö yöng ò nö acha-a mahalēnan, tö lökngen ò nö ötkôlò.

⁵Uroh anga-aṅ nö tömrit nuk inlēnöre tö cha, ngaich kiröönngöre nö hol Yēhōrām ök kikōnyö kūön Ahap rācha aṅ Israĕl nö kiyung lā-al Hasa-ĕl rācha aṅ Siriā nö i Ramòtkilīöt. Ngaich yik aṅ Siriā nö hanyahken Yēhōrām,

⁶Ngaich anga-aṅ nö havan nö i Yesrīl nö halankaṙen tö nuk vahre nyaha ò nö i Ramā, hē ò nö kiyung nö lā-al Hasaĕl rācha aṅ Siriā. Ngaich Ahasiyā ök kikōnyö kūön Yēhōrām rācha aṅ Yūtā nö kiröönngöre nö chöhken Yôram ök kikōnyö kūön Ahap nö i Yesrīl, pò ò nö vahavö.

⁷I chöngö ngam Tēv pöri ngam fanukngö Ahasiyā nö löktö kūö ò nö kiröönngöre nö chöhken Yôram. Pòn hē ò nö yih nö umuh kiröönngöre anga-aṅ ngaich nö hol Yēhōrām nö höngkūö Yēhū ök kikōnyö kūön Nimsī, ök tö vīlöng tö ngam Mā Tēv nö ma-ahatngö ngam patī Ahap.

⁸Ngaich hē Yēhū nö lök alaha inkaha fālen ngam patī Ahap, meukkūö yik kūön rācha anga-aṅ aṅ Yūtā tö yik kikōnyö kūön hol maneuk Ahasiyā, yik hamòl röön Ahasīyā, fëlngen cha ngaich anga-aṅ.

⁹Chöhö Ahasiyā anga-aṅ nö kô-òngvah nö kē-ĕ hē ò nö hayunngöre nö i Samariā, kētu ngaich anga-aṅ nö in Yēhū ngaich kumpahaivah. Lāpngen ò cha-a ngaich, pò cha nö ngö ṙô, Yōm Yēhōsafāt an ök chamöh ngam Mā Tēv nö keuheūt tö ellōnre. Öt hĕng tak ngaich aṅ patī Ahasiyā tökô nö hayöng ngam pūlngö.

¹⁰Hē Atāliya ök kikānö yöng Ahasiyā nö meuk ök kūönre nö kapah, choholre anga-aṅ ngaich ngaich, keuheūtngöre vah tī nö fëlngö yik kūön rācha aṅ patī Yūtā.

¹¹Ngaich pöri Yēhōsapēat, ök kikānö kūön ök rācha, nö kē-ĕ Yô-as ök kikōnyö kūön Ahasiyā, nö ulāingen ò nö ṙā-ang in yik kikōnyö kūön ök rācha yik tö ngaich nö tö hòṅ fëli, chaphöt ò anga-aṅ nö el ök urôhò chūök mahaṙòh tök maharūkan inrē. Ngati tī Yēhōsapē-at, ök kikānö kūön ök rācha Yēhōram ök pīhö Yēhōiyāta ök kūönṙô, pò ò nö kanānö Ahasiyā, hayunngen ò tö Atalīya, pòn sōten ò nö fëlngen ò;

¹²Tafūöl samyeūheu ngaich anga-aṅ nö höng ngöh nö in cha, hayūni nö el patī ngam Tēv, i saha Ataliyā nö hayöng ngam panam.